រដ្ឋាភិបាលតួកគីដកហូតតំណែងប៉ូលិស៣៥០នាក់ ក្នុងក្របខណ្ឌប្រយុទ្ធអំពើពុករលួយ
ចុះផ្សាយនៅថ្ងៃ៖
ស្តាប់ - ០៥:០២
សារព័ត៌មានតួកគីជាច្រើនបានចុះផ្សាយ នៅថ្ងៃអង្គារនេះថា រដ្ឋាភិបាលតួកគីដឹកនាំដោយនាយករដ្ឋមន្ត្រី រីសេប តៃយីព អ៊ែរដូហ្កាន បានដកហូតតំណែងមន្ត្រីប៉ូលិស៣៥០រូប ក្នុងក្របខណ្ឌទាក់ទងនឹងការប្រឆាំងអំពើពុករលួយ។ ក្នុងចំណោមប៉ូលិសទាំង៣៥០នាក់នេះ គេឃើញមានអ្នកទទួលខុសត្រូវជាច្រើនរូប ធ្លាប់ទទួលបន្ទុកប្រឆាំងបទឧក្រិដ្ឋហិរញ្ញវត្ថុ បច្ចេកវិទ្យាកុំព្យូទ័រ រឺក៏ទទួលបន្ទុកប្រឆាំងអំពើឧក្រិដ្ឋផ្សេងទៀត នៅទីក្រុងអង់ការ៉ាជាដើម។
១-ជាងមួយខែមកនេះ អំពើពុករលួយនៅតែបន្តវាយប្រហារតួកគី។ រដ្ឋមន្ត្រី៣រូប ធ្លាប់បានលាចេញពីតំណែង ដោយសាររឿងអាស្រូវពុករលួយនេះ។ ហើយកន្លងមក ប្រជាជនធ្លាប់ចុះបាតុកម្មបរិហារអំពើពុករលួយច្រើនដងមកហើយ។ ហេតុអ្វីបានជានាយករដ្ឋមន្ត្រី អ៊ែរដូហ្កាន មិនព្រមចុះពីតំណែង?
នៅពេលនេះ លោករីសេប តៃយីព អ៊ែរដូហ្កាន គ្មានជម្រើសអ្វីច្រើនទេ ពិសេសតួកគីត្រូវរៀបចំការបោះឆ្នោតក្រុមប្រឹក្សាក្រុង ក្នុងពេល៣ខែខាងមុខនេះទៀតផង។ ដូច្នេះ បើលោកអ៊ែរដូហ្កាន ចុះពីតំណែងនាយករដ្ឋមន្ត្រី នោះមុខមាត់លោករឹតតែអន់ទៀតទៅហើ់យ។ លោកអ៊ែរដូហ្កានមានតែរុលទៅមុខ ខិតខំបង្ហាញថា លោកនៅតែស្អាតស្អំ ហើយក្នុងនាមជាប្រមុខរដ្ឋាភិបាល លោកនឹងចូលរួមប្រយុទ្ធប្រឆាំងអំពើពុករលួយ ដែលវាយប្រហាររដ្ឋាភិបាលលោក ជាងមួយខែមកនេះ។ ជាក់ស្តែង នៅថ្ងៃនេះ មន្ត្រីប៉ូលិស៣៥០នាក់ ត្រូវបានរដ្ឋាភិបាលដកហូតពីតំណែង។ រដ្ឋាភិបាលតួកគីធ្លាប់បានដកហូតតំណែងអ្នកដឹកនាំជាន់ខ្ពស់ប៉ូលិសជាង១០នាក់មកហើយដែរ។
សូមរំលឹកថា ការផ្ទុះរឿងអាស្រូវពុករលួយដើមឡើយ គឺចេញមកពីយុទ្ធនាការប្រឆាំងអំពើពុករលួយ របស់តុលាការតួកគី ប្រឆាំងនឹងមន្ត្រីរដ្ឋាភិបាល និងអ្នកជិតដិតនាយករដ្ឋមន្ត្រីជាង៥០នាក់។ តុលាការចោទពួកគេពីបទលាងលុយកខ្វក់។ ប្រធានធនាគាររដ្ឋមួយរូប និងកូនប្រុសរបស់រដ្ឋមន្ត្រីសំខាន់ៗ៣រូប ក៏ជាប់ចោទក្នុងការចោទប្រកាន់នេះដែរ ហើយបានត្រូវជាប់ឃុំ។ ដោយសាររឿងអាស្រូវនេះ រដ្ឋមន្ត្រី៣រូបដែលមានកូនប្រុសជាប់ពាក់ព័ន្ធនោះ បានលាលែងពីតំណែង។ នោះគឺរដ្ឋមន្ត្រីក្រសួងមហាផ្ទៃ សេដ្ឋកិច្ច និងបរិស្ថាន។ ក្នុងរឿងអាស្រូវនេះ កូនប្រុសរបស់នាយករដ្ឋមន្ត្រីតួកគីមួយរូប កាន់កាប់មូលនិធិផ្នែកសេវាជួយយុវជននៅតួកគីនោះ ក៏អាចជាប់ពាក់ព័ន្ធផងដែរ។
ប៉ុន្តែ លោកអ៊ែរដូហ្កាននៅតែចចេស ការពារថា លោកជាអ្នកស្អាតស្អំ ហើយនៅតែចោទចលនាអ៊ីស្លាមហ្គូឡេន ថាជាអ្នកផ្តើមអោយមានការស៊ើបអង្កេតប្រឆាំងរដ្ឋាភិបាលលោក។ រឿងអាស្រូវពុករលួយនៅតួកគី គឺស្តែងឡើងពីសង្គ្រាមរវាងរដ្ឋាភិបាលនិងចលនាហ្គូឡេននេះឯង។ ចលនាហ្គូឡេនជាចលនាដ៏ល្បី មានឥទ្ធិពលខ្លាំងក្លាក្នុងស្ថាប័នប៉ូលិសនិងចៅក្រម។ ចលនាហ្គូឡេន ធ្លាប់គាំទ្ររដ្ឋាភិបាលលោកអ៊ែរដូហ្កានដែរ។ ប៉ុន្តែ រយៈពេលចុងក្រោយនេះ ចលនានេះមិនពេញចិត្តការដែលរដ្ឋាភិបាលចង់លុបចោលវិទ្យាស្ថានសិក្សាឯកជននានា ព្រោះថា វិទ្យាស្ថានសិក្សាឯកជនទាំងនេះ ជាប្រភពចំណូលប្រាក់កាសដល់ចលនាហ្គូឡេន។
ដូច្នេះ រឿងអាស្រូវពុករលួយវាជ្រុលក្បាលទៅមុខហើយ។ លោកអ៊ែរដូហ្កានមានតែនៅបន្តកាន់កាប់កៅអីនាយករដ្ឋមន្ត្រី លុះដំណាក់កាលចុងក្រោយតែប៉ុណ្ណោះ ដើម្បីបន្តប្រឆាំងចលនាហ្គូឡេននេះតទៅទៀត។ លោកអ៊ែរដូហ្កានខំស្តារមុខមាត់រដ្ឋាភិបាលនិងបក្សកាន់អំណាចឡើងវិញ។ ជាក់ស្តែង ក្រោយពេលផ្ទុះរឿងអាស្រូវពុករលួយ រដ្ឋាភិបាលបានរុះរើគណៈរដ្ឋមន្ត្រីឡើងវិញ។ លោកអ៊ែរដូហ្កានបានតែងតាំងចៅក្រមថ្មីៗជាច្រើនរូប ដែលលោកទុកចិត្តថា អាចជួយរូបលោកបិទផ្ទប់សំណុំរឿងពុករលួយនេះ។ ការដែលរដ្ឋាភិបាលដកហូតតំណែងប៉ូលិសរាប់រយនាក់ពេលនេះ ក៏ដើម្បីប្រាប់អោយប្រជាជនតួកគីបានដឹងដែរថា បក្សកាន់អំណាចរបស់លោកអ៊ែរដូហ្កាន មិនអត់ឱនដល់អំពើពុករលួយក្នុងប្រទេសនោះឡើយ។ នេះជាយុទ្ធសាស្ត្ររបស់លោកអ៊ែរដូហ្កាន ក្នុងការស្តារមុខមាត់បក្សយុត្តិធម៌និងអភិវឌ្ឍន៍ របស់លោកឡើងវិញ ពិសេសនៅពេលជិតបោះឆ្នោត៣ខែខាងមុខនោះ។ គណបក្សលោកអ៊ែរដូហ្កានពេលនេះ កំពុងតែប្រេះស្រាំ ដោយសារតែការលាលែងពីតំណែងរបស់រដ្ឋមន្ត្រី៣រូប និងតំណាងរាស្ត្រមួយចំនួន ដែលមិនពេញចិត្តនឹងការគ្រប់គ្រងក្នុងបក្ស។ ដូច្នេះ លោកអ៊ែរដូហ្កានត្រូវតែខំបង្រួបបង្រួមបក្ស ស្តារកិត្តិយសបក្ស ឡើងវិញ។
២- តើលោកអ៊ែរដូហ្កានអាចឈ្នះលើចលនាអ៊ីស្លាមហ្គូឡេនម្តេចបានទៅ បើចលនានេះមានឥទ្ធិពលទាំងក្នុងស្ថាប័នយុត្តិធម៌ និងផ្នែកយោធាដែរនោះ ?
នៅពេលនេះ លោកអ៊ែរដូហ្កានមានស្នៀតចុងក្រោយមួយ ដែលគេហៅថា ព្រួញមួយបាញ់បានសត្វពីរ។ ស្នៀតនោះ គឺថា កាលពីថ្ងៃអាទិត្យចុងសប្តាហ៍កន្លងទៅ នាយករដ្ឋមន្ត្រី អ៊ែរដូហ្កានបានប្រកាសត្រៀមអោយតុលាការបើកសវនាការជំនុំជម្រះយោធា៣២៦រូបឡើងវិញ ពីបទធ្លាប់បានចង់ទំលាក់រដ្ឋាភិបាល។ លោកអ៊ែរដូហ្កាននិងបក្សកាន់អំណាចលោក បានយកលេសថា ការដែលតុលាការតួកគីបានចោទប្រកាន់មន្ត្រីយោធាទាំងនេះ គឺជារឿងអយុត្តិធម៌ដែលចលនាហ្គូឡេន បានធ្វើមកលើកងទ័ព និងបក្សពួករបស់ខ្លួន។ ព្រោះថា តុលាការតួកគីក៏ស្ថិតក្រោមឥទ្ធិពលរបស់ចលនាអ៊ីស្លាមហ្គូឡេននេះដែរ។
លោកអ៊ែរដូហ្កានដឹងច្បាស់ណាស់ថា ទាហានតួកគីមានតួនាទីសំខាន់ក្នុងប្រទេស។ កន្លងមក កងទ័ពធ្លាប់ធ្វើរដ្ឋប្រហារ៣ដងមកហើយ ចន្លោះឆ្នាំ១៩៦០និងឆ្នាំ១៩៨០ ហើយធ្លាប់បានទំលាក់រដ្ឋាភិបាល កាលពីឆ្នាំ១៩៩៧។ ដូច្នេះ នាយករដ្ឋមន្ត្រីតួកគី ចង់អោយចលនាហ្គូឡេន ដែលជាសត្រូវរបស់ខ្លួន ក្លាយជាសត្រូវផ្តាច់មុខរបស់កងទ័ពតួកគីដូចគ្នាដែរ។ កងទ័ព និងរដ្ឋាភិបាលតួកគី ដែលមិនសូវជាត្រូវគ្នានោះ ឥលូវនេះមានសត្រូវរួមគ្នាតែមួយ គឺចលនាហ្គូឡេននេះឯង។
ម្យ៉ាងទៀត គួររំលឹកថា រឿងទំនាស់រវាងយោធា និងចលនាហ្គូឡេន ធ្លាប់មានយូរមកហើយ គឺតាំងពីឆ្នាំ១៩៩៩ម្ល៉េះ។ កាលណោះ លោក ហ្វេធុលឡា ហ្គូឡេន ជាមេដឹកនាំចលនាអ៊ីស្លាមហ្គូឡេននេះ ត្រូវបានក្រុមយោធាបង្ខំអោយភៀសខ្លួនទៅក្រៅប្រទេស។ ហើយប៉ុន្មានឆ្នាំក្រោយមក ចៅក្រមតួកគីដែលមានប្រភពចេញពីចលនាអ៊ីស្លាមហ្គូឡេន បានធ្វើការចោទប្រកាន់ទោសលើមន្ត្រីយោធា ដើម្បីសងសឹកវិញ។
ដូច្នេះ ការអូសទាញកងទ័ពអោយប្រឆាំងចលនាហ្គូឡេន ជាមួយខ្លួនដែរនោះ គឺជាយុទ្ធសាស្ត្រចុងក្រោយ របស់នាយករដ្ឋមន្ត្រី តួគកី ដើម្បីអាចចូលប្រឡូកក្នុងឆាកនយោបាយឡើងវិញ ពិសេសនៅពេលតួកគីជិតបោះឆ្នោតខាងមុខទៀតផងនោះ។ វាជាការជួយស្តារមុខមាត់របស់បក្សកាន់អំណាចរបស់លោកអ៊ែរដូហ្កានតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ