អាមេរិកព្រមានថៃកុំឲ្យរៀបចំរដ្ឋប្រហារថ្មីទៀត
នៅថ្ងៃអង្គារនេះ ក្រុមប្រឆាំងថៃបានដាក់ពាក្យបណ្តឹងទៅកាន់ក្រុមប្រឹក្សាធម្មនុញ្ញ ដើម្បីទាមទារឲ្យធ្វើមោឃភាពលើការបោះឆ្នោតសភា កាលពីថ្ងៃអាទិត្យ ព្រមទាំងទាមទារឲ្យរំលាយគណបក្សភឿថៃរបស់លោកស្រីយីងឡាក់។ កាលពីថ្ងៃចន្ទម្សិលមិញ សហរដ្ឋអាមេរិកបានព្រមានថៃថាកុំឲ្យរៀបចំធ្វើរដ្ឋប្រហារណាមួយជាថ្មីទៀត ប៉ុន្តែ ត្រូវដោះស្រាយវិបត្តិតាមគោលការណ៍ប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០១:២៧
ការព្រមានកុំឲ្យថៃរៀបចំធ្វើរដ្ឋប្រហារជាថ្មី ត្រូវបានធ្វើឡើង ដោយមន្រ្តីអ្នកនាំពាក្យក្រសួងការបរទេសអាមេរិក។ ចាប់តាំងពីផ្ទុះវិបត្តិនយោបាយនៅថៃមក នេះគឺជាលើកទីមួយហើយ ដែលរដ្ឋាភិបាលអាមេរិក ដែលជាសម្ព័ន្ធមិត្តយ៉ាងជិតស្និទ្ធរបស់ថៃបានចេញមុខព្រមានដោយប្រើពាក្យសម្តីខ្លាំងៗបែបនេះ។
មន្រ្តីអ្នកនាំពាក្យក្រសួងការបរទេសអាមេរិកក៏បានបញ្ជាក់ផងដែរថា អាមេរិកមិនកាន់ជើងភាគីណាមួយនោះទេ ក៏ប៉ុន្តែ អំពាវនាវឲ្យគ្រប់ភាគីទាំងអស់ធ្វើការចរចាគ្នា ប្រកបដោយភាពស្មោះត្រង់ ដើម្បីស្វះស្វែងរកដំណោះស្រាយបញ្ចប់វិបត្តិដោយសន្តិវិធី និងតាមគោលការណ៍ប្រជាធិបតេយ្យ។
ការព្រមាន និងការអំពាវនាវរបស់សហរដ្ឋអាមេរិកបានកើតមានឡើង នៅក្នុងពេលដែលវិបត្តិនយោបាយថៃកំពុងធ្លាក់ក្នុងសភាពកាន់តែធ្ងន់ធ្ងរ ក្រោយការបោះឆ្នោតកាលពីថ្ងៃអាទិត្យ។
នៅថ្ងៃអង្គារនេះ ក្រុមប្រឆាំងថៃបានដាក់ពាក្យបណ្តឹងសុំឲ្យតុលាការធម្មនុញ្ញថៃធ្វើមោឃភាពការបោះឆ្នោត កាលពីថ្ងៃអាទិត្យ ព្រមទាំងទាមទារឲ្យរំលាយគណបក្សភឿថៃ និងចេញបម្រាមហាមថ្នាក់ដឹកនាំគណបក្សនេះកុំឲ្យធ្វើនយោបាយ។
ក្រៅពីបណ្តឹងរបស់ក្រុមប្រឆាំង រដ្ឋាភិបាលរបស់លោកស្រីយីងឡាក់ ក៏កំពុងជាប់ក្តីក្តាំផ្សេងទៀតផងដែរ នៅក្នុងតុលាការ ជាពិសេស ទាក់ទងនឹងការចោទប្រកាន់ពីបទពុករលួយ។
នៅពេលនេះ គេកំពុងតែនាំគ្នារំពៃមើលសកម្មភាពរបស់តុលាការថៃ ដែលជាទូទៅ ត្រូវបានគេស្គាល់ថាជាតុលាការ ដែលតែងតែលូកដៃចូលធ្វើអន្តរាគមន៍ ក្នុងកិច្ចការនយោបាយ ជាពិសេស តាមរយៈការចេញសេចក្តីសម្រេចរំលាយគណបក្សនយោបាយ ដែលស្និទ្ធិនឹងលោកថាក់ស៊ីន កាលពីពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ