នាយករដ្ឋមន្ត្រីយីងឡាក់គេចពីការកោះហៅរបស់គណៈកម្មការប្រយុទ្ធអំពើពុករលួយ
នៅថៃ ថ្ងៃព្រហស្បតិ៍នេះ នាយករដ្ឋមន្ត្រីយីងឡាក់ បានគេចខ្លួនពីការកោះហៅរបស់គណៈកម្មការប្រយុទ្ធអំពើពុករលួយ ដោយលោកស្រីបានចុះទៅបំពេញបេសកម្មនៅភាគខាងជើងប្រទេស។ លោកស្រីយីងឡាក់បានអោយមេធាវីខ្លួន ឡើងបង្ហាញមុខតំណាងអោយលោកស្រី នៅគណៈកម្មការប្រយុទ្ធអំពើពុករលួយវិញ។ គណៈកម្មការបានចោទលោកស្រីយីងឡាក់ ពីបទធ្វេសប្រហែលក្នុងកម្មវិធីទិញផលស្រូវឧបត្ថម្ភកសិករ។ រឿងនេះអាចអោយនាយករដ្ឋមន្ត្រីថៃ ធ្លាក់ពីតំណែងបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
នៅប្រទេសថៃ ថ្ងៃព្រហស្បតិ៍នេះ នាយករដ្ឋមន្ត្រីយីងឡាក់ បានចុះទៅបំពេញបេសកម្មការងារនៅភាគខាងជើង គេចផុតពីការបង្ហាញខ្លួនតាមការកោះហៅរបស់គណៈកម្មការប្រយុទ្ធអំពើពុករលួយថៃ។ លោកស្រីយីងឡាក់នឹងស្ថិតនៅច្រើនថ្ងៃ បំពេញការងាររដ្ឋនៅទីនោះ។ គណៈកម្មការប្រយុទ្ធអំពើពុករលួយបានចោទលោកស្រី យីងឡាក់ ពីបទធ្វេសប្រហែស មិនអើពើក្នុងកិច្ចការទិញផលស្រូវជួយកសិករ។
គួររំលឹកថា ការទិញផលស្រូវជួយកសិករដោយអោយថ្លៃ៥០ភាគរយលើសថ្លៃលក់ក្នុងទីផ្សារ បានជួយអោយនាយករដ្ឋមន្ត្រីថៃ ឈ្នះឆ្នោត កាលពីឆ្នាំ២០១១។ ប៉ុន្តែ ចាប់ពីចុងឆ្នាំ២០១៣មក រដ្ឋាភិបាលមិនទាន់បានបង់ប្រាក់អោយកសិករនៅឡើយទេ ធ្វើអោយពួកគេឡើងមកតវ៉ា នៅក្រុងបាងកក ជាមួយក្រុមបាតុករប្រឆាំងលោកស្រី យីងឡាក់ ផ្សេងទៀតដែរ។ ក្រុមប្រឆាំងថៃចោទនាយករដ្ឋមន្ត្រីថា រឿងទិញផលស្រូវកសិករនេះ បានជំរុញអោយអំពើពុករលួយកើនឡើង បំផ្លាញថវិការរដ្ឋរាប់ពាន់លានដុល្លារ ហើយថៃបានបាត់ឈ្មោះជាប្រទេសនាំអង្ករចេញទី១ ក្នុងពិភពលោកទៀតផង។ ប្រសិនបើលោកស្រីយីងឡាក់ជាប់ពិរុទ្ធក្នុងរឿងនេះ ព្រឹទ្ធសភាថៃអាចនឹងហាមឃាត់លោកស្រីមិនអោយធ្វើនយោបាយ រយៈពេល៥ឆ្នាំ។
នៅថ្ងៃពុធនេះ នាយករដ្ឋមន្ត្រីថៃដែលធ្លាប់បានប្រាប់ថា ចូលរួមសហការរឿងនេះ បានអោយមេធាវីច្រើនរូប តំណាងរូបលោកស្រី ឡើងទៅតាមការកោះហៅរបស់គណៈកម្មការប្រយុទ្ធអំពើពុករលួយ។ នៅពេលនេះ មិនដឹងថា តើគណៈកម្មការត្រូវចំណាយពេលប៉ុន្មានទៀត ដើម្បីចេញសេចក្តីវិនិច្ឆ័យលើសំណុំរឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ