តុលាការថៃបើកសវនាការកាត់ទោសអតីតនាយករដ្ឋមន្ត្រី យីងឡាក់ ស៊ីណាវ៉ាត់
ថ្ងៃអង្គារទី ១៩ ឧសភា២០១៥នេះ តុលាការថៃត្រូវបើកសវនាការកាត់ទោសលោកស្រីយីងឡាក់ ស៊ីណាវ៉ាត់ អតីតនាយករដ្ឋមន្ត្រីថៃ ក្នុងសំណុំរឿងពុករលួយ និងនយោបាយប្រមូលទិញអង្ករពីកសិករ។ សំណុំរឿងក្តី ដែលអាចនាំលោកស្រីឱ្យជាប់ទោសក្នុងពន្ធនាគារ រហូតដល់ទៅ ១០ឆ្នាំ។ ប៉ុន្តែលោកស្រី យីងឡាក់ ខុសពីបងប្រុស គ្មានចេតនា គេចខ្លួនចេញពីប្រទេសទេ។
ចុះផ្សាយនៅថ្ងៃ៖
លោកស្រីយីងឡាក់ នឹងចូលទៅប្រឈមមុខក្នុងតុលាការដោយផ្ទាល់តែម្តង ! នេះបើតាមមេធាវីម្នាក់ ប៉ុន្តែទោះជាយ៉ាងដូច្នេះក្តី ក៏តុលាការនៅតែមិនទុកចិត្ត និងបានប្រកាសព្រមាន តាមរយៈសន្និសីទកាសែត ថានឹងមានការចាប់ខ្លួន ប្រសិនបើលោកស្រីអវត្តមាន នៅថ្ងៃអង្គារនេះ។
ជាអតីតនាយករដ្ឋមន្ត្រីថៃ ខ្ទាតចេញពីតំណែងដោយរដ្ឋប្រហារ លោកស្រីយីងឡាក់ត្រូវជាប់ចោទពីបទពុករលួយ និងធ្វេសប្រហែល ដឹកនាំធ្វើនយោបាយប្រមូលទិញអង្ករជួយឧបត្ថម្ភពលរដ្ឋ ដែលនាំឱ្យខាតបង់ថវិការដ្ឋ។
សម្រាប់អ្នកវិភាគ សវនាការកាត់ទោស ដែលប្រព្រឹត្តទៅស្ទើរចំថ្ងៃខួបនៃការធ្វើរដ្ឋប្រហារទម្លាក់រដ្ឋាភិបាលលោកស្រី គឺជាបំបិទផ្លូវមិនឱ្យលោកស្រីយីងឡាក់ធ្វើនយោបាយ និងជាការវាយពន្លិចត្រកូលស៊ីណាវ៉ាត់ ដែល តាំងពីឆ្នាំ២០០០មក មានប្រជាប្រិយភាព លេចធ្លោខ្លាំងពេក ក្នុងឆាកនយោបាយថៃ សម្រាប់ក្រសែភ្នែកអ្នករាជានិយមនិងក្រុមអ្នកកំពុងកាន់អំណាចបច្ចុប្បន្ន។
ប៉ុន្តែតាមអ្នកជំនាញនយោបាយអាមេរិក ការឃុំឃាំងក្នុងពន្ធនាគារ នឹងធ្វើឱ្យលោកស្រីយីងឡាក់ ទទួលបានការគោរពកាន់តែខ្លាំង ! លោកស្រីធ្លាប់បានបដិសេធមិនចាកចេញពីប្រទេសដូចអ្វីដែលបងប្រុស គឺលោក ថាក់ស៊ីន ស៊ីណាវ៉ាត់ បានធ្វើដើម្បីរត់គេចពីការកាត់ទោសដាក់ពន្ធនាគារ ពីបទប្រព្រឹត្តអំពើពុករលួយ ក្រោយរដ្ឋប្រហារឆ្នាំ២០០៦ទេ។
ប្រការដ៏គួរឱ្យព្រួយបារម្ភមួយទៀត គឺការថ្កោលទោសលោកស្រីយីងឡាក់ អាចនឹងចិញ្ចឹមចិត្តចលនាប្រជាជនអាវក្រហម ដ៏ខ្លាំងក្លា ដែលរងការបង្ក្រាបខ្លាំង តាំងពីថ្ងៃទី ២២ឧសភា ឆ្នាំ២០១៤មក ពីសំណាក់រដ្ឋាភិបាលសឹក ឱ្យរស់បះបោរឡើងវិញ។ របបសឹកដែលបានធ្វើគ្រប់យ៉ាង ពន្យារពេលបោះឆ្នោត កែប្រែច្បាប់ មានបំណងតែមួយគឺរារាំងត្រកូលស៊ីណាវ៉ាត់មិនឱ្យវិលមលកាន់អំណាចបានតាមរយៈសន្លឹកឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ