តុលាការព្រហ្មទណ្ឌថៃ បដិសេធមិនជំនុំជម្រះលោកអាភីស៊ីត និងលោកស៊ូថេប
ចុះផ្សាយនៅថ្ងៃ៖
ស្តាប់ - ០៥:៤០
តុលាការព្រហ្មទណ្ឌថៃ នៅថ្ងៃព្រហស្បតិ៍ទី ២៨ សីហា បានសម្រេចមិនជំនុំជម្រះលើពាក្យបណ្តឹង ដែលលោកអាភីស៊ីត វីចាជីវ៉ា និង លោកស៊ូថេប ថងស៊ូបាន ត្រូវបានចោទប្រកាន់ពី បទឧក្រិដ្ឋកម្មបញ្ជាឲ្យមានការបង្រ្កាបបង្ហូរឈាមទៅលើបាតុករក្រុមអាវក្រហម ដែលបានសម្លាប់ មនុស្ស៩០នាក់ កាលពីឆ្នាំ ២០១០។
សេចក្តីសម្រេចរបស់តុលាការព្រហ្មទណ្ឌនៅថ្ងៃនេះ អាចជាជោគជ័យមួយតាមផ្លូវតុលាការរបស់អាភីស៊ីត និងលោកស៊ូថេប ព្រោះថា តុលាការបាងកកបានសម្រេចមិនចាត់ការពាក្យបណ្តឹង ដែលនៅក្នុងនោះ ព្រះរាជអាជ្ញាបានចោទលោកអាភីស៊ីត និងលោកស៊ូថេប ថាបានបញ្ជាឲ្យទាហានបង្រ្កាបយ៉ាងហិង្សា ទៅលើបាតុករអាវក្រហម រហូតបណ្តាលឲ្យមានមនុស្សស្លាប់ ៩០នាក់ និងរបួសជាច្រើនរយនាក់ នៅក្នុងបាតុកម្មប្រឆាំងរដ្ឋាភិបាលលោកអាភីស៊ីត កាលពីឆ្នាំ២០១០។
ប៉ុន្តែ ការសម្រេចរបស់តុលាការព្រហ្មទណ្ឌថៃនៅព្រឹកមិញនេះ មិនមែនមានន័យថា លោកអាភីស៊ីត និងលោកស៊ូថេបរួចខ្លួននោះទេ។ តុលាការព្រហ្មទណ្ឌថៃ បានប្រកាសថា ខ្លួនមិនជំនុំជម្រះ ព្រោះដោយសារតែខ្លួនគ្មានយុត្តាធិការ ពោលគឺគ្មានសមត្ថកិច្ចដើម្បីចាត់ការសំណុំរឿងដែលមានលោកអាភីស៊ីត និងលោកស៊ូថេបជាជនត្រូវគេចោទប្រកាន់។
តាមតុលាការព្រហ្មទណ្ឌថៃ វាជារឿងពិតដែលជនត្រូវចោទប្រកាន់ទាំងពីរ ពិតជាបានបញ្ជាឲ្យទាហានបង្រ្កាបទៅលើក្រុមបាតុករអាវក្រហម និងបានអនុញ្ញាតឲ្យពួកគេប្រើគ្រាប់កាំភ្លើងពិត សម្លាប់មនុស្សមែន កាលពីអំឡុងបាតុកម្មរបស់ក្រុមអាវក្រហមនៅទីក្រុងបាងកក។ ប៉ុន្តែ តាមចៅក្រមតុលាការព្រហ្មទណ្ឌ លោកអាភីស៊ីត និងលោកស៊ូថេប បានបញ្ជាយ៉ាងដូច្នេះ នៅក្នុងពេលពួកគេកំពុងកាន់តំណែងជានាយករដ្ឋមន្ត្រី និងជាឧបនាយករដ្ឋមន្រ្តី។ អតីតមេដឹកនាំថៃទាំងពីរអាចប្រព្រឹត្តបទឧក្រិដ្ឋតាមការចោទប្រកាន់ ប៉ុន្តែ ដោយសារពួកគេអនុវត្តតាមតួនាទីរបស់ពួកគេ នៅក្នុងពេលប្រទេសស្ថិតនៅក្នុងស្ថានភាពប្រកាសអាសន្ន ដូច្នេះ តុលាការព្រហ្មទណ្ឌថៃ គ្មានសមត្ថកិច្ចដើម្បីជំនុំជម្រះពួកគេទេ។ តាមក្រុមចៅក្រហមថៃ គឺមានតែតុលាការកំពូលថៃទេ ដែលមានយុត្តាធិការគ្រប់គ្រាន់ដើម្បីជំនុំជម្រះលោកអាភីស៊ីត និងលោកស៊ូថេប។
តាមកាសែតក្នុងស្រុកថៃ អង្គភាពប្រឆាំងអំពើពុករលួយដែលកំពុងសិក្សាលើសំណុំរឿងចោទ ប្រកាន់ទៅលើលោកអាភីស៊ីត និងលោកស៊ូថេប នឹងអាចសម្រេចបញ្ជូនពាក្យបណ្តឹងនេះជាបន្ត ទៅតុលាការកំពូល។
ពាក្យបណ្តឹងប្តឹងលោកអាភីស៊ីត និងលោកស៊ូថេប ធ្វើឡើងនៅក្នុងអាណត្តិដឹកនាំប្រទេសរបស់លោកស្រីយីងឡាក់ ស៊ីណាវ៉ាត។ នៅក្រោមការដឹកនាំរបស់រដ្ឋាភិបាលអាវក្រហម ពោលគឺកាលពីខែធ្នូ ចុងឆ្នាំ ២០១៣កន្លងទៅ នៅបីឆ្នាំក្រោយការបង្រ្កាប បង្ហូរឈាមទៅលើបាតុករអាវក្រហមនៅឆ្នាំ ២០១០ អង្គភាពស៊ើបអង្កេតពិសេសរបស់ក្រសួងយុត្តិធម៌បានដាក់ពាក្យបណ្តឹងប្តឹងលោកអាភស៊ីត និងលោកស៊ូថេប ពីបទឧក្រិដ្ឋ បញ្ជាឲ្យទាហានប្រើគ្រាប់ពិតបាញ់ទៅលើក្រុមបាតុករអាវក្រហម នៅក្នុងអំឡុងបាតុកម្ម។
នៅខែធ្នូ ឆ្នាំ ២០១៣ នៅក្នុងពេលលោកស៊ូថេបកំពុងដឹកនាំ ក្រុមអាវលឿងធ្វើបាតុកម្មប្រឆាំងរដ្ឋាភិបាលលោកស្រីយីងឡាក់ ព្រះរាជអាជ្ញារបស់តុលាការព្រហ្មទណ្ឌបានសម្រេចចោទប្រកាន់លើលោកស៊ូថេប និងលោកអាភីស៊ីត ដែលបានក្លាយជាប្រធានបក្សប្រឆាំង ពីបទប្រព្រឹត្តឧក្រិដ្ឋកម្ម និងមនុស្សឃាត។ តាមគម្រោង សវនាការជំនុំជម្រះអតីតមេដឹកនាំទាំងពីរត្រូវបើកធ្វើនៅខែមីនា ប៉ុន្តែ គេត្រូវរង់ចាំដល់ខែសីហា (៥ខែក្រោយ) ដើម្បីស្តាប់ចម្លើយរបស់តុលាការព្រហ្មទណ្ឌថៃ ដែលនៅទីបំផុត ប្រកាសថា ខ្លួនគ្មានសមត្ថភាព គ្មានយុត្តាធិការដើម្បីជំនុំជម្រះករណីបណ្តឹងលើលោកអាប់ភីស៊ីត វីចាជីវ៉ា និងលោកស៊ូថេប ថងស៊ូបាន។
មួយវិញទៀត បើទោះបីជាសំណុំរឿងនេះនឹងត្រូវបញ្ជូនទៅតុលាការកំពូល ក៏គេមិនប្រាកដថា លោកអាភីស៊ីត និងលោកស៊ូថេបត្រូវតុលាការបើកសវនាការ ជំនុំជម្រះដាក់ទោសដែរ ពោលគឺដរាបណាដែលកងទ័ពថៃនៅគ្រប់គ្រងប្រទេសថៃនោះ។ នៅក្នុងការបង្រ្កាបបង្ហូរឈាមទៅលើបាតុករអាវក្រហម គឺពួកទាហាន ជាអ្នកបាញ់កាំភ្លើង ប្រើគ្រាប់ពិតសម្លាប់បាតុករ។ បើសិនជាតុលាការកំពូលស៊ើបអង្កេត ស្រាវជ្រាវលើសំណុំរឿងឧក្រិដ្ឋកម្ម របស់លោកអាភីស៊ីត នោះការចូលរួមរបស់កងទ័ព នឹងត្រូវគេសើរើឡើងវិញ។ ការចូលពាក់ព័ន្ធរបស់កងទ័ពនៅក្នុងការបាញ់សម្លាប់បាតុករ មិនមែនជារឿងល្អសម្រាប់ប្រមុខយោធាថៃ ដែលបានធ្វើរដ្ឋប្រហារទម្លាក់រដ្ឋាភិបាលស៊ីវិល និងចូលដឹកនាំប្រទេស កាលពីខែឧសភាកន្លងទៅ។
យោធាទំនងអាចនឹងធ្វើឲ្យពាក្យបណ្តឹងប្តឹងលោកអាភីស៊ីត និងលោកស៊ូថេប ត្រូវបិទខ្ទប់ កកស្ទះ មិនចាត់ការនៅតុលាការ។ វាជារឿងមួយដែលងាយស្រួលធ្វើ ព្រោះថា កងទ័ពថៃ និងស្ថាប័នតុលាការកំពូលស្ថិតនៅក្រុមបក្សតែមួយជាមួយគ្នា គាំទ្រព្រះមហាក្សត្រ ពោលគឺជាក្រុមដែលប្រឆាំងមិនចង់ឲ្យគណបក្សលោកថាក់ស៊ីន គាំទ្រដោយក្រុមអាវក្រហមឡើងកាន់អំណាចនៅក្នុងប្រទេសថៃ។ ចង់ ឬមិនចង់ ដោយសារតែការប្រជែង ឈ្លោះដណ្តើមឥទ្ធិពលអំណាចរវាងមេដឹកនាំ យុត្តិធម៌សម្រាប់ប្រជាជនថ្នាក់ក្រោមត្រូវគេជាន់ឈ្លីចោល មិនអើពើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ