អ៊ីរ៉ង់ព្រមានប្រទេសផលិតប្រេង ដែលគាំទ្រក្រុមភេរវនិយម
ប្រធានាធិបតីអ៊ីរ៉ង់ ហាសាន រូហានី បានព្រមានប្រទេសនានាដែលប្រើលុយបានមកពីការលក់ប្រេង ដើម្បីឧបត្ថម្ភក្រុមភេរវជន។ ប្រមុខដឹកនាំអ៊ីរ៉ង់ទំនងចង់សំដៅក្រុមប្រទេសអារ៉ាប់ផ្សេងទៀត ដូចជាអារ៉ាប៊ី សាអូឌីត និងកាតា ដែលបើតាមអ៊ីរ៉ង់ កំពុងផ្គត់ផ្គង់ ជួយគាំទ្រក្រុមអ៊ីស្លាមជ្រុលនិយម ជីហាត ឲ្យធ្វើសង្រ្គាមនៅក្នុងប្រទេសអ៊ីរ៉ាក់។ កាលពីថ្ងៃអាទិត្យ ក្រុមជីហាត មកពី រដ្ឋអ៊ីស្លាមអ៊ីរ៉ាក់ និងឡឺវ៉ង់ ទើបវាយដណ្តើមបានទីក្រុងបីទៀត នៅភាគខាងលិចអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
នៅក្នុងពេលថ្លែងតាមទូរទស្សន៍ លោកប្រធានាធិបតីអ៊ីរ៉ង់ ហាសាន រូហានី មិនបាននិយាយចំៗ ពីឈ្មោះប្រទេសទេ ប៉ុន្តែ លោកគ្រាន់តែអំពាវនាវសុំឲ្យប្រទេសទាំងនោះឈប់ជួយឧបត្ថម្ភក្រុមភេរវជនជាមួយនឹងលុយដុល្លារដែលគេបានមកពីការលក់ប្រេង តទៅទៀត។ ប្រមុខដឹកនាំអ៊ីរ៉ង់បាននិយាយក្រើនរំលឹកថា នៅថ្ងៃណាមួយ ប្រទេសដែលផ្តល់លុយដើម្បីជួយក្រុមភេរវជននឹងដឹងថា ក្រុមភេរវជននឹងត្រលប់ បែរក្បាលមកបង្កអសន្តិសុខដល់ខ្លួនវិញមិនខាន។
អ៊ីរ៉ង់ និងអារ៉ាប៊ី សាអូឌីតជាប្រទេសផលិតប្រេងដូចគ្នា និងកំពុងប្រជែងដណ្តើមឥទ្ធិពលគ្នាធ្វើជាមហាអំណាចនៅក្នុងតំបន់។ ប្រទេសអារ៉ាប៊ី សាអូឌីត សំបូរដោយក្រុមអ៊ីស្លាមនិកាយស៊ុននីត ផ្ទុយពីរបបអ៊ីស្លាមអ៊ីរ៉ង់ដែលនាំមុខដោយនិកាយស្ហីអ៊ីត និងដែលបានចេញមុខគាំទ្រនាយករដ្ឋមន្រ្តីអ៊ីរ៉ាក់ មកពីនិកាយស្ហីអ៊ីត។
នៅប៉ុន្មានថ្ងៃនេះ មន្រ្តីជាន់ខ្ពស់ និងប្រព័ន្ធផ្សព្វផ្សាយរបស់អ៊ីរ៉ង់ជាច្រើនបាននិយាយថា ក្រុមជីហាតមកពីរដ្ឋអ៊ីស្លាមអ៊ីរ៉ាក់ និងឡឺវ៉ង់បានវាយដណ្តើមទីក្រុងជាច្រើនរបស់អ៊ីរ៉ាក់។ ក្រុមជីហាតអាចលុកលុយអ៊ីរ៉ាក់ ប្រឆាំងនឹងលោកនាយករដ្ឋមន្រ្តីអាល់ម៉ាលិគិ ពីនិកាយស្ហីអ៊ីត ដោយ មកពីពួកគេបានទទួលជំនួយ ទាំងហិរញ្ញវត្ថុ និងយោធា ពីប្រទេសអារ៉ាប៊ី សាអូឌីត និងកាតា។
នៅដើមសប្តាហ៍នេះ លោកនាយករដ្ឋមន្រ្តីអ៊ីរ៉ាក់ក៏ធ្លាប់បានចោទប្រកាន់អារ៉ាប៊ី សាអូឌីត និងកាតាថា ជាអ្នកនៅពីក្រោយក្រុមជីហាតដែលកំពុងវាយយកទីក្រុងនៅក្នុងប្រទេសអ៊ីរ៉ាក់ដែរ។ នៅមួយថ្ងៃមុនប្រតិកម្មរបស់នាយករដ្ឋមន្រ្តីអ៊ីរ៉ាក់ អារ៉ាប៊ី សាអូឌីតបានទម្លាក់ទទួលខុសត្រូវទៅលើលោកនាយករដ្ឋមន្រ្តីអ៊ីរ៉ាក់ ថា ជាមេភ្លើង ជំរុញឲ្យក្រុមជីហាតបង្កសកម្មភាពលុកលុយនៅអ៊ីរ៉ាក់។
នៅចំពោះមុខការរុលទៅមុខរបស់ក្រុមអ៊ីស្លាមជ្រុលនិយមនៅទឹកដីអ៊ីរ៉ាក់ អាមេរិកនៅបន្តរារែក មិនទាន់អន្តរាគមភ្លាមៗទៅតាមការស្នើសុំរបស់នាយករដ្ឋមន្រ្តីអ៊ីរ៉ាក់។ កាលពីថ្ងៃអាទិត្យ ប្រមុខការបរទេសអាមេរិក លោកចន ឃែរីបានផ្តើមទស្សនកិច្ច នៅតំបន់ដើមបូព៌ា ក្នុងទិសដៅជំរុញឲ្យប្រទេសនៅក្នុងតំបន់ដាក់សម្ពាធលើនាយករដ្ឋមន្រ្តីអ៊ីរ៉ាក់ ឲ្យរៀបចំរដ្ឋាភិបាលឯកភាពជាតិថ្មីមួយ។
ដំបូងឡើយ អាមេរិកធ្លាប់បានប្រកាសចង់សហការជាមួយ អ៊ីរ៉ង់ក្នុងរឿងប្រយុទ្ធប្រឆាំងនឹងក្រុមជីហាតនៅអ៊ីរ៉ាក់។ ប៉ុន្តែ ដោយសារការព្រមាន និងការបារម្ភពីពីក្រុមប្រទេសសម្ព័ន្ធមិត្ត ដូចជាអារ៉ាប៊ី សាអូឌីត និងអ៊ីស្រាអែល (សត្រូវរបស់អ៊ីរ៉ង់) ទាក់ទងនឹងអន្តរាគមន៍របស់អាមេរិកជាមួយអ៊ីរ៉ង់ នៅទឹកដី អ៊ីរ៉ាក់ អាមេរិកបានដកឃ្លាបន្តិច មិនទាន់បញ្ជូនយន្តហោះចម្បាំងទៅអ៊ីរ៉ាក់ និងផ្ទុយទៅវិញ អំពាវនាវឲ្យមានឯកភាពក្រុមសាសនា ស្ហីអ៊ីត និងស៊ុននីត ដើម្បីបញ្ចប់បញ្ហា និងការលុកលុយរបស់ក្រុមជីហាតនៅអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ