សកម្មជនសហជីពបន្តរកមធ្យោបាយដើម្បីដោះលែងអ្នកជាប់ឃុំ
សហជីពកាត់ដេរចំនួន៨ និងសហជីពវិស័យផ្សេងៗទៀត នឹងជួបប្រជុំគ្នានៅរសៀលថ្ងៃពុធ ទី១២ កុម្ភៈនេះ ដើម្បីរិះរកមធ្យោបាយ ដើម្បីដាក់សម្ពាធទៅលើរដ្ឋាភិបាល ឲ្យដោះលែងអ្នកជាប់ឃុំចំនួន២១នាក់។ ការជួបជំនុំគ្នានេះបានធ្វើឡើងបន្ទាប់ពីការប៉ុនប៉ងសុំឲ្យសកម្មជននៅក្រៅឃុំកាលពីម្សិលមិញ ត្រូវសាលាឧទ្ធរណ៍ច្រានចោល។ ជាមួយគ្នានេះ ក្រុមអ្នកសហជីពក៏មានគំរោងស្នើទៅសហជីពអន្តរជាតិផងដែរ ដោយភ្ជាប់រឿងនេះទៅនឹងកិច្ចប្រជុំប្រទេសផ្តល់ជំនួយសម្រាប់កម្ពុជា នៅខែមិនាខាងមុខ។
ចុះផ្សាយនៅថ្ងៃ៖
ស្តាប់ - ០២:១២
មេដឹកនាំសហជីពនៃវិស័យកាត់ដេរចំនួន ៨និងសមាគមន៍សហជីពវិស័យផ្សេងៗទៀត នឹងត្រូវបន្តជជែកគ្នានៅមជ្ឈមណ្ឌលអាមេរិកកាំងដើម្បីសាមគ្គីភាពអន្តរជាតិវិស័យការងារនៅរសៀលនេះ ដោយផ្តោត សំខាន់ ទៅលើការរកមធ្យោបាយ និងការតស៊ូមតិ ដើម្បីឲ្យមានដោះលែងនិងលើកលែងការចោទប្រកាន់អ្នកជាប់ឃុំទាំង២៣នាក់។
លោក អាត់ ធន់ ប្រធានសហភាពការងារកម្ពុជាបានថ្លែងថា ពួកគេនឹងជជែកគ្នាពីរបៀបធ្វើមហាកូដកម្ម-បាតុកម្ម ដ៏ខ្លីខាងមុខ។ មួយទៀតគឺកិច្ចសហការជាមួយនឹងសហជីពអន្តរជាតិនិងអ្នកពាក់ព័ន្ធដើម្បីជម្រុញឲ្យអ្នកបញ្ជារទិញដោះស្រាយជាមួយក្រុមហ៊ុន និងរដ្ឋាភិបាលកម្ពុជា។ ហើយចំណុចចុងក្រោយដែលត្រូវជជែកគ្នាដែរគឺការបញ្ចុះបញ្ចូលទៅរដ្ឋាភិបាលដោយ អ្នកសហជីពផ្ទាល់ដើម្បី ឲ្យរដ្ឋាភិបាលដោះស្រាយបញ្ហានេះ។
ជាទូទៅក្រុមមេដឹកនាំសហជីពធ្លាប់បានបង្ហើបខ្លះៗហើយថា រូបភាពនៃការធ្វើកូដកម្ម បាតុកម្មមានបីរបៀប គឺការបង្ហាញវត្តមាននៅក្នុងរោងចក្ររៀងៗខ្លួនអត់ធ្វើការ ទី២ គឺនៅផ្ទះមិនធ្វើការហើយរបៀបទី៣ គឺការហែរក្បួនមកទីក្រុងដើម្បី ជួបប្រជុំគ្នានៅក្រសួងការងារឬក៏នៅរដ្ឋសភាជាតិ។
ជាមួយគ្នានេះ ប្រធានសហភាពការងារកម្ពុជាលោក អាត់ ធន់ បានប្រាប់វិទ្យុបារាំងអន្តរជាតិ RFI ដោយមានជំនឿថា សហជីពអន្តរជាតិ នឹងមានវិធានការភ្ជាប់ករណីនេះជាមួយប្រទេសផ្តល់ជំនួយសម្រាប់ កម្ពុជា ដែលកិច្ចប្រជុំដ៏សំខាន់នេះនឹងត្រូវធ្វើឡើងនៅខែមិនាឆ្នាំ២០១៤ខាងមុខ។
ក្រុមសកម្មជនសហជីពដែលគ្រោងនឹងធ្វើបាតុកម្ម-កូដកម្មទ្រង់ទ្រាយធំ នោះបានអះអាងថា ពួកគេមានសមាជិកប្រហែលជាង ២សែននាក់ រួមទាំងសហជីពវិស័យផ្សេងៗទៀតក្រៅពីកាត់ដេរនឹងចូលរួមជាមួយពួកគេដែរ ដើម្បីទាមទារឲ្យមានការដោះលែងសកម្មជន។
ទោះជាយ៉ាងណាក៏ដោយ ចៅក្រមសាលាឧទ្ធរណ៍កាលពីម្សិលមិញ បានសម្រេចបន្តឃុំខ្លួនអ្នកជាប់ឃុំចំនួន២១នាក់ ជាបន្តទៀតខណៈដែល២នាក់ត្រូវបានដោះលែងនៅក្រៅឃុំ កាលពីប៉ុន្មានថ្ងៃមុន ដោយតុលាការយល់ថា ពួកគេកំពុងស្ថិតនៅក្នុងតំណាក់កាលនៃការស៊ើបអង្កេតរបស់សាលាដំបូង ជាមួយនឹងការចោទពីបទ ប្រើអំពើហឹង្សារ បំផ្លិចបំផ្លាញទ្រព្យសម្បត្តិប្រមាថមន្ត្រីរាជការ និងប៉ះពាល់សណ្តាប់ធ្នាប់សាធារណៈ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ