អ៊ុយក្រែន ចោទរុស្ស៊ីថាប្រកាស "ធ្វើសង្គ្រាម" អាមេរិកបង្ខំរុស្ស៊ីឱ្យដកថយ
ចុះផ្សាយនៅថ្ងៃ៖
ស្តាប់ - ០៧:២៨
ការអនុម័តព្រមព្រៀង នៅល្ងាចម្សិលមិញ ឱ្យទាហានរុស្ស៊ី អាចចេញទៅធ្វើអន្តរាគមន៍យោធានៅអ៊ុយក្រែន តាមសំណើរបស់លោក វ្លាដេមៀ ពូទីន ជាប្រធានាធិបតី ត្រូវបានទទួលការថ្កោលទោសពីសំណាក់សហគមន៍អន្តរជាតិ។ មានច្រើនអនេកនិងភ្លាមៗតែម្តង ការថ្កោលទោសរុស្ស៊ី ប៉ុន្តែមើលទៅដូចជាគ្មានឥទ្ធិពល ឬប្រសិទ្ធិភាពអ្វីទាំងអស់ នៅចំពោះមុខបុរសខ្លាំងពូទីន និង សិទ្ធិវេតូ ប្រឆាំងរបស់រុស្ស៊ី ដែលអាចរារះមិនឱ្យក្រុមប្រឹក្សាសន្តិសុខអង្គការសហប្រជាជាតិចេញសេចក្តីសម្រេចចិត្តអ្វីបាន។
ជាមួយនឹងការបរិហារ និងទោះបីមានជំនឿថារុស្ស៊ីមិនបើកប្រតិបត្តិការយោធា នៅគ្រីមេមែន ប៉ុន្តែរដ្ឋាភិបាលក្រុងគៀវ បានទាញសញ្ញាអាសន្នដាក់ទាហានក្នុងស្ថានភាពត្រៀម ប្រមូលទ័ពបំរុងឱ្យចូលជួរ ព្រមទាំងបានសុំជំនួយការពារបូរណភាពដែនដីពីអង្គការអូតង់។ នៅថ្ងៃនេះទៀត រដ្ឋាភិបាលអ៊ុយក្រែន បានប្រកាសបិទដែនអាកាសមិនឱ្យយន្តហោះយោធាហោះហើរទេ ព្រោះយល់ថាសកម្មភាពរបស់ប្រធានាធិបតីរុស្ស៊ីមានលក្ខណៈប្រកាសសង្គ្រាម។
ក្រុមប្រឹក្សាសន្តិសុខបើកប្រជុំបន្ទាន់
នៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ម្សិលមិញនេះ មហាអំណាចលោកខាងលិច និងរុស្ស៊ី បានចោទគ្នាដាក់គ្នាទៅវិញទៅមក ថាបានជ្រៀតជ្រែកកិច្ចការអ៊ុយក្រែន។ ជំនួបប្រជុំបន្ទាន់នេះប្រព្រឹត្តទៅយ៉ាងតឹងសរសៃកបំផុត។ ជាបឋមឡើង ឯកអគ្គរដ្ឋទូតនៃប្រទេសជាសមាជិកក្រុមប្រឹក្សាសន្តិសុខអង្គការសហប្រជាជាតិ ទាំង១៥ បានជួបពិភាក្សាដោយបិទទ្វារ។ តែដោយយោលលើទំហំដ៏ធំធេងនៃវិបត្តិ សហរដ្ឋអាមេរិក អង់គ្លេស និងបារាំង បានទាមទារតវ៉ា ជាមួយនឹងរុស្ស៊ី ជិតពីរម៉ោង ដើម្បីធ្វើយ៉ាងណាឱ្យការប្រជុំនេះមានដំណើរការជាសាធារណៈ ពោលគឺឯកអគ្គរដ្ឋទូតអ៊ុយក្រែន អាចចូលស្តាប់ និងបញ្ចេញសំឡេងបានខ្លះ។
តំណាងអ៊ុយក្រែនបានស្នើសុំអង្គការសហប្រជាជាតិ ឱ្យជួយទប់ស្កាត់ការឈ្លានពានរបស់រុស្ស៊ី។ រុស្ស៊ីដែលក្រោមគំនាប មិនអាចផ្តល់ចម្លើយ និងពន្យល់បំភ្លឺអំពី វត្តមានទាហានរុស្ស៊ីទៅគ្រីមេ ទៅកាន់អង្គប្រជុំទេ។ តែបែរជាចោទប្រកាន់អឺរ៉ុប និងសហរដ្ឋអាមេរិក ថាជាអ្នកទទួលខុសត្រូវរុញច្រាន វិបត្តិ អ៊ុយក្រែនឱ្យធ្លាក់ដល់កំរិតនេះ។ សហរដ្ឋអាមេរិកបានស្នើបញ្ជូនអ្នកសង្កេតការណ៍អង្គការសហប្រជាជាតិទៅគ្រីមេ តែក្រុមប្រឹក្សាមិនបានធ្វើសេចក្តីសម្រេចចិត្តអ្វីឡើយ ដោយហេតុតែមានការគំរាមកំហែងប្រើសិទ្ធិវេតូប្រឆាំងរុស្ស៊ី។
នៅទីបំផុតជំនួបប្រជុំបន្ទាន់គ្មានលទ្ធផល គ្មានចេញជាសេចក្តីថ្លែងការណ៍ សម្រេចចិត្តអ្វីទេ។ សម្រាប់សម្ព័ន្ធមិត្តអ៊ុយក្រែន ការប្រជុំនេះយ៉ាងហោចណាស់ ក៏បានបង្ហាញម៉ូស្គូថាកំពុងស្ថិតនៅឯកា ហើយស្ថានភាពនៅគ្រីមេ មានគេដឹងឮគ្រប់ទិស។
ការសន្ទនាតាមទូរស័ព្ទរវាងលោកអូបាម៉ា និងពូទីន
ការសន្ទនាតាមទូរស័ព្ទរវាងប្រមុខដឹកនាំទាំងពីរនេះ មិនមែនជាការចរចាអ្វីទេ ! ហើយក៏មិនបានធ្វើឱ្យលោកពូទីន ប្តូរផ្លាស់គំនិតអ្វីដែរ ទោះបីលោកអូបាម៉ា បានលើកឡើងអំពីករណីរំលោភច្បាប់ និងកំហុសជាច្រើនចំណុចរបស់រុស្ស៊ីយ៉ាងណាក៏ដោយ។ សម្រាប់លោកពូទីន ទង្វើរបស់រុស្ស៊ីពេលនេះ គឺគ្រាន់តែចង់រក្សាសុវត្ថិភាព សន្តិសុខ ពលរដ្ឋរុស្ស៊ី ប្រជាជនរុស្ស៊ីរស់នៅគ្រីមេ និងផលប្រយោជន៍រុស្ស៊ី ដែលរងការគំរាមកំហែងពីរដ្ឋាភិបាលអ៊ុយក្រែនថ្មី។
ប៉ុន្តែនាឱកាសនោះ លោកអូបាម៉ា បានព្រមានថា អន្តរាគមន៍យោធារុស្ស៊ី នៅអ៊ុយក្រែន គឺពិតជានឹងធ្វើប៉ះពាល់ដល់ទំនាក់ទំនងរុស្សីអាមេរិក ជាក់ជាពុំខាន និងស្នើសុំឱ្យរុស្ស៊ីដកទ័ពចូលមូលដ្ឋានវិញ។ មិនត្រឹមប៉ុណ្ណោះ លោកប្រធានាធិបតីអាមេរិក បានព្រមរុស្ស៊ី ថានឹងអាចជួបភាពឯកាកាន់តែខ្លាំង នៅលើឆាកអន្តរជាតិ ប្រសិនបើនៅតែចចេសធ្វើអន្តរាគមន៍យោធានៅអ៊ុយក្រែន។ ផលវិបាក នយោបាយ សេដ្ឋកិច្ច នឹងតាមក្រោយជាបន្ទាប់ទៅតាមនោះដែរ។ អ្វីដែលច្បាស់ដំបូងគេ គឺអាមេរិក បានសម្រេចផ្អាកមិនចូលរួម ក្នុងជំនួបកំពូលប្រទេសមហាអំណាចទាំង៨ ឬហៅកាត់ថា ហ្សេ៨ នៅក្រុងស៊ុតឈី ខែមិថុនាខាងមុខ។ ក្រោយពីជួបពិភាក្សាជាមួយលោកពូទីន លោកប្រធានាធិបតីអាមេរិក ក៏បានភ្ជាប់ខ្សែពិភាក្សាជាមួយប្រធានាធិបតីបារាំងនិងនាយករដ្ឋមន្ត្រីកាណាដា ដែលទាំងពីរប្រទេសនេះ គំរាមមិនទៅចូលរួមប្រជុំហ្សេ៨ដែរ។
នឹងមានអន្តរាគមន៍យោធារុស្ស៊ីនៅអ៊ុយក្រែន ?
សភារុស្ស៊ីបានអនុម័តឱ្យទាហានអាចចេញធ្វើអន្តរាគមន៍យោធានៅគ្រីមេ មែន ប៉ុន្តែ ទាំងឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ និងទាំងរូបលោកពូទីនផ្ទាល់ក៏បានចេញមុខមកនិយាយយ៉ាងងើយថា ក្នុងនាមជាអគ្គមេបញ្ជាការកងទ័ព លោកពូទីន មិនទាន់បានសម្រេចចិត្ត ថាបញ្ជូនទ័ពទៅគ្រីមេ ឬបញ្ជាប្រយុទ្ធនៅឡើយទេ។ នេះគ្រាន់តែការស្នើសុំ បង្ការប៉ុណ្ណោះ ព្រោះតាមបែបបច្ចេកទេសប្រធានាធិបតីរុស្ស៊ី ដែលជាអគ្គមេបញ្ជាការកងទ័ព ត្រូវសេចក្តីអនុម័តយល់ព្រមពីសភាសិន បន្ទាប់ទើបមានការសម្រេចប្រតិបត្តិ តាមក្រោយដែលជាសិទ្ធិរបស់អគ្គមេបញ្ជាការ។
ចំណែកខាងអាជ្ញាធរអ៊ុយក្រែនផ្ទាល់ ក៏មានជំនឿ និងអារម្មណ៍ថារុស្ស៊ី មិនធ្វើអន្តរាគមន៍យោធា ដែលមានន័យស្មើនឹងបើកធ្វើសង្គ្រាម កាត់ផ្តាច់ទាំងស្រុងទំនាក់ទំនងប្រទេសទាំងពីរនោះដែរ។ នាយករដ្ឋមន្ត្រីអ៊ុយក្រែនបានអះអាងថាបានជួនសន្ទនាជាមួយសមភាគីរុស្ស៊ី លោក ឌីមីទ្រី មេតវេដេវ តាមទូរស័ព្ទ ស្នើសុំរុស្ស៊ីបញ្ជូលទ័ពចូលក្នុងលេនដ្ឋានវិញ។
ប៉ុន្តែការប្រុងប្រយ័ត្នមានឡើងខ្លាំង។ សំណើសុំជំនួយការពារសុវត្ថិភាព និងបូរណភាពដែនដីបានបញ្ជូនទៅអង្គការអូតង់ពិចារណាហើយ។ អូតង់បានកោះហៅសមាជិកទាំង២៨ មកជួបជុំពិភាក្សាគ្នា នៅថ្ងៃអាទិត្យនេះ។ ប្រធានាធិបតីស្តីទីអ៊ុយក្រែន បានប្រកាសដាក់កងទ័ពក្នុងភាពអាសន្នត្រៀមប្រយុទ្ធ ពង្រឹងសុវត្ថិភាពមជ្ឈមណ្ឌលនុយក្លេអ៊ែរ អាកាសយានដ្ឋាន និងតាមចំណុចយុទ្ធសាស្ត្រសំខាន់របស់ប្រទេស។ សម្រាប់អតីតនាយករដ្ឋមន្ត្រីអ៊ុយក្រែន ហ្សូលីយា ទីម៉ូឆេងកូ វិញ បានអំពាវនាវឱ្យមានភាពស្ងប់ស្ងាត់ ដើម្បីកុំឱ្យធ្លាក់ចូលក្នុងអន្ទាក់ឬល្បែងរបស់លោកពូទីន។
ជាល្បែង ព្រោះថាពេលនេះគេមិនដឹងពិតប្រាកដមាននរណានៅគ្រីមេ អ្នកណាជាស៊ីវិល អ្នកណាជាទាហាន កងទ័ពជំនួយមកពីណា ប្រភពព័ត៌មានខ្លះនិយាយថា ៦ពាន់នាក់បញ្ជូនមកពីរុស្ស៊ី ដើម្បីពង្រាយនៅគ្រីមេ តែតាមការពិតទៅនោះក្នុងសភាពធម្មតា រុស្ស៊ីមានវត្តមានទ័ពជិត២ម៉ឺននាក់ឈរជើងនៅគ្រីមេស្រាប់ទៅហើយ គ្រាន់ពេលមុន ពេលចេញដើរហើយ រុស្ស៊ី ប្រាប់អាជ្ញាធរជាមុន។ ការពិតណាស់ ថាជាសភាព្រមឱ្យយោធារុស្ស៊ីចេញធ្វើប្រតិបត្តិការ អ៊ុយក្រែនប្រកាសអាសន្ន ចុះបើសិននេះគ្រាន់តែជាការដាក់គំនាប ឬតេស្ត សាកល្បងលើអ្នកកាន់អំណាចថ្មីនៅក្រុងគៀវ រុញច្រាន ទាហានអ៊ុយក្រែនឱ្យប្រព្រឹត្តកំហុស ? រុស្ស៊ីទំនងកំពុងស្ទង់លោកខាងលិច! ហើយម្យ៉ាងទៀត រុស្ស៊ីពេលនេះមិនទាន់បញ្ចេញកាំភ្លើងធំ រុស្ស៊ីកំពុងស្ថិតក្នុងទម្រង់ជា “ចាំទប់ទល់” នេះបើគេជឿងលើពាក្យអះអាងរបស់លោកពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ