វិបត្តិនយោបាយថៃ៖រដ្ឋាភិបាលទាមទារឲ្យចាប់ខ្លួនអ្នកដឹកនំាបាតុកម្ម
នៅថ្ងៃព្រហស្បតិ៍ ទី១៦ មករានេះ រដ្ឋាភិបាលថៃបានអំពាវនាវឲ្យប៉ូលិសចាប់ខ្លួនអ្នកដឹកនំាក្បួនបាតុកម្មដែលបានគំរាមកំហែងចាប់ខ្លួនលោកស្រីនាយករដ្ឋមន្រ្តីយីងឡាក់ ព្រមទំាងបានបិទខ្ទប់ទីក្រុងបាងកកមួយភាគធំ។ រហូតមកដល់ថ្ងៃនេះ ក្រុមបាតុករអាវលឿងជាច្រើនពាន់នាក់កំពុងបន្តបោះទីតំាងនៅទីកន្លែងយុទ្ធសាស្រ្តមួយចំនួនក្នុងទីក្រុងបាងកកដើម្បីទាមទារឲ្យលោកស្រីចុះចេញពីអំណាច ព្រមទំាងរារំាងកុំឲ្យមានការរៀបចំបោះឆ្នោតនៅថ្ងៃទី២ កុម្ភៈខាងមុខ។ តែលោកស្រីយីងឡាក់បានបញ្ជាក់ជាថ្មីថា ការបោះឆ្នោត គឺជាដំណោះស្រាយតែមួយគត់ដើម្បីបញ្ចប់វិបត្តិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
តំាងពីមានការផ្តើមផ្ទុះបះបោររបស់ពួកអាវលឿងប្រឆំាងនឹងរដ្ឋាភិបាលរបស់លោកស្រីនាយករដ្ឋមន្រ្តីយីងឡាក់ជាង ២ខែមក មានមេដឹកនំាបាតុកម្មជាច្រើននាក់ត្រូវបានតុលាការចេញដីកាឲ្យចាប់ខ្លួន។ ចាប់ខ្លួនពីបទទទួលខុសត្រូវក្នុងការស្លាប់មនុស្ស ៨នាក់ និងរបួសជាច្រើននាក់ផ្សេងទៀត។ តែបញ្ហានៅត្រង់ថា រហូតមកដល់ថ្ងៃនេះ មេដឹកនំាបាតុកម្មទំាងនោះបាន និងកំពុងដើរហើរដោយសេរី ព្រមទំាងមានសិទ្ធិសេរីភាពយ៉ាងពេញទីទៀតផង។ សម្រាប់ពួកគេ មានដីកាចាប់ខ្លួន ឬគ្មានដីកាចាប់ខ្លួន តើមានអ្វីគួរឲ្យព្រួយបារម្ភទៅ។
នៅក្នុងចំណោមមេដឹកនំាបាតុកម្មដែលកំពុងជាប់ដីកាចាប់ខ្លួន និងដែលកំពុងចេញមុខជាងគេនៅក្នុងក្បួនបាតុកម្មកន្លងមក គឺគ្មាននរណាក្រៅពីលោកអតីតឧបនាយករដ្ឋមន្រ្តីស៊ូថេបទេ។ លោកស៊ូថេបដែលត្រូវបានតុលាការចេញដីកាចាប់ខ្លួនតំាងតែពីដើមខែធ្នូឆ្នំា ២០១៣ ពីបទបានញុះញង់ឲ្យមានការងើបបះបោរប្រឆំាងនឹងរដ្ឋាភិបាលរបស់លោកស្រីយីងឡាក់។ ទន្ទឹមគ្នានេះ លោកស៊ូថេបក៏កំពុងជាប់ចោទក្នុងរឿងអាស្រូវមួយទៀតកាលពីឆ្នំា ២០១០ នៅក្នុងព្រឹត្តិការណ៍វាយបង្រ្កាបយ៉ាងហិង្សាលើក្រុមបាតុករគំាទ្រលោកថាក់ស៊ីនដោយបានបណ្តាលឲ្យមានមនុស្សស្លាប់ ៩០នាក់ និងដែលកាលណោះ រូបលោកស៊ូថេបមានតំណែងជាឧបនាយករដ្ឋមន្រ្តី។
សំណួរដែលគ្រប់គ្នាកំពុងចោទសួរនោះគឺថា ហេតុអ្វីបានជានៅតែគ្មានការចាប់ខ្លួនលោកស៊ូថេបនាពេលនេះ?
កំហុសត្រូវបានគេទម្លាក់លើស្ថាប័នប៉ូលិស គឺមិនមែនតុលាការទេ។ អ៊ីចឹងហើយបានជានៅថ្ងៃព្រហស្បតិ៍ ទី១៦ មករានេះ លោកឧបនាយរដ្ឋមន្រ្តីស៊ូរ៉ាពុងបានថ្លែងជាថ្មីថា ប៉ូលិសមានកាតព្វកិច្ចជាអ្នកចាប់ខ្លួនលោកស៊ូថេប បើពុំនោះសោតទេ គឺប៉ូលិសខ្លួនឯងនឹងត្រូវទទួលការចោទប្រកាន់ពីបទស៊ុមគ្រលំ ឃុបឃិតទៅវិញ។ គួររម្លឹកជូនថារហូតមកដល់ពេលនេះ ប៉ូលិសមិនដែលបានព្យាយាមតាមចាប់ខ្លួនលោកស៊ូថេបនោះទេ។ លោកស៊ូថេបដែលមានកងការពារនៅជុំវិញខ្លួនលោកជាអចិន្រ្តៃយ៍ប្រមាណជា ៤០នាក់។
សូមជម្រាបជូនថា មេបាតុករនៅតែបន្តទាមទារឲ្យលោកស្រីយីងឡាក់ចុះចេញពីអំណាច និងរារំាងមិនឲ្យរៀបចំការបោះឆ្នោតនៅថ្ងៃទី២ កុម្ភៈខាងមុខ ដោយចង់ឲ្យបង្កើតចេញនូវស្ថានប័នគ្រប់គ្រងប្រទេសមួយដោយមិនបាច់ឆ្លងកាត់ការបោះឆ្នោត ហៅថា « ក្រុមប្រឹក្សាប្រជាជន »។ តែលោកស្រីយីងឡាក់បានបញ្ជាក់ជាថ្មីនៅថ្ងៃម្សិលមិញថា ការបោះឆ្នោតគឺជាមធ្យោបាយតែមួយគត់ដើម្បីបិទបញ្ចប់វិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ