អាមេរិក-អ៊ីរ៉ាក់ ៖ យុទ្ធសាស្ត្រអូបាម៉ា នៅអ៊ីរ៉ាក់ កំពុងបង្កើតភាពសង្ស័យ
ចុះផ្សាយនៅថ្ងៃ៖
ស្តាប់ - ០៥:៤៥
យន្តហោះចម្បាំង យន្តហោះគ្មានមនុស្សបើក ឌ្រូន អាមេរិក បានផ្តើមហោះហ្វែលពេញមេឃអ៊ីរ៉ាក់ផ្នែកខាងជើង។ ប្រតិបត្តិការផ្លូវអាកាសបានចាប់ផ្តើមតាំងពីថ្ងៃសុក្រម្សិលមិញមក និងគ្មានទេកាលបរិច្ឆេទកំណត់ថ្ងៃឈប់ធ្វើប្រតិបត្តិការយោធានេះទេ។ នេះបើតាមសេតវិមាន ដែលសន្យាមិនបណ្តោយឱ្យធ្លាក់ក្នុងសង្គ្រាមនៅអ៊ីរ៉ាក់ទៀតទេ។ ហើយបើតាមលោកអូបាម៉ា អាមេរិកគ្មានគម្រោងបញ្ជូនទ័ពជើងគោកចូលទឹកដីអ៊ីរ៉ាក់ជាថ្មីទេ។ ទន្ទឹមនឹងការទម្លាប់គ្រាប់បែក អាមេរិកក៏បានទម្លាក់ស្បៀងអាហារដល់បណ្តាជនស៊ីវិល អង់គ្លេសនឹងចូលចំណែកក្នុងផែនការនេះតាមរយៈកងកម្លាំងឆ័ត្រយោង។
បន្ទាប់ពីរារែក អស់រយៈពេលជាច្រើនខែ មិនព្រមប្រើកម្លាំងទ័ពសម្រាប់ដោះស្រាយវិបត្តិនៅអ៊ីរ៉ាក់មក ប្រធានាធិបតីអាមេរិក លោក បារ៉ាក់ អូបាម៉ា នៅទីបំផុត បានប្រកាសអនុញ្ញាតឱ្យទាហានអាមេរិកទម្លាក់គ្រាប់បែក លើភាគខាងជើងអ៊ីរ៉ាក់ ដើម្បីធ្វើយ៉ាងណា ទប់ស្កាត់ពួកជីហាតអ៊ីស្លាមជ្រុលនិយមកុំឱ្យរុលទៅមុខវាយយករដ្ឋធានី អែរប៊ីល (Erbil) របស់តំបន់ស្វយ័តគៀរឌីស្តង់បាន ពោលគឺបញ្ចៀសអំពើប្រល័យពូជសាសន៍កាប់សម្លាប់ជនជាតិភាគតិច យ៉ាហ្ស៊ីឌី និងគ្រិស្តសាសនិកជន ពីសំណាក់ពួករដ្ឋអ៊ីស្លាម។
យុទ្ធសាស្ត្រនៃអន្តរាគមន៍ផ្លូវអាកាស
ក្នុងពេលឃោសនាបោះឆ្នោត ឆ្នាំ២០០៨ លោកអូបាម៉ា បានសន្យាបញ្ចប់សង្គ្រាមនៅអ៊ីរ៉ាក់ និងបានដកទ័ពទាំងស្រុងចេញពីប្រទេសនៅចុងឆ្នាំ២០១១។ ឥលូវមិនទាន់បីឆ្នាំស្រួលបួលផង អាមេរិកចេញធ្វើប្រតិបត្តិការជាថ្មីក្នុងទឹកដីចាស់ដដែលនេះ ប៉ុន្តែបានកំរិតប្រតិបត្តិការត្រឹមការវាយប្រហារផ្លូវអាកាស។ យន្តហោះចម្បាំង ប្រភេទ FA-18 ពីរគ្រឿងបានហោះចេញទៅទម្លាក់គ្រាប់បែក ដៅទិសវាយប្រហារលើតំបន់គ្រប់គ្រងទោល ដាច់ឆ្ងាយពីភូមិដ្ឋានជនស៊ីវិល។ គ្រាប់ទម្ងន់ ២៥០គីឡូក្រាមបានធ្លាក់ចុះកន្លែងឈរជើងកាំភ្លើងធំរបស់ពួកជីហាត។ នេះបើតាមមន្ទីរប៉ង់តាហ្គោន !
ការប្រើមធ្យោបាយផ្លូវអាកាសនេះ គឺក្នុងបំណងជួយពួកកងទ័ពគៀរឌីស្តង់ ដែលល្បីថាមានកម្លាំងប្រយុទ្ធនិងសមត្ថភាពជាអ្នកចម្បាំងរកឃើញឡើងវិញនូវកម្លាំងចិត្ត និងជួយកងទ័ពអ៊ីរ៉ាក់ឱ្យមានពេលរៀបជើងព្រួលជាមួយទ័ពគៀរឌីស្តង់ ងើបឡើងតទល់ជាមួយនឹងពួកទ័ពអ៊ីស្លាមជ្រុលនិយមជីហាត ដែលមានកម្លាំងស្ទុះឡើងខ្លាំងបានរុករានទន្ទានទីស្ទើរពេញផ្ទៃប្រទេសអ៊ីរ៉ាក់ ក្នុងរយៈពេលដ៏ខ្លី។ នេះជាលើកទីមួយហើយ ដែលគេឃើញទ័ពគៀរឌីស្តង់និងអ៊ីរ៉ាក់ ធ្វើកិច្ចសហប្រតិបត្តិការរួមគ្នា។
លោកប្រធានាធិបតីអាមេរិក មិនបានកំណត់ពេលវេលានៃការធ្វើប្រតិបត្តិការផ្លូវអាកាសនេះទេ ព្រោះវាអាស្រ័យទៅលើការវិវឌ្ឍន៍នៃស្ថានការណ៍ជាក់ស្តែងលើសមរភូមិ។ ហេតុដូច្នេះហើយបានជាអ្នកទទួលខុសត្រូវនយោបាយអាមេរិកមួយចំនួន បានសម្តែងភាពមិនទុកចិត្តជាលក្ខណៈឯកជន ចំពោះកម្មវត្ថុនៃអន្តរាគមន៍យោធាផ្លូវអាកាសនេះ និងចំពោះច្រកចេញ។
អាមេរិកមហាអំណាចពិភពលោក
លោក បារ៉ាក់អូបាម៉ា ដែលសម្រេចបញ្ជូនទ័ពអាកាសទៅវាយប្រហារលើអ៊ីរ៉ាក់ នៅពេលនេះ គឺដើម្បីស្តារមុខមាត់ និងការពារខ្លួន ព្រោះតាមពាក្យសន្យាអាមេរិក មិនចូលធ្វើសង្គ្រាមទៀតទេ តែអាមេរិកក៏មិនអាចឈរនៅស្ងៀមអោបដៃមើលពួកភេរវនិយមរីករាលដាលទៅមុខដែរ។ បន្ទាត់ការពាររបស់ពួក គៀរឌីស្តង់បានរលំមួយម្តងៗ អាមេរិកត្រូវការតែបញ្ចេញសកម្មភាពអ្វីមួយ ដោយខានមិនបាន។
តាំងពីវិបត្តិនៅដើមបូព៌ាបានផ្ទុះឡើង របបលោកBachar Al Assad បានកន្លងបន្ទាត់ក្រហមហើយ ក៏អាមេរិកមិនចេញធ្វើប្រតិបត្តិការយោធាវាយតាមផ្លូវអាកាសនៅស៊ីរីដែរ នៅអ៊ុយក្រែនក៏ដូចគ្នា អាមេរិកមិនបានជ្រើសរើសការប្រើកម្លាំងបាយទេ តែជាលទ្ធផលរុស្ស៊ីឡើងដៃ ពួកឧទ្ទាមភេរវនិយមកាន់តែស្ទុះឡើងខ្លាំង ដូច្នេះអាមេរិកត្រូវតែបង្ហាញកម្លាំងជាមហាអំណាចទីមួយនៅលើពិភពលោកឡើងវិញ ដោយសម្រេចធ្វើការវាយប្រហារលើអ៊ីរ៉ាក់ បង្អាក់ដំណើរវិវឌ្ឍន៍របស់ពួកជីហាត។ ការវាយប្រហារតាមផ្លូវអាកាសមានអត្ថន័យជាការព្រមានកុំឱ្យពួកជីហាតរុលទៅមុខទៀត !
គ្មានទ័ពជើងគោក ?!
សម្រាប់ពេលនេះ គឺគ្មានទេ ការបញ្ជូនទ័ពជើងគោក ដែលទើបដកចេញ ទៅកាន់អ៊ីរ៉ាក់ជាថ្មីនោះ ! នេះជាអ្វីដែលលោកប្រធានាធិបតីអាមេរិកបានប្រកាសឡើង និងត្រូវតែគោរពសន្យា។ សម្រាប់លោកអូបាម៉ា គ្មានទេដំណោះស្រាយតាមផ្លូវយោធា គឺមានតែការទូតប៉ុណ្ណោះ។ ប៉ុន្តែអ្នកវិភាគយុទ្ធសាស្ត្រខ្លះ យល់ថា អាចនឹងមានសេណារីយោ ដែលធ្លាប់មានកើតនៅប្រទេសម៉ាលី ពោលគឺទាហានបារាំងដំបូងឡើយ ចេញធ្វើអន្តរាគមន៍ផ្លូវអាកាស បន្ទាប់មកក៏បានបញ្ជូនកម្លាំងជើងគោកខ្លះ ក្នុងក្របខ័ណ្ឌប្រតិបត្តិការពិសេស និងរហ័ស។
ម្យ៉ាងទៀត បើតាមអតីតភ្នាក់ងារស៊ើងការណ៍សម្ងាត់អាមេរិក សេអ៊ីអា បេសកកម្មអាមេរិកនៅអ៊ីរ៉ាក់ពេលនេះ មានសណ្ឋានដូចអន្តរាគមន៍នៅលីប៊ីកាលពីឆ្នាំ២០១១ ដើម្បីកម្ចាត់មូហាមេត កាដាហ្វីដូច្នោះ។ អាមេរិក បារាំងនិងអង់គ្លេស រួមគ្នាដើម្បីបុព្វហេតុការពារប្រជាជនស៊ីវិលពីការកាប់សម្លាប់។ ដូច្នេះ ទំនងជាគ្មានអ្វីភ្ញាក់ផ្អើលទេសម្រាប់ក្រសែភ្នែកអ្នកសង្កេតការណ៍នោះ ដែលនឹងត្រូវឃើញមានការវាយប្រហារតាមផ្លូវអាកាសខ្លាំង បន្តដោយកម្លាំងស្ថាបនាតាមពី ក្រោយ។
បារាំងអបអរអន្តរាគមន៍យោធាអាមេរិក
ប្រធានាធិបតីបារាំងបានចេញសេចក្តីថ្លែងការណ៍ផ្លូវការមួយអបអរអន្តរាគមន៍យោធាអាមេរិកនិងត្រៀមខ្លួនពិគ្រោះជាមួយដៃគូ ដើម្បីស្វែងរកការបិទបញ្ចប់ទុក្ខវេទនារបស់ពលរដ្ឋស៊ីវិលរងគ្រោះ។ បារាំងក៏បានប្រកាសជួយផ្នែកភស្តុភារដល់ទាហានអាមេរិក... ក្រោមសំណើរបស់បារាំងក្រុមប្រឹក្សាសន្តិសុខអង្គការសហប្រជាជាតិបានបើកជំនួបប្រជុំបន្ទាន់ សម្រេចព្រមព្រៀងគ្នាជាឯកឆន្ទ អំពាវនាវឱ្យសហគមន៍អន្តរជាតិគាំទ្ររដ្ឋាភិបាលនិងប្រជាជនអ៊ីរ៉ាក់ និងធ្វើអស់ពីលទ្ធភាពជួយសង្គ្រោះប្រជាជនរងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ