តុលាការតួកគីដាក់ពិរុទ្ធប្រឆាំងបាតុករ៣៦នាក់ ពីបទបង្កភេរវកម្ម ក្នុងបាតុកម្មខែមិថុនា ឆ្នាំ២០១៣
នៅថ្ងៃសុក្រនេះ កាសែតតួកគី ហឺរីយេត Hürriyet បានចុះផ្សាយថា តុលាការតួកគីបានដាក់ពិរុទ្ធលើមនុស្ស៣៦នាក់ ពីបទភេរវកម្ម ក្នុងមហាបាតុកម្មខែមិថុនា ឆ្នាំ២០១៣ ប្រឆាំងរដ្ឋាភិបាល។ មហាបាតុកម្មកាលណោះ បានបង្កអោយមានមនុស្សស្លាប់៦នាក់ និងរងរបួស៨ពាន់នាក់។ បាតុករជាប់ចោទទាំងនេះ អាចទទួលទោសជាប់ឃុំពី៣ឆ្នាំ ទៅ៥៨ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
យោងតាមបទចោទប្រកាន់របស់តុលាការតួកគី បាតុករទាំង៣៦នាក់ដែលបានចូលរួមបាតុកម្មប្រឆាំងរដ្ឋាភិបាល កាលពីខែមិថុនាឆ្នាំ២០១៣ នៅប្រទេសតួកគី ជាប់ចោទពីបទឧក្រិដ្ឋ និងបទល្មើសជាច្រើន។ ពួកគេជាប់ចោទថា បានស្ថិតក្នុងអង្គការភេរវកម្ម រហូតដល់ថ្នាក់ថា បានធ្វើការឃោសនាគាំទ្រអំពើភេរវកម្មទៀតផង។ បាតុករជាប់ចោទទាំង៣៦នាក់នេះ អាចទទួលទោសជាប់ឃុំពី៣ឆ្នាំ ទៅ៥៨ឆ្នាំ។
គួររំលឹកថា រឿងរ៉ាវមហាបាតុកម្ម ដើមឡើយ កើតចេញពីចលនាតវ៉ាតូចមួយប៉ុណ្ណោះ។ ចលនាតវ៉ានេះ បានចាប់ផ្តើមនៅថ្ងៃ៣១ឧសភា ឆ្នាំ២០១៣ ដោយក្រុមអ្នកការពារបរិស្ថានមួយចំនួនតូច ដែលបានតវ៉ា ប្រឆាំងនឹងការកំទេចបំបាត់សួនច្បារមួយកន្លែង នៅក្រុងអ៊ីស្តង់ប៊ូល។ ក្រោយមក ចលនាតវ៉ាបានប្រែក្លាយទៅបាតុកម្មនយោបាយ ប្រឆាំងនឹងនាយករដ្ឋមន្ត្រី រីសេប តៃយីព អ៊ែរដូហ្កាន។ បាតុករបានចោទនាយករដ្ឋមន្ត្រីថា បានប្រើអំណាចហួសហេតុ និងចង់ដាក់សង្គមតួកគី ក្រោមគោលការណ៍អ៊ីស្លាមនិយម។
ប៉ូលិសតួកគី បានបង្ក្រាបក្រុមបាតុករ បណ្តាលអោយមានមនុស្ស៦នាក់ស្លាប់ និង៨ពាន់នាក់ទៀតរងរបួស។ មនុស្សរាប់ពាន់នាក់ត្រូវបានចាប់ខ្លួន។ ក្នុងបទចោទប្រកាន់របស់តុលាការ ប្រតិកម្មរបស់បាតុករ ក្នុងបាតុកម្ម កាលពីខែមិថុនានោះ មានលក្ខណៈហួសពីពាក្យថា ប្រតិកម្មបែបប្រជាធិបតេយ្យទៅទៀត។
ទាក់ទងនឹងការចូលរួមបាតុកម្មខែមិថុនាឆ្នាំ ២០១៣ កាលពីខែមុន រដ្ឋអាជ្ញាក្រុងអ៊ីស្តង់ប៊ូល បានបញ្ជូនមនុស្ស២៥៥នាក់ ទៅតុលាការ ក្នុងនោះមាន៧នាក់ជាជនបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ