ម៉ូស្គូ និង ប៊ែរឡាំង ឯកភាពគ្នាលើសារសំខាន់ នៃ កិច្ចព្រមព្រៀងក្រុងមិនស្ក៏
ម៉ូស្គូ នឹងបំពេញតាមភាគណា នៃ កិច្ចព្រមព្រៀងក្រុងមិនស្ក៍ដែលខ្លួនត្រូវបំពេញ ដើម្បីដោះស្រាយវិបត្តិនៅអ៊ុយក្រែន - សេចក្តីនេះ ថ្លែងថ្ងៃ១៥សីហាម្សិលមិញ ដោយលោករដ្ឋមន្ត្រីការបរទេសរុស្ស៊ី រួមជាមួយសមភាគីអាល្លឺម៉ង់ នៅឯក្រុងរុស្ស៊ី Ekaterinbourg ចម្ងាយ ប្រមាណ ១.៨០០គ.ម. ខាងកើតពីរដ្ឋធានីម៉ូស្គូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ថ្លែងក្នុងសន្និសីទកាសែតនៅក្រុងនោះ លោកប្រមុខការទូតរុស្ស៊ី Serguei Lavrov លើកឡើងថា ៖
-កិច្ចព្រមព្រៀងក្រុងមិនស្ក៍ ដូចមុនដដែល បន្តស្ថិតនៅជាវិធីតែមួយគត់ដែលអាចមានទៅកើត សម្រាប់ជំនះលើវិបត្តិនៅតំបន់ខាងកើតអ៊ុយក្រែន។ ម៉ូស្គូ នឹងបំពេញតាមភាគណារបស់វា ដែលខ្លួនត្រូវបំពេញ ហើយនឹងអន្ទងថ្នាក់ដឹកនាំនៃតំបន់បះបោរខាងកើតអ៊ុយក្រែន ពោលគឺ សាធារណរដ្ឋប្រជាមានិតស្វ័យប្រកាសដូណេត DNR និងសាធារណរដ្ឋប្រជាមានិតស្វ័យប្រកាសលូហ្កាន់ LNR ឲ្យប្រកាន់យកគោលជំហរស្ថាបនា។ ប៉ុន្តែទាំងដៃគូខាងលិចរបស់យើង គឺក្រុងប៉ារីស និងក្រុងប៊ែរឡាំង ជាហត្ថលេខីធានា នៃកិច្ចព្រមព្រៀងនោះ ក៏ត្រូវប្រើឥទ្ធិពលខ្លួន ជះទៅលើក្រុងគៀវជាផ្លូវការ ឲ្យបំពេញតាម ឯកសារនេះដែរ។
លោករដ្ឋមន្ត្រីការបរទេសអាល្លឺម៉ង់ Frank-Walter Steinmeier ពីចំណែកខ្លួន គូសបញ្ជាក់ថា ៖
-កិច្ចព្រមព្រៀងក្រុងមិនស្ក៍ ជាគន្លឹះនៃអភិក្រម សម្រាប់ដោះស្រាយដោយសន្តិវិធីឲ្យជម្លោះនៅតំបន់ខាងកើតអ៊ុយក្រែន។ ទាំងតទៅថ្ងៃមុខ យើងត្រូវតែបន្តវប្បធម៌សន្ទនា ក្នុងទម្រង់ហ្មត់ចត់ គោរពគ្នា ហើយឈរលើការអនុវត្តន៍ ដែលនាំជាប្រយោជន៍ទៅវិញទៅមក។ ហើយជាបឋម ការសន្ទនានេះ ត្រូវនាំទៅកាន់ការស្វែងរកឲ្យឃើញសេចក្តីសម្រេចជាក់លាក់។
ជាការកត់សម្គាល់ លោកប្រមុខការទូតអាល្លឺម៉ង់ ដែលម្សិលមិញបានអញ្ជើញទៅកាន់ក្រុងរុស្ស៊ី Ekaterinbourg ហៅថាជារដ្ឋធានីតំបន់ភ្នំ Oural នៅចម្ងាយម្តុំ ១.៨០០គ.ម.ខាងកើតពីរដ្ឋធានី ម៉ូស្គូ គឺដើម្បីចូលរួមក្នុងពិធីសម្ពោធ សាលារុស្ស៊ី-អាល្លឺម៉ង់ខាងអនុវត្តវិធីថ្មីសំចៃថាមពល។ ដោយហេតុថា អាល្លឺម៉ង់ ជាក្បាលម៉ាស៊ីនសហភាពអឺរ៉ុប បានជាក្នុងជំនួបនៅទីនោះ ប្រមុខការទូតប្រទេសទាំងពីរ បានពិភាក្សាទាំងអំពីទំនាក់ទំនងរុស្ស៊ី-អឺរ៉ុប។
តាមលោក Steinmeier សហភាពអឺរ៉ុបនិងរុស្ស៊ី ស្រេកឃ្លានចង់ឃើញ វិវឌ្ឍបានប្រសើរឡើង ការចេះយល់គ្នាទៅវិញទៅមក ម៉្លោះហើយបានជាទោះបីស្ថិតនៅពីមុខ គ្រប់តែភាពស្មុគស្មាញក្តី ក៏គូភាគីត្រូវតែប្រើគ្រប់កាណាល់ដែលមានសម្រាប់តាំងទំនាក់ទំនងនឹងគ្នា។
ចំណែក លោក Lavrovថ្លែងថា ការប្រឈមមុខដាក់គ្នា មិនមែនជាជម្រើសរបស់រុស្ស៊ីទេ។ ហើយទោះបី អាក់អន់ចិត្តក្តី ក៏រុស្ស៊ី គ្មានបំណងដកខ្លួន ងឿកងរ ទៅស្ថិតក្នុងភាពឯកោឡើយ ដ្បិតយល់ថា មិនយូរមិនឆាប់ រុស្ស៊ីនិងសហភាពអឺរ៉ុប គង់នឹងស្តារឡើងវិញ យន្តការនៃសហប្រតិបត្តិការនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ