សហជីពចំនួន២ គ្រោងមនុស្ស១ម៉ឺននាក់ប្រារព្ធទិវាពលកម្មអន្តរជាតិ
រហូតមកទល់ពេលនេះ មានសហជីពពីរក្រុមហើយដែលបានដាក់លិខិតទៅសាលារាជធានី ភ្នំពេញ ដើម្បីស្នើសុំជួបជុំគ្នានិងហែក្បួនដាក់ញត្តិទៅដាក់តាមស្ថានទូតប្រទេសមហាអំណាចនានា។ ពួកគេនឹងទាមទារនូវចំណុចមួយចំនួន ដូចជាការតម្លើងប្រាក់ខែជូនកម្មករ ការរិះគន់លើច្បាប់ ស្តីពីការគ្រប់គ្រងសហជីព ការរកយុត្តិធម៌នៅផ្លូវវែងស្រេង រួមនឹងទាមទារលក្ខខណ្ឌការងារជាច្រើនទៀត។ ក៏ប៉ុន្តែអាជ្ញាធររាជធានីនៅមិនទាន់សម្រេចយ៉ាងណានៅឡើត ដោយរង់ចាំជួបប្រជុំគ្នាជាមុនសិន។
ចុះផ្សាយនៅថ្ងៃ៖
ស្តាប់ - ០២:១៥
ក្រុមសហជីពកម្មករ និងអង្គការក្រៅរដ្ឋាភិបាលនានា នៅក្នុងប្រទេសកម្ពុជា បាននិងកំពុងត្រៀមរៀបចំអបអរទិវាពលកម្មអន្តរជាតិខួបលើកទី១២។ លោក គង់ អាទិត្យ អគ្គលេខា ធិការសហភាពការងារកម្ពុជា ដែលបណ្តុំដោយសហជីពជាច្រើនវិស័យនោះ ប្រាប់វិទ្យុបារាំង RFI នៅថ្ងៃនេះថា ក្រុមការងាររបស់លោក បានដាក់លិខិតជូនដំណឹងទៅសាលារាជធានីហើយកាលពីព្រឹកមិញ ដើម្បីសុំជួបជុំគ្នា នៅថ្ងៃទី១ឧសភាខាងមុខ នៅមុខវត្តបុទុមវតី ដោយមានការចូលរួមពីសហជីពកម្មករចំនួន៧ពាន់នាក់។
លោក គង់ អាទិត្យ បញ្ជាក់ដែរថា ពួកគេនឹងដង្ហែរញត្តិដែលជាការទាមទារចំនួន ១៧ចំណុចក្នុងនោះ មានបញ្ហាសំខាន់ៗ ដូចជាបន្តទាមទារប្រាក់ឈ្នួលអប្បបរមាដែលកម្មករអាចរស់បានចំនួន ១៧៧ដុល្លារ ក្នុងមួយខែ។ ស្នើបញ្ឈប់ការប៉ុនប៉ងបង្កើតច្បាប់ដែលមានការដាក់ទោសទៅលើសហជីព និងសុំឲ្យមានតុលាការការងារ ព្រមទាំងជម្រុញឲ្យអាជ្ញាធររកយុត្តិធម៌ដល់កម្មករដែលរងគ្រោះនៅផ្លូវវែងស្រេង លុបបំបាត់កិច្ចសន្យាខ្លី និងចំណុចជាច្រើនទៀតដែលទាក់ទងទៅនឹងលក្ខខណ្ឌការងារ។
ជាមួយគ្នានេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានប្រាប់ឲ្យដឹងដែរថាលោកក៏ត្រៀមកម្លាំងកម្មករប្រារព្ធពិធីបុណ្យការងារអន្តរជាតិ ១ឧសភាដែរ នៅទីលានប្រជាធិបតេយ្យ ដោយមានអ្នកចូលរួមប្រមាណ ៣០០០នាក់ តែមិនបានធ្វើរួមគ្នាជាមួយ សហភាពការងាររបស់លោក អាត់ ធន់ទេ។
លោកប៉ាវ ស៊ីណា បានដាក់លិខិតសុំជួបជុំនិងដង្ហែរក្បួន ចាប់តាំងពីមុនបុណ្យចូលឆ្នាំខ្មែរ មកម្ល៉េះ ហើយខ្លឹមសារនិង គោលការណ៍ទាមទារស្រដៀងគ្នាដែរ ដូចជាការស្នើសុំតម្លើងប្រាក់ឈ្នួលដោយមិនកំណត់តួលេខ សុំទំលាក់បទចោទប្រកាន់ទៅលើសកម្មជនសហជីពដែលមានការប្តឹងផ្តល់កន្លងមក និងស្នើសុំការជជែកពីច្បាប់សហជីពឡើងវិញជាដើម។ ពួកគេនឹងដើរដាក់ញត្តិនៅតាមស្ថានទូតសហភាពអឺរ៉ុប និងសហរដ្ឋអាមេរិកផងដែរ មុននឹងឆ្ពោះទៅបញ្ចប់ចុងក្រោយនៅរដ្ឋសភាជាតិ។
ទាក់ទងទៅនឹងលិខិតស្នើសុំរបស់អ្នកសហជីពទាំងពីរក្រុមខាងលើនេះ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មិនទាន់សម្រេចធ្វើអត្ថាធិប្បាយយ៉ាងណាទេ ដោយរង់ចាំអញ្ជើញ មេដឹកនាំសហជីពដែលស្នើសុំទៅជជែកគ្នាសិន ដែលនឹងធ្វើឡើងនៅពេលខាងមុខនេះ។
ជាការកត់សម្គាល់សាលារាជធានីមិនដែលអនុញ្ញាតទេ ប្រសិនបើមានការសុំហែក្បួនដោយលើកឡើងថា ប៉ះពាល់ដល់សណ្តាប់ធ្នាប់ និងចរាចរណ៍តាមដងផ្លូវ។ ទោះយ៉ាងនេះក្តីមេដឹកនាំសហជីព បានអះអាងមុនហើយថា ទោះជាអនុញ្ញាតឬមិនអនុញ្ញាតក៏ពួកគេនៅតែបន្តហែរញត្តិតាមដងផ្លូវដូចការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ