គណបក្សប្រជាជន និងសង្គ្រោះជាតិ ចាប់ផ្តើមដំណើរការតាក់តែងច្បាប់ជួលផ្ទះ
គណបក្សប្រជាជនកម្ពុជា និងគណបក្សសង្គ្រោះជាតិ បានបង្កើតគណៈកម្មការរៀងៗខ្លួនរួចហើយ ដើម្បីដំណើរការតាក់តែងសេចក្តីស្នើច្បាប់ ជួលផ្ទះ សំដៅការពារអ្នកជួល និងម្ចាស់ផ្ទះ កុំឲ្យឡើងថ្លៃស្រេចតែនឹងចិត្ត។ ដំណើរការតាក់តែងសេចក្តីស្នើច្បាប់ថ្មីនេះ បានធ្វើឡើង ស្របតាមកិច្ចព្រមព្រៀងរវាងប្រមុខដឹកនាំគណបក្សជាប់ឆ្នោតទាំងពីរ។
ចុះផ្សាយនៅថ្ងៃ៖
ស្តាប់ - ០២:២៤
ដំបូងនេះ ជាក្រុមការងារពីរផ្សេងគ្នា។ នោះគឺគណបក្សសង្គ្រោះជាតិ បានបង្កើតគណៈកម្មការមួយ ដឹកនាំដោយលោកស្រីកែ សុវណ្ណរតន៍ ចូលរួមដោយអ្នកតំណាងរាស្ត្រ ជាប្រធាន និងអនុប្រធានគណៈកម្មការរដ្ឋសភា។ គណៈកម្មការរបស់គណបក្សសង្គ្រោះជាតិ បង្កើតឡើង ដើម្បីដឹកនាំកិច្ចការផ្ទៃក្នុង សិក្សាតាក់តែងសេចក្តីស្នើច្បាប់ ស្តីពី ការជួលផ្ទះ។
លោកស្រីតំណាងរាស្ត្រកែ សុវណ្ណរតន៍ បានឲ្យដឹងថា នៅសប្តាហ៍ក្រោយ លោកស្រី នឹងដឹកនាំប្រជុំគណៈកម្មការថ្មីនោះ ដើម្បីពិនិត្យលើការតាក់តែងសេចក្តីស្នើច្បាប់ជួលផ្ទះ។ ច្បាប់ជួលផ្ទះ ដែលលោកស្រី កែ សុវណ្ណរតន៍ លើកឡើងថា នឹងត្រូវសិក្សាពីបទពិសោធន៍ប្រទេសនានា ដូចជា ប្រទេសបារាំង ជាដើម ដែលគេធ្វើបានជោគជ័យ ក្នុងកិច្ចការការពារផលប្រយោជន៍របស់អ្នកជួល និងការពារផលប្រយោជន៍របស់ម្ចាស់ផ្ទះ។
តាមលោកស្រីកែ សុវណ្ណរតន៍ នៅពេលក្រុមការងារគណបក្សសង្គ្រោះជាតិ និងគណបក្សប្រជាជនកម្ពុជា ពិនិត្យសិក្សាលើសេចក្តីស្នើច្បាប់ស្តីពីការជួលផ្ទះ រៀងៗខ្លួនរួចហើយ ទើបគណៈកម្មការទាំងពីរ ជួបជជែក តាក់តែងសេចក្តីស្នើច្បាប់រួមគ្នា។ ដោយឡែកក្រុមការងារគណបក្សប្រជាជនកម្ពុជា ដើម្បីពិនិត្យតាក់តែងសេចក្តីស្នើច្បាប់ស្តីពីការជួលផ្ទះ ដឹកនាំដោយលោក ប៉ែន បញ្ញា អ្នកតំណាងរាស្ត្រ និងជាប្រធានគណៈកម្មការនីតិកម្ម និងយុត្តិធម៌ ឬគណៈកម្មការទី៦ នៃរដ្ឋសភា។
ដំណើរការរបស់ក្រុមការងារគណបក្សទាំងពីរ លើការតាក់តែងសេចក្តីស្នើច្បាប់ ផ្ទះជួល នៅពេលនេះ បានធ្វើឡើងភ្លាមៗ បន្ទាប់ពីលោកនាយករដ្ឋមន្ត្រីហ៊ុន សែន កាលពីថ្ងៃទី១០ ខែកុម្ភៈ បានប្រកាសពីការព្រមព្រៀងរវាងលោក និងលោកសម រង្ស៊ី ដើម្បីឲ្យក្រុមការងារគណបក្សទាំងពីរ តាក់តែងសេចក្តីស្នើច្បាប់ថ្មីមួយ ស្តីពី ការជួលផ្ទះ ក្នុងបំណងការពារផលប្រយោជន៍ទាំងអ្នកជួល និងទាំងម្ចាស់ផ្ទះជួល ពិសេសកុំឲ្យមានការឡើងថ្លៃផ្ទះជួលដល់កម្មកររោងចក្រ។
ការងារនោះ ក៏ត្រូវបានលោកនាយករដ្ឋមន្ត្រី បញ្ជាឲ្យរដ្ឋមន្ត្រីក្រសួងយុត្តិធម៌ សិក្សាផ្លូវច្បាប់របស់កម្ពុជា។ រហូតដល់ថ្ងៃអាទិត្យនេះ លោកជិន ម៉ាលីន អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានឲ្យដឹងថា ក្រសួងយុត្តិធម៌ បានបង្កើតគណៈកម្មការរួចហើយ ដឹកនាំដោយលោក កើត រិទ្ធ អនុរដ្ឋលេខាធិការក្រសួងយុត្តិធម៌ ដើម្បីចូលរួមជាមួយគណៈកម្មការទី៦ រដ្ឋសភា ក្នុងការពិនិត្យតាក់តែងសេចក្តីស្នើច្បាប់ស្តីពីការជួលផ្ទះ។ ជាសេចក្តីស្នើច្បាប់ ដែលលោកជិន ម៉ាលីន គូសបញ្ជាក់ថា ត្រូវឈរលើគោលការណ៍នីតិរដ្ឋ និងទីផ្សារសេរី ក្នុងបំណងជួយដល់អ្នកជួលផ្ទះ ជាកម្មកររោងចក្រផង និងមិនឲ្យប៉ះពាល់ដល់ប្រយោជន៍ម្ចាស់ផ្ទះជួលនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ