ពលរដ្ឋជាង៣ពាន់គ្រួសារកំពុងជួបគ្រោះរាំងស្ងួត នៅខេត្តបន្ទាយមានជ័យ
មានពលរដ្ឋជាង៣ពាន់គ្រួសារ រស់នៅក្នុងភូមិចំនួន១០ ក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ កំពុងតែប្រឈមនឹងគ្រោះរាំងស្ងួត អត់មានទឹកប្រើប្រាស់គ្រប់គ្រាន់ តាំងពីខែវិច្ឆិកា ចុងឆ្នាំ២០១៥មក។ គ្រោះរាំងស្ងួតនេះ បណ្តាលមកពីគ្មានភ្លៀងធ្លាក់គ្រប់គ្រាន់ បឹងត្រពាំងរីងទឹកអស់ ដីស្ងួតហែង ហើយពលរដ្ឋ ក៏មិនអាចជីកអណ្តូងយកទឹកមកប្រើប្រាស់បានទៀត។ យ៉ាងណាមិញ កាលពីចុងសប្តាហ៍កន្លងទៅ ស្នងការនគរបាលខេត្ត បានដឹកទឹកប្រមាណជា៦ម៉ឺនលីត្រ យកទៅចែកចាយដល់ប្រជាពលរដ្ឋ ដែលខ្វះខាតធ្ងន់ធ្ងរ មានចំនួន១ពាន់២រយគ្រួសារ តាមភូមិចំនួន៤ ក្នុងឃុំស្លក្រាមនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្នងការនគរបាលខេត្តបន្ទាយមានជ័យ កាលពីចុងសប្តាហ៍កន្លងទៅ ទើបបានដឹកទឹក ៦ម៉ឺនលីត្រ តាមរថយន្តពន្លត់អគ្គិភ័យ៩គ្រឿង និងរថយន្តផ្សេងទៀត ចំនួន៣គ្រឿង ដើម្បីយកទៅចែកចាយដល់ពលរដ្ឋចំនួន១ពាន់២រយគ្រួសារ នៅតាមភូមិចំនួន៤ និងវត្តចំនួន ៣ ក្នុងឃុំស្លក្រាម ស្រុកស្វាយចេក ខេត្តបន្ទាយមានន័យ។ ៤ភូមិនោះ រួមមាន ភូមិកកោះ ភូមិកំណប់ ខ្លែងពណ៌ខាងជើង និងខ្លែងពណ៌ខាងត្បូង។
ពលរដ្ឋប្រមាណជា៣ពាន់គ្រួសារ ក្នុងឃុំស្លក្រាម កំពុងតែប្រឈមនឹងគ្រោះរាំងស្ងួត គ្មានទឹកប្រើប្រាស់គ្រប់គ្រាន់ តាំងពីខែប្រាំងចុងឆ្នាំ២០១៥មក។ មូលហេតុ គឺដោយសារតែក្នុងឃុំនេះ មិនមានភ្លៀងធ្លាក់សោះ។ ពលរដ្ឋ ក្រៅតែពីគ្មានទឹកបរិភោគ និងប្រើប្រាស់គ្រប់គ្រាន់ ពួកគេក៏មិនអាចធ្វើស្រែចម្ការបាននោះដែរ។ នេះបើតាមការបញ្ជាក់ពីលោកថេត លឿយ មេប៉ុស្តិ៍នគរបាលរដ្ឋបាលឃុំស្លក្រាម។
មេប៉ុស្តិ៍រូបនេះ បានឲ្យដឹងថា ការដឹកទឹកមកជួយពលរដ្ឋដោយផ្ទាល់នេះ គឺព្រោះតែមានការសំណូមពរពីខាងឃុំ ដោយសារពលរដ្ឋពិតជាខ្វះទឹកប្រើប្រាស់ខ្លាំងមែន។ ដោយសារទឹកបឹងត្រពាំង រាំងស្ងួត ហើយសូម្បីតែអណ្តូង ក៏ជីកមិនចេញទឹក ពលរដ្ឋក្នុងភូមិ បានទៅទិញទឹកពីឃុំផ្សេង ដែលមានចម្ងាយឆ្ងាយ ហើយដឹកយកមកផ្ទះ ក្នុងតម្លៃចាប់ពី ១ម៉ឺន៣ពាន់រៀល ដល់១ម៉ឺន៥ពាន់រៀល ក្នុងទឹក១ពាន់លីត្រ។
បើតាមស្នងការខេត្តបន្ទាយមានន័យ យុទ្ធនាការដឹកទឹកចែកអ្នកភូមិ នឹងបន្តធ្វើជាបន្តទៀត ល្គឹកណាភូមិ ឃុំ ដែលខ្វះទឹក ធ្វើការស្នើសុំជាមុន។ សូមបញ្ជាក់ថា នៅក្នុងឃុំស្លក្រាម មានប្រជាជនសរុបជាង១ម៉ឺន៩ពាន់នាក់ ស្មើនឹងជាង៣ពាន់គ្រួសារ រស់នៅក្នុងភូមិចំនួន១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ