ការបង្ហោះយានអវកាសទៅកាន់ផ្កាយរណបធម្មជាតិ ឈ្មោះ Phobos
គឺកណ្តាលអធ្រាត្រយប់មិញ ដែលរុស្ស៊ីបានបង្ហោះចេញទៅនូវយានអវកាសខ្លួន ទម្រង់ជា Satellite ឈ្មោះ “ដី Phobos” ដើម្បីទៅជីកយកដីពីផ្កាយរណបធម្មជាតិរបស់ភពផ្កាយអង្គារ (Mars) ដែលមានឈ្មោះថា Phobos ស្ថិតនៅចម្ងាយ ៣៣០លានគ.ម. ពីផែនដី។ ការបង្ហោះបែបនេះ ត្រូវរុស្ស៊ីធ្វើឡើងវិញ ក្រោយពីអាក់ខានអស់១៥ឆ្នាំមក។ គោលដៅ គឺ តាមរយៈដីរបស់ផ្កាយPhobos សិក្សាអំពីដើមកំណើតនៃ “ប្រព័ន្ធសុរិយគតិ”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ជាបឋម គួរនិយាយថា បើព្រះចន្ទដែលជាផ្កាយរណបធម្មជាតិរបស់ផែនដី ស្ថិតនៅចម្ងាយដល់ទៅជិត៤សែនគ.ម.ពីផែនដី នោះផ្កាយរណបធម្មជាតិរបស់ភពផ្កាយអង្គារ ដែលមានឈ្មោះថា Phobos ប្រែមកថា “ការភ័យខ្លាច” គឺស្ថិតនៅចម្ងាយតែ៩.៤០០គ.ម.ពីភពផ្កាយអង្គារ។ បើវិជ្ឈមាត្រមធ្យមរបស់ព្រះចន្ទ គឺប្រវែង៣.៥០០គ.ម. នោះវិជ្ឈមាត្រ Phobos គឺតែ២៦គ.ម.ប៉ុណ្ណោះ។
ការបង្ហោះថ្ងៃនេះ នៅមិនទាន់សម្រេចដូចចិត្តទេ ដោយមកពីយានអវកាសទម្រង់ជា Satellite ឈ្មោះ ”ដីPhobos” មិនទាន់ស្ទុះចេញផុតពីតារាវិថីជុំវិញផែនដី ដើម្បីហោះតម្រង់តែម្តងទៅកាន់ផ្កាយរណបធម្មជាតិរបស់ភពផ្កាយអង្គារឈ្មោះ Phobos ដែលស្ថិតនៅចម្ងាយ ៣៣០លានគ.ម. ពីផែនដី ដោយត្រូវចំណាយពេលអស់១១ខែ។
មូលហេតុ តាមការពន្យល់បំភ្លឺ នៃប្រធានទីភ្នាក់ងារអវកាសរុស្ស៊ី RosKosmos លោក Vladimir Popovkin គឺមកពីម៉ាស៊ីនទី១ និងទី២ ខាងច្រានល្បឿន Satelliteនោះ ឲ្យចេញផុតពីតារាវិថី ជុំវិញផែនដី ស្រាប់តែមិនដើរដូចចិត្ត។ ប៉ុន្តែតាមសំដីគាត់ ការនេះមិនមែនមានន័យជាបរាជ័យទេ ដ្បិតពួកអ្នកឯកទេសស្ថាប័នគាត់មានរយៈពេល៣ថ្ងៃ សម្រាប់ស្តារឡើងវិញកម្មវិធីហោះហើរនោះ ទាន់ប្លុកAccuថាមពលរបស់វានៅដើរនៅឡើយ។
ពុំនោះសោតទេ គឺច្បាស់ជាចោលលុយហើយ ពីព្រោះបានចំណាយអស់ប្រមាណ ១៧០លានដុល្លារឯណោះ សម្រាប់សមិទ្ធិការពិសោធន៍ ដែលត្រូវស៊ីពេលសរុបទៅអស់ ៣៤ខែ គឺដើម្បីហោះទៅ បន្ទាប់មកជីកយកដីពីផ្ទៃផ្កាយ Phobos ជាផ្កាយរណបធម្មជាតិរបស់ភពផ្កាយអង្គារ ហើយនៅទីបំផុតហោះត្រឡប់មកផែនដី ដោយផ្ទុកមកជាមួយគឺដីរបស់ផ្កាយ Phobos ក្នុងឋានៈជាធាតុដើមដំបូងបង្អស់នៃ”ប្រព័ន្ធសុរិយគតិ” និងបំភ្លឺឲ្យដឹងអំពី ដើមកំណើតនៃផ្កាយរណបធម្មជាតិរបស់ភពផ្សេងៗទៀត។
ជំនាន់សហភាពសូវៀត រុស្ស៊ីបានបង្ហោះ Satelliteខ្លួន ចំនួន១៦លើក ទៅកាន់ភពផ្កាយអង្គារ ពីក្នុងនោះ១១លើកបានចប់ទៅដោយបរាជ័យទាំងស្រុង ហើយតែ៥លើកប៉ុណ្ណោះ ដែលត្រូវបានទទួលស្គាល់ថាប្រកបដោយជោគជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ