អាមេរិកលង់ខ្លួននឹងបេសកកម្មទ្វេគ្រោះនៅអ៊ីរ៉ាក់
ចុះផ្សាយនៅថ្ងៃ៖
ស្តាប់ - ០៩:០៩
ពួកឧទ្ទាមអ៊ីស្លាមជ្រុលនិយមជីហាត និកាយស៊ុយនីត នៅអ៊ីរ៉ង់ ឬ ក្រុម EIIL បាននិងកំពុង ពង្រឹងទីតាំង និងរុលទៅមុខជានិច្ច ក្នុងភាគខាងលិចប្រទេស និងតំបន់ជាប់ព្រំដែនជាមួយប្រទេសស៊ីរី។ ក្នុងរយៈពេលតែ៤៨ម៉ោងចុងក្រោយនេះ ក្រុងបីថ្មីទៀត បានធ្លាក់ក្នុងកណ្តាប់ដៃពួកជីហាត។ ក្រុមយោធាអ៊ីរ៉ង់ ក៏បានបញ្ជាក់ថាពិតជាបានដកទ័ពថយចេញពីក្រុងទាំងបីនោះ ដោយមូលហេតុតាកទិច មុននឹងសម្រុកចូលទៅវិញ។ បើតាមនាយទាហាន និងក្រុមគ្រូពេទ្យ ពួកឧទ្ទាមអ៊ីស្លាម ទំនងជាបានសម្លាប់អ្នកទទួលត្រូវក្នុងក្រុងនោះ អស់ប្រមាណ២០នាក់។គឺក្នុងបរិបទដ៏ហិង្សានេះ ដែល លោកប្រមុខការទូតអាមេរិក ចនឃែរី បានប្រមូលគ្រប់កម្លាំងដើម្បីដោះស្រាយវិបត្តិ។ តាំងពីថ្ងៃអាទិត្យទី ២២មិថុនា មកលោក ចន ឃែរី បានចេញបំពេញទស្សនកិច្ចនៅតំបន់ដើមបូព៌ា នៅប្រទេសអ៊ីរ៉ាក់ក្នុងថ្ងៃចន្ទនេះ និងបន្ទាប់មកនឹងបន្តដំណើរទៅ កាន់អឺរ៉ុប ដើម្បីបានជួបពិគ្រោះជាមួយប្រទេសជាដៃគូនិងសម្ព័ន្ធមិត្ត។
ក្រុមទាហានរដ្ឋាភិបាលអ៊ីរ៉ាក់ បានទទួលស្គាល់ថា បានដកថយមែន ប៉ុន្តែជាតាកទិចតែប៉ុណ្ណោះ។ ប៉ុន្តែបើស្តាប់មើលទៅគឺមិនដូច្នោះទេ ! នៅថ្ងៃសៅរ៍ ពួកជីហាត បានដណ្តើមគ្រប់គ្រងតំបន់ប៉ុស្តិ៍ត្រួតពិនិត្យព្រំដែនជាមួយស៊ីរី បន្ទាប់មកក៏វាយយកបានក្រុង រ៉ូតបា ចម្ងាយប្រមាណតែ១៥០គីឡូម៉ែត្រពីព្រំប្រទល់ប្រទេសហ្ស័កដានី។ ហើយនៅថ្ងៃអាទិត្យម្សិលមិញ ប៉ុស្តិ៍ព្រំដែនហ្ស័កដានី ក៏យកបាន ក្រុងពីរទៀត ក៏ធ្លាក់ក្នុងកណ្តាប់ដៃពួកជីហាត ពោលគឺតំបន់អាល អាន់បា ភាគខាងលិចប្រទេសទាំងមូលដែលជាតំបន់ប្រមូលផ្តុំដ៏សំខាន់របស់ពលរដ្ឋអ៊ីរ៉ាក់និកាយស៊ុននីតរស់នៅ។
យុទ្ធសាស្ត្ររបស់ពួកជីហាត EIIL
ពួកជីហាតនៅពេលនេះ នៅចម្ងាយប្រមាណតែ៥០គីឡូម៉ែត្រប៉ុណ្ណោះ ពីរដ្ឋធានី ប៉ុន្តែការរុលទៅដណ្តើមយកក្រុងបាតដាដហាក់ដូចជាបន្ថយល្បឿនបន្តិច។ ទំនងដោយបញ្ហាយុទ្ធសាស្ត្រក៏មិនដឹង ជួនកាលពួកជីហាតនេះត្រូវការពង្រឹងមូលដ្ឋានជើងក្រោយឱ្យបានរឹងម៉ាំខ្លាំងសិន។ អ្នកវិភាគខ្លះយល់ថា ពួកជីហាតកំពុងប្រើយុទ្ធសាស្ត្រចង់បង្កើតរដ្ឋអ៊ីស្លាមអ៊ីរ៉ាក់ និងឡឺវ៉ង់ នៅត្រង់ចន្លោះរវាងប្រទេសស៊ីរី និងអ៊ីរ៉ាក់ ឬក៏ចង់ប្រែក្លាយតំបន់ ខាងលិច ប្រទេសដែលមានប្រជាជនភាគច្រើនជានិកាយស៊ុននីត ចាំតំបន់ស្វយ័ត ដូចតំបន់ប៉ែកជើងជារបស់ជនជាតិគួដ។
រដ្ឋាភិបាលបង្រួមបង្រួមជាតិ
លោកចន ឃែរី ចង់ចំណាយពេលមួយសប្តាហ៍នេះ ដើម្បីពិគ្រោះជាមួយប្រទេសជាដៃគូ ប្រទេសជាសម្ព័ន្ធមិត្ត រកដំណោះស្រាយតាមផ្លូវនយោបាយឱ្យវិបត្តិអ៊ីរ៉ាក់។ លោកត្រូវជួបពិភាក្សាជាមួយនាយករដ្ឋមន្ត្រីអ៊ីរ៉ាក់ និងតំណាងរដ្ឋាភិបាលមួយចំនួនទៀត ក្នុងពេលរសៀលនេះ។ ម្យ៉ាងទៀត តំណាងអាមេរិក មកលើកនេះ មកជាមួយនឹងសម្ពាធ ៖ អាមេរិក ចង់បញ្ចុះបញ្ចូលឱ្យនាយករដ្ឋមន្ត្រីអ៊ីរ៉ាក់ នូរី អាល់ម៉ាលិគិ បង្កើតរដ្ឋាភិបាលបង្រួបបង្រួមជាតិ។ ពីព្រោះសហរដ្ឋអាមេរិក តាមរយៈសំឡេងរបស់លោកប្រធានាធិបតី បារ៉ាក់អូបាម៉ា វិបត្តិអ៊ីរ៉ាក់ មិនអាចដោះស្រាយតាមផ្លូវយោធាបានឡើយ !
អាមេរិកមិនមែនជាដើមហេតុនៃវិបត្តិ
ដោយមិនប្រើពាក្យបន្ទោសចំៗ ឬក៏បង្ខំដោយនាយករដ្ឋមន្ត្រីចុះចេញពីតំណែង លោកប្រមុខការទូតអាមេរិក បានបង្ហើរពាក្យព្រមាន ឱ្យ លោក នូរី អាល់ម៉ាលិគិ បង្កើតរដ្ឋាភិបាលរួម មានសមាភាពនយោបាយជានិកាយស៊ុននីត ស៊ីអ៊ីត គួដ និងគ្រិស្ត ដើម្បីផ្សះផ្សាជាតិ។ ពីទីក្រុងគែរ លោកឃែរី បានអំពាវនាវឱ្យប្រមុខរដ្ឋាភិបាលអ៊ីរ៉ាក់ ជំនះឱ្យអស់នូវការរើងអើង និងការបែងចែកសាសនា ដោយមិនឈរស្ងៀមរង់ចាំជំនួយ ឬអន្តរាគមន៍យោធាពី អាមេរិកឱ្យសោះ។ វិបត្តិអ៊ីរ៉ាក់ពេលនេះ ការស្ទុះឡើងខ្លាំងនៃពួកឧទ្ទាមជីហាតនិកាយស៊ុននីត មិនមែនជាកំហុស របស់សហរដ្ឋអាមេរិកឡើយ។
នេះមិនមែនជាលើកទីមួយទេ ដែលអាមេរិករិះគន់រដ្ឋាភិបាលអ៊ីរ៉ាក់កំពុងកាន់អំណាចនោះ។ វ៉ាស៊ីនតោនធ្លាប់ធ្វើការរិះគន់ជាញឹកញយប្រមុខរដ្ឋាភិបាល នូរី អាល់ម៉ាលិគិ ជានិកាយស៊ីអ៊ីត ថាជាអ្នកបង្កបង្កើតឱ្យមានគម្លាត និងភាពប្រេះឆាជាតិ ដោយសារមូលហេតុសាសនា។
នៅយប់មិញ លោកអូបាម៉ា ដែលបានពិភាក្សាជាមួយប្រធានាធិបតី បារាំង តាមទូរស័ព្ទ ក៏បានប្រកាសតាមកញ្ចក់ទូរទស្សន៍ស៊ីអិនអិន ថា មិនមែនមហិទ្ធិរិទ្ធិគ្រាប់កាំភ្លើងអាមេរិកទេ ដែលជាអាចថែរក្សាប្រទេសអ៊ីរ៉ាក់ឱ្យមានការរួបរួមគ្នានោះ។
អាមេរិកដែលធ្លាប់បានចូលលុកលុយ ដោយប្រើកម្លាំងយោធាសន្ធឹកសន្ធាប់ ក្នុងប្រទេសអ៊ីរ៉ាក់នៅឆ្នាំ២០០៣រហូតទម្លាក់លោក សាឡាំហូសេនបាន ហាក់កំពុងប្តូរសំឡេង ប្តូរនយោបាយ គ្មានគំនិតចង់បញ្ជូនទ័ព ទៅធ្វើអន្តរាគមន៍នៅក្នុងទឹកដីអ៊ីរ៉ង់ទៀតទេ តែព្រួយបារម្ភខ្លាំង ខ្លាចក្រែងមនោគមវិជ្ជាអ៊ីស្លាមជ្រុលនិយម អាចជាការគំរាមកំហែងសហរដ្ឋអាមេរិក ក្នុងពេលអនាគត មិនថាអនាគតវែងឬខ្លីទេ។
ក្នុងពេលដែលសហរដ្ឋអាមេរិក កំពុងល្បួងអ៊ីរ៉ាក់ឱ្យដោះស្រាយតាមផ្លូវនយោបាយ នៅអឺរ៉ុបនេះក៏មានការជួបប្រជុំថ្នាក់រដ្ឋមន្ត្រីការបរទេសរបស់សហភាពអឺរ៉ុប ដែលមួយភាគធំគឺឧទ្ទិសដល់វិបត្តិអ៊ីរ៉ាក់ ដោយមានតំណាងតំណងពិសេសរបស់អគ្គលេខាធិការអង្គការសហប្រជាជាតិ ទទួលបន្ទុកកិច្ចការអ៊ីរ៉ាក់ចូលរួមផង។
អ៊ីរ៉ង់ថាអាមេរិកគ្មានឆន្ទៈ
តាំងពីចលនាជីហាតបានស្ទុះឡើងខ្លាំងនៅអ៊ីរ៉ាក់មក អ៊ីរ៉ង់និងសហរដ្ឋអាមេរិកបាននិយាយចូលគ្នា ព្រោះត្រូវការប្រយុទ្ធប្រឆាំងនឹងសត្រូវរួមគឺពួកភេរវនិយម ! ប៉ុន្តែតាមការពិត អ៊ីរ៉ង់ ដែលមានរដ្ឋាភិបាលជាអ្នកស៊ីអ៊ីតដូចនៅអ៊ីរ៉ាក់ដែរ មិនដែលមានជំហរជាក់លាក់ជាមួយនឹងអាមេរិក ជុំវិញវិបត្តិនៅអ៊ីរ៉ាក់ទេ។ ពេលខ្លះគេឮរដ្ឋាភិបាលនេះ ឬប្រមុខដឹកនាំប្រទេស ប្រកាសហៅសហរដ្ឋអាមេរិកធ្វើកិច្ចសហប្រតិបត្តិការរួមគ្នា ដើម្បីជួយអ៊ីរ៉ង់ជាមិត្ត ជួនទៅប្រមុខដឹកនាំសាសនាបញ្ជូនសារ មិនច្បាស់លាស់ ចង់ប្រឆាំងនឹងអន្តរាគមន៍យោធាអាមេរិក បណ្តេញពួកអ៊ីស្លាមជីហាតលើទឹកដីអ៊ីរ៉ង់។ ដូច្នេះប្រតិកម្មថ្មីនេះ ក៏គ្មានគួរភ្ញាក់ផ្អើលដែរ។ អាមេរិកចង់ធ្វើអន្តរាគមន៍ ក៏អ៊ីរ៉ង់រិះគន់ អាមេរិកហៅឱ្យដើរតួសំខាន់ក្នុងការជួយស្ថាបនាអ៊ីរ៉ាក់ឱ្យរួមរស់ចម្រុះជាតិសាសនា ក៏ត្រូវរងការរិះគន់ថាអាមេរិកខ្វះឆន្ទៈក្នុងការប្រយុទ្ធប្រឆាំងនឹងពួកភេរវនិយម។
សូម្បីតែអ៊ីស្រាអែលដែលធ្លាប់ជាមិត្ត ចាក់ទឹកមិនលិចក៏ឆ្លៀតព្រមានអាមេរិកដែរនៅយប់មិញ ថា បើអាមេរិកចូលធ្វើអន្តរាគមន៍នៅអ៊ីរ៉ាក់ គឺបានត្រឹមតែពង្រឹងឥទ្ធិពលអ៊ីរ៉ង់លើឆាកអន្តរជាតិប៉ុណ្ណោះ។ សម្រាប់អ៊ីស្រាអែល ទាំងស៊ុននីត ទាំងស៊ីអ៊ីត សុទ្ធជាសត្រូវនឹងអាមេរិកទាំងអស់ បើជួយមួយណាក៏មិនរួចដែរ។
►ផលវិបាកនៃការដកកងទ័ពដ៏ប្រញេបប្រញាប់ចេញពីអ៊ីរ៉ាក់
នៅក្នុងសំណុំរឿងអ៊ីរ៉ាក់នេះ ត្រូវប្រឈមនឹងស្ថានការណ៍ដ៏មហាលំបាក ! ប្រធានាធិបតីអាមេរិក កំពុងជាប់ផុងនឹងជម្រើសមិនអាចទៅរួចពីរ ៖ ទីមួយការធ្វើអន្តរាគមន៍ បន្ទាប់ពីដកចេញបានជាងពីរឆ្នាំ និងទីពីរគឺការនៅស្ងៀម ឈរមើលពួកជីហាតឡើងដៃ។ ជាជម្រើសដ៏មហាលំបាក ! នៅទីបំផុតគឺផ្លូវកណ្តាល អាមេរិកដាច់ខាតមិនបញ្ជូនទ័ពថ្មើរជើងទៅធ្វើអន្តរាគមន៍ទេ តែបញ្ជូនកម្លាំង៣០០នាក់ ដែលសុទ្ធជាទាហានជើងឆើតទៅជួយបំពាក់បំប៉នទាហានអ៊ីរ៉ាក់ និងមិនចុះ សមរភូមិទេ។ ហើយក៏មិនច្រានចោលទាំងស្រុង ការធ្វើអន្តរាគមន៍ផ្លូវអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ