៤ចំនុចឯកភាពគ្នា តែការតម្លើងប្រាក់ខែនៅជាបញ្ហាចោទក្នុងកិច្ចប្រជុំរវាងក្រុមហ៊ុន និងកម្មករស៊ិនទ្រី
សំរាមដែលកាន់តែស្អុយរលួយទៅៗ ជាង២ពាន់តោន កំពុងតែបន្តរគរចោល នៅតាមផ្លូវនានា នៃទីក្រុងភ្នំពេញ ខណៈ ការចចារវាងតំណាងក្រុមហ៊ុន និងកម្មករប្រមូលសំរាមស៊ិនទ្រីបានបន្ត នារសៀលថ្ងៃអង្គារនេះ ដោយមានអន្តរាគន៍ពីសាលារាជធានីភ្នំពេញ ជាអាជ្ញាកណ្តាល។ ការចចារវាងកម្មករ និងក្រុមហ៊ុនបានធ្វើឡើងម្តងរួចមកហើយ កាលរសៀលថ្ងៃទី៣ ខែកុម្ភៈ ឆ្នាំ២០១៤ តែមិនបានផ្តល់លទ្ធផលអ្វីនោះទេ។ កម្មកររបស់ក្រុមហ៊ុនប្រមូលសំរាមស៊ិនទ្រី តវ៉ាទាមទារតម្លើងប្រាក់ខែគោល១៥០ដុលា្លរ និង អត្ថប្រយោជន៍ផ្សេងៗទៀត សរុបចំនួន៩ចំនុច។ បន្ទាប់ពីកិច្ចប្រជុំ នារសៀលនេះ ភាគីទាំងពីរបានព្រមព្រៀងគ្នាលើ៤ចំនុច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
កិច្ចប្រជុំរវាងតំណាងក្រុមហ៊ុនស៊ិនទ្រី និង តំណាងកម្មករ ដោយមានសាលាក្រុងជាអាជ្ញាកណ្តាលដែលទើបបញ្ចប់ទៅនាល្ងាចថ្ងៃអង្គារនេះ សម្រេចបានផ្លែផ្កាចំនួន៤ចំនុច។
ចំនុចទី១ ក្រុមហ៊ុន បានយល់ព្រមបង្កើតពេទ្យប្រចាំការ អោយបានគ្រប់គ្រាន់សំរាប់កម្មករ។ ចំនែកចំនុចទី២នោះគឺ ក្រុមហ៊ុនបានយល់ព្រមតាមសំនើរបស់កម្មករ មិនកាត់ប្រាក់ថ្លៃកាត់សម្លៀកបំពាក់បុគ្គលិក។ ចំនុចទី៣គឺ ក្រុមហ៊ុននឹងជួយដោះស្រាយក្នុងករណីកម្មករមានគ្រោះថ្នាក់។ ទី៤-ចំពោះការស្នើសុំកាត ក្រុមហ៊ុន ត្រូវរង់ចាំក្រសួងការងារផ្តល់មកក្រុមហ៊ុនជាមុនសិន។
ចំពោះបញ្ហាទាមទារតម្លើងប្រាក់ខែ ភាគីទាំងពីរពុំទាន់រកដំណោះស្រាយចេញនោះទេ ដែលធ្វើអោយកិច្ចប្រជុំនឹងត្រូវធ្វើឡើងម្តងទៀត តែគេមិនទាន់កំណត់កាលបរិច្ឆេទនៅឡើយទេ។
បើទោះបីជាចំនុចផ្សេងទៀតមិនទាន់បានដោះស្រាយរួចរាល់ លោក ប៉ាសុជាតិវង្ស អភិបាលសាលារាជធានីភ្នំពេញ បានសំណូមពរអោយ កម្មករចូលធ្វើការ ចាប់ពីយប់នេះទៅ។ ក្រុមហ៊ុនបានបញ្ជាក់ ចំពោះកម្មករដែលចូលធ្វើការចាប់ពីយប់នេះវិញទៅ នឹងមិនមានការកាត់ប្រាក់ឈ្នួលរយៈពេលប៉ុន្មានថ្ងៃ ធ្វើបាតុកម្មនោះទេ។
ទាក់ទងនឹងការចូលធ្វើការវិញនេះ លោក មុំ សារ៉ន តំណាងកម្មករ មិនទាន់ឆ្លើយយ៉ាងណានៅឡើយទេ ដោយរង់ចាំយកដំណឹងនេះទៅប្រាប់កម្មករ ហើយទុកអោយកម្មករជាអ្នកសម្រេចចិត្ត។
សូមរម្លឹកថា កម្មករក្រុមហ៊ុនស៊ិនទ្រីជាច្រើននាក់ បាននាំគ្នាធ្វើបាតុកម្មនៅស្នាក់ការក្រុមហ៊ុនឋិតក្នុងខណ្ឌដង្កោរ ចាប់តាំងពីល្ងាចថ្ងៃទី0២ ខែកុម្ភៈមកម្ល៉េះ ដោយបានទាមទារលក្ខខណ្ឌចំនួន៩ចំនុច។ ចំនុចទាំង៩ ដែលបានសរសេរដោយដៃនៅលើក្រដាសញត្តិ ចុះថ្ងៃទី០២ ខែកុម្ភៈ ឆ្នាំ ២០១៤ រួមមានដូចជា សុំដំឡើងប្រាក់ខែគោល១៥០ដុល្លារក្នុងមួយខែ សម្រាប់កម្មករ សុំឲ្យមានប្រាក់ទ្រទ្រង់សុខភាព និងស្នាក់នៅ ប្រាក់ធ្វើដំណើរ សុំឲ្យក្រុមហ៊ុនមានពេទ្យប្រចាំការឲ្យបានគ្រប់គ្រាន់ សុំអោយបុគ្គលិក អ្នកបើកបរ និងជាង មានប្រាក់ខែគោល២០០ដុល្លារក្នុងមួយខែ ដោយរក្សាប្រាក់អត្ថប្រយោជន៍ផ្សេងៗជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ