លោកពូទីនទទួលមែន ភ្លើងខៀវពីព្រឹទ្ធសភាឲ្យគាត់ប្រើកងទ័ពរុស្ស៊ី នៅអ៊ុយក្រែន
លោកប្រធានាធិបតីពូទីនចង់បញ្ជូនទ័ពទៅប្រើ នៅសាធារណរដ្ឋស្វយ័តគ្រីមេ នៃដែនដីអ៊ុយក្រែន ជាទីដែល មានជនជាតិរុស្ស៊ី រស់នៅ ក្នុងភាគច្រើនដាច់ខាត ហើយដែលជីវិតគេ ស្ថិតនៅ ក្រោមគំនាប គ្រោះថ្នាក់ខ្លាំងឡើងៗ ពីខាង អាជ្ញាធរថ្មី នៅក្រុងគៀវ ដែលរុស្ស៊ីមិនទទួលស្គាល់។ សំនើរបស់លោកប្រធានាធិបតីពូទីន គឺជាចម្លើយជាក់លាក់ តបនឹងសំណូមពរ អំណាចតំបន់ស្វយ័តនោះ ដែលទទូចឲ្យក្រុងម៉ូស្គូ ជួយពាំនាំសន្តិភាព និងភាពស្ងប់សុខស្រួល ដល់តំបន់នេះវិញ។
ចុះផ្សាយនៅថ្ងៃ៖ កែប្រែថ្ងៃទី៖
ជាការកត់សម្គាល់ ស្របនឹងរដ្ឋធម្មនុញ្ញ ការអនុញ្ញាតិឲ្យប្រើកងទ័ពរុស្ស៊ី នៅបរទេស គឺស្ថិតនៅ ក្នុងសមត្ថកិច្ចនៃសភាជាន់លើ ហៅថា “ក្រុមប្រឹក្សាសហព័ន្ធនៃរដ្ឋសភារុស្ស៊ី “ ពោល គឺព្រឹទ្ធសភា។ ហើយ ការអនុញ្ញាតិនេះត្រូវព្រឹទ្ធសភាអនុម័ត គឺលុះណាតែមានសំនើ ពីខាងប្រធានាធិបតីដែលត្រូវរដ្ឋធម្មនុញ្ញចែងថា ជា អគ្គមេបញ្ជាជាន់ខ្ពស់បំផុតនៃប្រទេស។
ក្នុងពាក្យសុំរបស់លោកប្រធានាធិបតីពូទីន ដាក់ជូនព្រឹទ្ធសភា ប្រកាសដោយវិមានក្រេមឡាំង ល្ងាចថ្ងៃទី១មីនា មានលើកឡើងថា៖ “ដោយមកពីស្ថានការណ៍វិសាមញ្ញកើតឡើង នៅអ៊ុយក្រែន ដែលបង្កើតជាគ្រោះថ្នាក់ដល់ជីវិតប្រជាពលរដ្ឋនៃសហព័ន្ធរុស្ស៊ី ជីវិតជនរួមឈាមរុស្ស៊ី ជីវិតអង្គភាពទ័ពរុស្ស៊ី ដែលស្របនឹង សន្ធិសញ្ញាអន្តជាតិ វត្តមាននៅ តំបន់ស្វយ័តគ្រីមេ នៃរដ្ឋអ៊ុយក្រែន ហើយដោយយោងទៅលើ មាត្រា ទី១០២ នៃរដ្ឋធម្មនុញ្ញ ខ្ញុំសូមសេចក្តីអនុញ្ញាតប្រើកងកម្លាំងប្រដាប់អាវុធរុស្ស៊ី នៅលើ ដែនដីអ៊ុយក្រែន លុះរហូតដល់ស្ថានការណ៍សង្គម-នយោបាយក្នុងប្រទេសនេះ មានប្រក្រតីភាព ស្រួលបួលឡើងវិញ។
គឺយប់មិញតែម្តង ដែលព្រឹទ្ធសភា ក្នុងអង្គប្រជុំជាបន្ទាន់ ដោយសម្លេង ជាឯកច្ឆន្ទ បានអនុម័ត សេចក្តីសម្រេច បើកផ្លូវឲ្យប្រធានាធិបតីរុស្ស៊ី ប្រើកងទ័ពជាតិ នៅក្រៅព្រំដែនរុស្ស៊ី។ ទោះបី លោកស្រីប្រធានព្រឹទ្ធសភា Valentina Matvienko បានប្រកាសថា ឯកសារនេះចូលជាធរមាន ភ្លាមទៅហើយ ក៏អ្នកនាំពាក្យវិមានក្រេមឡាំង ថ្លែងថា លោកពូទីន នៅមិនទាន់អារកាត់ ក្នុងចិត្ត នៅឡើយ តើទ័ពចំនួនប៉ុន្មាន ដែលត្រូវបញ្ជូនទៅ ហើយបញ្ជូនពេលណានោះ ដោយនៅរង់ចាំមើល ដំណើរវិវឌ្ឍនៃស្ថានការណ៍ នៅអ៊ុយក្រែន។
អស់ប៉ុន្មានថ្ងៃមកហើយ បស្ចិមលោកសង្ស័យថា រុស្ស៊ី អាចធ្វើអន្តរាគមន៍យោធា ចូលអ៊ុយក្រែន ក្នុងផ្ទៃនៃសមយុទ្ធកងទ័ពរុស្ស៊ី ដែលឥតប្រកាសឲ្យដឹង ជាមុន នៅលើដែនដី ជិតព្រំដែនអ៊ុយក្រែនផ្ទាល់ តាំងពីថ្ងៃ ២៧ កុម្ភៈមក ហើយដែល នឹង ចប់ នៅថ្ងៃចន្ទ ទី៣មិនា ដោយមាន ដាក់ឲ្យសកម្ម គឺយោធា ១៥០.០០០នាក់, យន្តហោះ ៩០គ្រឿង, ឧទ្ធម្ភាគចក្រ ១២០គ្រឿង រថក្រោះ៨៧០គ្រឿង យានយន្តប្លែកៗ ១.០០០គ្រឿង, និងនាវាចំបាំង ៨០គ្រឿង។ តំបន់គ្រីមេ ជាទីដែលមាន កងនាវារុស្ស៊ីវត្តមាន នៅក្រុងផែ Sebastopol មាត់សមុទ្រខ្មៅ សព្វថ្ងៃរស់នៅ ដោយ បណ្តាជន ២លាន៤សែននាក់ ពីក្នុងនោះ ដល់ទៅ ៦០% ជាជាតិរុស្ស៊ី រីឯ ជាតិអ៊ុយក្រែនផ្ទាល់ មានតែ២៤% ហើយ១២% ជាជាតិ Tatare កាន់សាសនា អ៊ីស្លាម។ ជាតិរុស្ស៊ី មានចំនួន ច្រើនយ៉ាងនេះ ដ្បិត ទឹកដីគ្រីមេ ជាទឹកដីរុស្ស៊ី តាំងពីបុរាណកាល មក ប៉ុន្តែ ៦០ឆ្នាំមុន ក្នុងឆ្នាំ១៩៥៤ មេដឹកនាំសូវៀត ឈ្មោះ Nikita Khroutchev ជាជាតិ អ៊ុយក្រែនស្រាប់ ដោយអត្តនោម័ត បានដកទឹកដីនេះចេញពីរុស្ស៊ី ហើយធ្វើជាកាដូ ទៅឲ្យ អ៊ុយក្រែន តែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ