អ៊ុយក្រែនបានឯករាជ្យ២៥ឆ្នាំហើយពីសហភាពសូវៀត
ចុះផ្សាយនៅថ្ងៃ៖
ស្តាប់ - ០៦:១៩
២៥ឆ្នាំមុន ថ្ងៃ២៤សីហាឆ្នាំ១៩៩១ ជាកិត្តិយសដល់ការអនុម័ត ដោយរដ្ឋសភា សាធារណរដ្ឋសង្គមនិយមសូវៀតអ៊ុយក្រែន សេចក្តីប្រកាសស្តីអំពីឯករាជ្យអ៊ុយក្រែន ត្រូវបានចាត់ទុកជា ទិវាកំណើតនៃរដ្ឋអ៊ុយក្រែន ក្នុងទម្រង់បច្ចុប្បន្ន។ ឧទ្ទិសដល់កាលបរិច្ឆេទនេះ បើ ប្រព័ន្ធផ្សព្វផ្សាយបស្ចិមលោក ចងក្រងតួលេខខ្លះ ដែលឆ្លុះឲ្យឃើញពីអ៊ុយក្រែន២៥ឆ្នាំមុន និងអ៊ុយក្រែនសព្វថ្ងៃ នោះ កាណាល់ទូរទស្សន៍រដ្ឋរុស្ស៊ី-ប្រទេសដែលក្លាយទៅជាមើលមុខគ្នាលែងចំជាមួយអ៊ុយក្រែន បានផ្សាយបទយកការណ៍ អំពី ពិធីប្រារព្ធខួបឯករាជ្យនេះ នៅរដ្ឋធានីគៀវ ផ្តោតជាពិសេស ទៅលើផលវិបាកនៃបដិវត្តន៍ពណ៌នៅទីនោះ កាលពី២ឆ្នាំកន្លះមុន។
តើក្នុង២៥ឆ្នាំកន្លងទៅ អ៊ុយក្រែនបានផ្លាស់ប្តូរមុខមាត់ខ្លួនយ៉ាងណាដែរ? ប្រព័ន្ធ ផ្សព្វផ្សាយអង់គ្លេស BBCលើកយកតួលេខធំៗជាគោល មករំលេចឲ្យឃើញដូចតទៅ ៖
-ជាបឋម តួលេខម៉ាក្រូសេដ្ឋកិច្ចដ៏សំខាន់ គឺផលិតផលសរុបក្នុងប្រទេស ហៅថា GDP ដែល តាមទិន្នន័យ ផ្តល់ដោយធនាគារពិភពលោកក្នុងឆ្នាំ១៩៩១ គឺ ៧៧.០០០លានដុល្លារ ស្ទុះដល់១៧៦.០០០លានដុល្លារ ក្នុងឆ្នាំ ២០០៩ ហើយធ្លាក់មកនៅ ៧៨.០០០លានដុល្លារ ក្នុង ឆ្នាំ២០១៥។
-ចំនួនបណ្តាជនតាមស្ថិតិរដ្ឋអ៊ុយក្រែនផ្ទាល់ ក្នុងឆ្នាំ១៩៩១ បានមានចំនួនដល់៥២លាននាក់ ស្រាប់តែ ធ្លាក់មកនៅត្រឹម៤៦លាននាក់ ក្នុងឆ្នាំ២០១៥។
-អាយុមធ្យមរបស់ពលរដ្ឋអ៊ុយក្រែន តាមតួលេខធនាគារពិភពលោក ក្នុងឆ្នាំ១៩៩១ គឺ៧០ឆ្នាំ ចុះដល់៥៦ឆ្នាំ ក្នុងឆ្នាំ១៩៩៧ ហើយងើបបានដល់៧១,៣ឆ្នាំ ក្នុងឆ្នាំ២០១៥។
-គ្រោះថ្នាក់ចរាចរណ៍ តាមស្ថិតិរដ្ឋអ៊ុយក្រែន ពីឆ្នាំ១៩៩១ដល់២០១៥ មានចំនួន ១.០៣៥.០០០ករណី បណ្តាលឲ្យស្លាប់អស់ ១៧០.០៦៥នាក់ និងរបួស ១.១៨៥.០០០នាក់។
-ចំនួនអ្នកប្រាជ្ញ តាមស្ថិតិរដ្ឋអ៊ុយក្រែន ក្នុងឆ្នាំ១៩៩១មាន ៣២០.០០០នាក់ ធ្លាក់ចុះដល់ ៨០.០០០នាក់ ក្នុងឆ្នាំ២០១៥។
-វិស័យសុខាភិបាល តាមស្ថិតិរដ្ឋអ៊ុយក្រែន ក្នុងឆ្នាំ១៩៩១ មានមន្ទីរពេទ្យ៤.០០០កន្លែង និង គិលានដ្ឋាន ៧.០០០កន្លែង លុះក្នុងឆ្នាំ២០១៥ នៅសល់តែមន្ទីរពេទ្យ ២.២០០កន្លែង ប៉ុន្តែ ខាងគិលានដ្ឋាន ឡើងដល់១០.០០០កន្លែង។
-ខាងចំនួនគណបក្ស តាមតួលេខក្រសួងយុត្តិធម៌ នៅថ្ងៃ៥វិច្ឆិកា ឆ្នាំ១៩៩០ មានចុះបញ្ជី មុនគេ គឺ “ គណបក្សសាធារណរដ្ឋ “។ បច្ចុប្បន្ន នៅអ៊ុយក្រែន មានចុះបញ្ជីគឺគណបក្សចំនួន ៣៤៩ ដែលពីក្នុងនោះ មាន៣៣ ផ្តិតជាប់ដោយឈ្មោះសម្គាល់ថា ”ប្រជាជន” ឬ“ប្រជាមានិត“។
-អំពីមរតកកុម្មុយនិស្ត៖ ក្នុងរដ្ឋសភាដែលមាន៤៥០អាសនៈ តាមតួលេខគ.ជ.ប. អ៊ុយក្រែន បើក្នុងឆ្នាំ១៩៩១ មានដល់ទៅ ២៥០នាក់ ជាសមាជិក “បក្សកុម្មុយនិស្តអ៊ុយក្រែន” នោះពី មួយនីតិកាលទៅ មួយនីតិកាលថ្មី ចំនួននេះ ចេះតែថយចុះទៅ លុះក្នុងសភាឆ្នាំ២០១២ នៅសល់តែ ២៤នាក់ ហើយក្នុងឆ្នាំ២០១៤ ក្រោយពីមានប្រព្រឹត្តទៅបដិវត្តិពណ៌ បែរមុខទៅរកបស្ចិមលោក អំណាចថ្មីនៅក្រុងគៀវ ហាមមិនឲ្យមាន បក្សកុម្មុយនិស្តដំណើរការទៀតឡើយ។
ថ្លែងថ្ងៃ២៤សីហា នៅរដ្ឋធានីគៀវ ពីលើវេទិកា នៃក្បួនព្យុហយាត្រាយ៉ាងគគ្រឹកគគ្រេង ចូលរួមដោយយោធា ៤.០០០នាក់ ក្នុងឯកសណ្ឋាន តាមបែបបទទាហានអង់គ្លេស និងយានយន្តប្លែកៗ ប្រមាណ២០០ គ្រឿង ជាកិត្តិយសដល់ ខួប២៥ឆ្នាំនៃឯករាជ្យរដ្ឋអ៊ុយក្រែន លោកប្រធានាធិបតី ប៉េត្រូ ប៉ូរ៉ូឆេនកូ គូសបញ្ជាក់ថារដ្ឋអ៊ុយក្រែន មានឯករាជ្យមែនពិត គឺទើប២ឆ្នាំកន្លះចុងក្រោយ រាប់ពីថ្ងៃ២២កុម្ភៈ ឆ្នាំ២០១៤មក កាលដែលបដិវត្តន៍ក្រោមឈ្មោះថា បដិវត្តន៍ប្រកបដោយគុណូបការ សម្រេចបានដូចចិត្តមែន។ លោក ប៉ូរ៉ូឆេនកូ ថ្លែងយ៉ាងប្តូរប្តេជ្ញ ដោយមិនបញ្ចេញឈ្មោះប្រទេសរុស្ស៊ីឡើយ ថាអ៊ុយក្រែន មានសមត្ថភាពការពារខ្លួនឯង ទោះបីត្រូវប្រឈមមុខទល់នឹង “ ខ្មាំងដែលកាន់កាប់ដីគោកអ៊ុយក្រែនអស់១ភាគ៩ ក្តី”។
ដោយផ្សាយបទយកការណ៍ អំពីព្យុហយាត្រានោះ អ្នកឆ្លើយឆ្លងនៃកាណាល់ទូរទស្សន៍រដ្ឋរុស្ស៊ី លើកយកមកនិយាយគឺលទ្ធផលនៃការស្ទង់មតិ ធ្វើដោយអង្គការសង្គមសាស្ត្រអ៊ុយក្រែនផ្ទាល់ ដែលបង្ហាញថា អ្នកស្រុកអ៊ុយក្រែនជាង៥០% មិនយល់ឡើយ តើគេធ្វើបុណ្យឯករាជ្យអី បើរាល់តែការសម្រេចចិត្តនយោបាយ មិនមែនអារកាត់ នៅក្រុងគៀវឯណា តែគឺនៅក្រុងវ៉ាស៊ីនតោន និងក្រុងព្រុចសែលទេតើ។
ចំណែកការសង្គ្រោះសេដ្ឋកិច្ចអ៊ុយក្រែន ដែលរលំទៅហើយ គឺអាស្រ័យនឹងទឹកចិត្តសប្បុរស ពីខាងបស្ចិមលោកសោះ។ ប៉ុន្តែតាមមើលទៅ អាជ្ញាធរអ៊ុយក្រែនមិនឈឺក្បាល នឹងរឿងនេះឡើយ។
ក្នុងបទយកការណ៍នោះ មានលើកយកមកផ្សាយសម្តីលោក Nicolai Azarov ដែលបានកាន់ តំណែងជាប្រមុខរដ្ឋាភិបាលអ៊ុយក្រែន ពីឆ្នាំ២០១០ ដល់ឆ្នាំ២០១៤ ឆ្នាំដែលគាត់ត្រូវបាន បដិវត្តន៍ពណ៌ ផ្តួលរលំទៅ គឺថា៖ តើពួកអ្នកដឹកនាំសព្វថ្ងៃ គេប្រារព្វបុណ្យអី បើក្នុង២ឆ្នាំកន្លះ ចុងក្រោយ អ៊ុយក្រែនខាងកម្រិតជីវភាពបណ្តាជន គឺធ្លាក់ទៅនៅក្នុងចំណោមប្រទេស ដែល ក្រីក្របំផុតក្នុងលោក។
អ្នកស្រុកមិនមែនរស់នៅទេ តែគឺខំត្រដររស់កុំឲ្យដាច់ខ្យល់ស្លាប់។ ពិតណាស់ ដែលមានមនុស្សប្រមាណ ១៥.០០០-២០.០០០នាក់ នៅក្រុងគៀវ បានទទួលផលពីរដ្ឋប្រហារនោះ តាមផ្លូវលួចប្លន់ទ្រព្យសម្បត្តិបណ្តាជន ហើយបំប៉នខ្ទង់ចំណូលខ្លួន បានយ៉ាងក្រាស់ក្រែល បូកទាំងរូបប្រធានាធិបតី ប៉ូរ៉ូឆេនកូ ដែលគ្រាន់តែក្នុងរយៈពេលជាង២ឆ្នាំកន្លងទៅ បានបង្កើន ប្រាក់ចំណូលខ្លួនដល់ទៅ៧ដង។
តាមទស្សនាវដ្តីអាមេរិកាំង Forbes ដោយសម្បត្តិខ្លួន ក្នុងទឹកប្រាក់ ៨០០លានដុល្លារ លោក ប៉ូរ៉ូឆេនកូ ជាប់ចំណាត់ថ្នាក់ទី៦ ក្នុងតារាងឈ្មោះមហាសេដ្ឋីនៅអ៊ុយក្រែន។
ទូរទស្សន៍រុស្ស៊ី ផ្គើនឲ្យក្រុងគៀវដែលជឿស្លុងតាមពាក្យសន្យាក្តែងៗរបស់សហភាពអឺរ៉ុប ថា នឹងទទួលចំណេញបានក្នុង១ឆ្នាំៗ ដល់ទៅ ៤០០លានអឺរ៉ូ តាមរយៈការនាំចូលដោយសេរីនូវ ទំនិញខ្លួនទៅអឺរ៉ុប ប៉ុន្តែតាមពិតទៅ ការនាំចូលនេះ ត្រូវអឺរ៉ុបរឹតត្បិតក្នុងកូតាជាក់លាក់សោះ គឺថាខាងសាច់ជ្រូកថយចុះអស់២០ដង, ខាងសាច់គោថយចុះអស់២ដងកន្លះ, ខាងស្ករស តែ២០.០០០តោន មិនមែន១.០០០.០០០លានសោះឡើយ។
បទយកការណ៍នោះក៏លើកឡើងសម្តីអ្នកនយោបាយវិទូអ៊ុយក្រែន លោក Volodymyr Skachko ដែលថា៖ អ៊ុយក្រែនសព្វថ្ងៃ មិនអាចរស់បានមួយសប្តាហ៏ទេ បើគ្មានទាយជ្ជទាន បន្តក់ឲ្យដោយ បស្ចិមលោក។ ក្នុងករណី បើគ្រប់តែមេបំណុលទារពីអ៊ុយក្រែនឲ្យសងប្រាក់ដែលអ៊ុយក្រែន ជំពាក់នោះ អ៊ុយក្រែននឹងលែងមានអត្ថិភាព ជាសរីរាង្គឯករាជ្យផ្នែកហិរញ្ញវត្ថុនិងសេដ្ឋកិច្ចភ្លាម។ ដ្បិតបំណុលអ៊ុយក្រែន សរុបទៅ គឹលើសពីរាល់អ្វីៗដែលប្រទេសនេះ អាចលក់ឡាយឡុងនិងរាល់អ្វីៗដែលអ៊ុយក្រែនមាននៅលើទឹកដីខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ