គណបក្សប្រឆាំងរបស់ថៃត្រូវសម្រេចថា ចូលរួមបោះឆ្នោតក្នុងខែកុម្ភៈ ឬក៏អត់
គណបក្សប្រជាធិបតេយ្យ ដែលជាគណបក្សប្រឆាំងក្នុងប្រទេសថៃ កំពុងប្រឈមនឹងទំនាស់គំនិតផ្ទៃក្នុង បន្ទាប់ពីបានតវ៉ារំលាយរដ្ឋាភិបាលបានសម្រេច។ គណបក្សប្រឆាំងរបស់ថៃ នៅថ្ងៃអង្គារនេះត្រូវតែរកសេចក្តីសម្រេចអោយឃើញថា តើពួកគេត្រូវចូលរួមក្នុងការបោះឆ្នោតដែលព្រះមហាក្សត្របានកំណត់នៅថ្ងៃទី២កុម្ភៈ ឬក៏អត់ ខណៈគំនិតទាំងនេះ កំពុងតែជាប្រធានបទពិភាក្សានៅក្នុងគណបក្ស។
ចុះផ្សាយនៅថ្ងៃ៖
ស្តាប់ - ០២:០៣
គណបក្សធំទាំងពីរនៅក្នុងប្រទេសថៃ កំពុងតែតតាំងគ្នាអំពីជំរើសនៃការដោះស្រាយវិបត្តិនយោបាយ ថាត្រូវធ្វើកំណែទម្រង់ មុនការរៀបចំបោះឆ្នោត ដែលនេះគឺជាការទាមទាររបស់គណបក្សប្រឆាំង ឬក៏ត្រូវរៀបចំការបោះឆ្នោត មុនការធ្វើកំណែទម្រង់ ដែលនេះគឺជាការចង់បានរបស់គណបក្សភឿថៃ។ គណបក្សភឿថៃដែលកំពុងដឹកនាំរដ្ឋាភិបាលចាំផ្ទះសព្វថ្ងៃ
គណបក្សប្រឆាំងរបស់ថៃដែលកំពុងមានឥទ្ធិពល ហើយទើបតែបានតវ៉ាបានសម្រេចអោយមានការរំលាយរដ្ឋាភិបាលនោះ ក៏កំពុងមានទំនាស់គំនិតផ្ទៃក្នុងដែរ អំពីការចូលរួមប្រកួតក្នុងការបោះឆ្នោតនៅថ្ងៃទី២កុម្ភៈ ដែលប្រកាសដោយព្រះមហាក្សត្រ ឬក៏មិនចូលរួម។ ហើយគណបក្សប្រជាធិបតេយ្យត្រូវធ្វើសេចក្តីសម្រេចនៅថ្ងៃអង្គារនេះ។
នៅក្នុងគណបក្សប្រជាធិបតេយ្យនេះ ប្រធានគណបក្សលោកអាប់ភីស៊ីត វេចាជីវ៉ា ទីប្រឹក្សាគណបក្ស លោក ឈួន លីកផៃ និងតំណាងរាស្ត្រមួយចំនួនទៀតរបស់គណបក្សនេះ បានប្រឆាំងនឹងគំនិតពហិកាមិនចូលរួមការបោះឆ្នោត។ ពួកគេនិយាយថា ពួកគេគាំទ្រគំនិតនៃការធ្វើកំណែទម្រង់ថ្នាក់ជាតិ ប៉ុន្តែការបោះឆ្នោត នៅក្រោយការរំលាយរដ្ឋាភិបាល គឺជាផ្លូវប្រជាធិបតេយ្យមួយ។ ហើយថា ប្រសិនបើគណបក្សប្រជាធិបតេយ្យមិនចូលរួមក្នុងការបោះឆ្នោតនេះទេ វានឹងមិនមានគណបក្សប្រឆាំងនៅក្នុងសភា រហូតដល់ចប់អាណត្តិ។
ចំពោះមតិក្រុមមួយទៀតនៅក្នុងគណបក្សប្រឆាំងដដែល ពួកគេបានគាំទ្រគំនិតរបស់មេដឹកនាំបាតុកម្ម គឺលោក ស៊ូថេប ថងស៊ូបាន ដែលអះអាងថា កំណែទម្រង់ថ្នាក់ជាតិមានសារៈសំខាន់យ៉ាងខ្លាំង ហើយថាប្រសិនបើមិនធ្វើកំណែទម្រង់ជាមុននោះទេ បញ្ហាទាំងឡាយនឹងមិនត្រូវបានដោះស្រាយជាដដែល។
គួររម្លឹកថា ដោយសារតែ សេចក្តីព្រាងច្បាប់ស្តីពីការលើកលែងទោស ដែលគេជឿថា វាជាច្រកមួយសម្រាប់ការត្រឡប់ចូលប្រទេសវិញ របស់លោកថាក់ស៊ីន ស៊ីណាវ៉ាត់ គណបក្សប្រឆាំងបានតវ៉ារហូតដល់អោយមានការរំលាយសភា និងរដ្ឋាភិបាលនៅថ្ងៃទី៩ធ្នូកន្លងទៅថ្មីៗនេះ។ ក្រុមអ្នកតវ៉ាបានទាមទាររហូតដល់ការបញ្ចប់របបថាក់ស៊ីនទាំងស្រុងទៀតផង។ ទោះយ៉ាងណាក៏ដោយ ការរៀបចំការបោះឆ្នោតមួយត្រូវបានព្រះមហាក្សត្រកំណត់នៅថ្ងៃទី២កុម្ភៈខាងមុខ ហើយគណបក្សភឿថៃរបស់ប្អូនស្រីលោកថាក់ ស៊ីន គឺលោកស្រី យីងឡាក់ ស៊ីណាវ៉ាត់ កំពុងធ្វើជារដ្ឋាភិបាលចាំផ្ទះនៅពេលនេះ ហើយនឹងរៀបចំការបោះឆ្នោតខាងមុខនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ