មេដឹកនាំជីហាតនៅអ៊ីរ៉ាក់បង្ហាញមុខឲ្យឃើញជាសាធារណៈ
ចុះផ្សាយនៅថ្ងៃ៖
ស្តាប់ - ០៦:៣៣
កាលពីថ្ងៃសៅរ៍ទី ៥ កក្កដា រូបភាពវីដេអូរមួយ ដែលបង្ហាញតាមបង្ហាញសង្គម បានបង្ហាញមុខមេដឹកនាំក្រុមជីហាតនៅអ៊ីរ៉ាក់។ ក្នុងសំលៀកបំពាក់អាវខ្មៅ បុរសម្នាក់នោះត្រូវគេជឿថា ជាអាប៊ូ បាក់ អាល់ បាកដាឌី មេដឹកនាំក្រុមជីហាត ដែលកំពុងវាយដណ្តើមយកបានទីក្រុងនៅអ៊ីរ៉ាក់។ បាក់ អាល់ បាកដាឌី កម្រនឹងបង្ហាញមុខណាស់។ តាំងពីដើមមកគេស្គាល់ អាប៊ូ បាក់ អាល់ បាកដាឌី តាមរយៈរូបថតតែពីរសន្លឹកប៉ុណ្ណោះ។
អាប៊ូ បាក់ អាល់ បាកដាឌី មេដឹកនាំក្រុមជីហាត មកពីរដ្ឋអ៊ីស្លាមអ៊ីរ៉ាក់ និងឡឺវ៉ង់ បង្ហាញមុខបន្ទាប់ពីមានពាក្យចចាម អារ៉ាម ដែលថា ខ្លួនបានស្លាប់នៅក្នុងការវាយប្រហាររបស់កងទ័ពជើងអាកាសអ៊ីរ៉ាក់។ ទាំងរដ្ឋាភិបាលអ៊ីរ៉ាក់ និងមន្រ្តីអាមេរិកបានអះអាងថា គេកំពុងសិក្សាមើលទៅលើភិនភាគ ដើម្បីបញ្ជាក់ថា បុរសម្នាក់នោះជា អាប៊ូ បាក់ អាល់ បាកដាឌីមែនឬទេ។
អាប៊ូ បាក់ អាល់ បាកដាឌីបានបង្ហាញមុខនៅមួយថ្ងៃក្រោយ ក្រុមជីហាតនៅអ៊ីរ៉ាក់បានតែងតាំងមេដឹកនាំរបស់ខ្លួនជាCalif មានន័យថា អ្នកបន្តវេនពីព្យាការី មូហាម៉េដ។ គេជឿថា អាប៊ូ បាក់ អាល់ បាកដាឌី បង្ហាញមុខនៅពេលនេះ ក៏ព្រោះតែ អាប៊ូ បាក់ អាល់ បាកដាឌី ចង់សំដែង បង្ហាញជាផ្លូវការ ថា ខ្លួនគឺជាអ្នកដឹកនាំក្រុមកងទ័ពជីហាត ដែលរហូតមកដល់ពេលនេះ បានវាយយកឈ្នះ គ្រប់គ្រងទីក្រុង និងខេត្តភាគខាងជើង អ៊ីរ៉ាក់។
កាលពីថ្ងៃអាទិត្យសប្តាហ៍មុន ក្រុមជីហាតនៅអ៊ីរ៉ាក់ទើបបានប្រកាសបង្កើតរដ្ឋអ៊ីស្លាមមួយ ដែលលាតសន្ធឹងលើទឹកដីភាគខាងជើង របស់អ៊ីរ៉ាក់ចូលទៅដល់ទឹកដីមួយផ្នែកភាគខាងកើតរបស់ស៊ីរី ដែលរហូតមកដល់ពេលនេះ ស្ថិតនៅក្រោមការគ្រប់គ្រងរបស់ក្រុមប្រដាប់អាវុធ ជីហាតអ៊ីរ៉ាក់។ គឺបន្ទាប់ពីប្រកាសបង្កើតរដ្ឋអ៊ីស្លាមតែមួយ នោះហើយ ដែលក្រុមជីហាតពេលនេះ ត្រូវបង្ហាញមុខមេដឹកនាំរបស់ពួកគេ។ តាមអ្នកវិភាគមកពីប្រទេសលោកខាងលិច អាប៊ូ បាក់ អាល់ បាកដាឌី បានបង្ហាញមុខ ជាមួយនឹងជឿជាក់ដែលថា ក្រុមជីហាតគាំទ្រ ស្មោះស្ម័គ្រនឹងខ្លួន លើកខ្លួនជាមេកើយ។
នៅក្នុងពេលថ្លែង ទៅកាន់អ្នកគោរពសាសនាអ៊ីស្លាម នៅក្នុងវិហារ មេដឹកនាំជីហាតនៅអ៊ីរ៉ាក់ ចង់ឆ្លៀតយកជ័យជំនះរបស់ខ្លួនទៅលើកងទ័ពអ៊ីរ៉ាក់ ទៅផ្សព្វផ្សាយ អូសទាញក្រុមយុវជនជីហាតនៅលើពិភពលោក និងជាពិសេសប្រជាជនមកពីនិកាយស៊ុននីត ដើម្បីឲ្យមកចូលរួមជាមួយនឹងក្រុមខ្លួន។ នៅក្នុងរូបភាពដែលគេជឿថា ថតនៅក្នុងពិធីថ្វាយបង្គំព្រះ កាលពីថ្ងៃសុក្រ នៅទីក្រុងមូស៊ូល អាប៊ូ បាក់ អាល់ បាកដាឌីបានអំពាវនាវឲ្យអ្នកកាន់សាសនាអ៊ីស្លាមទាំងអស់គោរពគាត់ ក្នុងនាមជាមេដឹកនាំតែមួយរបស់ពួកគេ។ “អ្នកទាំងអស់គ្នាត្រូវគោរពខ្ញុំ។ ខ្ញុំជាអ្នកជឿព្រះ ដែលគេបានជ្រើសរើសឲ្យមកដឹកនាំអ្នក។ ល្គឹកណា ខ្ញុំលែងដើរតាមព្រះ នោះអ្នកអាចឈប់គោរព ជឿតាមខ្ញុំ។ ខ្ញុំមិនមែនល្អប្រសើរជាងអ្នកណាទេ។ បើអ្នកឃើញខ្ញុំធ្វើត្រូវ ត្រូវបន្តជួយខ្ញុំ តែបើឃើញខ្ញុំធ្វើខុស ត្រូវជួយផ្តល់យោបល់ដល់ខ្ញុំ។”
អាប៊ូ បាក់ អាល់ បាកដាឌីជាមេដឹកនាំជីហាតដែលមានលុយ និងអំណាចច្រើនជាងមេភេរវជនដទៃទៀត
អាប៊ូ បាក់ អាល់ បាកដាឌី មានកំណើតមកពីខេត្តភាគខាងកើតអ៊ីរ៉ាក់ ជាទីដែលប្រជាជនកាន់សាសនាអ៊ីស្លាមមកពីនិកាយ ស៊ុននីត និងស្ហីអ៊ីតឈ្លោះប្រយុទ្ធបង្ហូរឈាមគ្នារហូតមក។ អាប៊ូ បាក់ អាល់ បាកដាឌីធ្លាប់បានចូលរៀន នៅសាលាអ៊ីស្លាមនៅទីក្រុងបាកដាត។ គាត់មិនដែលបានរៀនទាហានអ្វីទេ ប៉ុន្តែ បានចូលរួមក្នុងចលនាជីហាតអ៊ីរ៉ាក់ នៅពេលអាមេរិកធ្វើសង្រ្គាមវាយលុកចូលអ៊ីរ៉ាក់។ បាកដាឌីត្រូវបានអាមេរិកចាប់ខ្លួន និងដោះលែង នៅឆ្នាំ២០០៩។ បាកដាឌីបានដឹកនាំក្រុមជីហាត មកពីរដ្ឋអ៊ីស្លាមអ៊ីរ៉ាក់ ដែលធ្លាប់ត្រូវធ្លាក់ចុះអំណាច ដោយសារតែ មេដឹកនាំចាស់របស់ចលនានេះត្រូវយន្តហោះគ្មានមនុស្សបើករបស់អាមេរិកបាញ់សម្លាប់កាលពីឆ្នាំ ២០១០។
អាប៊ូ បាក់ អាល់ បាកដាឌីមានឈ្មោះល្បីខាងចិត្តដាច់ និងហិង្សា។ បាកដាឌី ជាមេគំនិត រៀបចំអំពើភេរវកម្មបំផ្ទុះគ្រាប់នៅអ៊ីរ៉ាក់ ដែលមានពេលខ្លះ អាចសម្លាប់ជាង១០០នាក់ ក្នុងមួយថ្ងៃ។ បាកដាឌីពេលនេះត្រូវគេជឿថា ជាមេដឹកនាំជីហាតដែលមានអំណាច និងឥទ្ធិពលជាងក្រុមជីហាតណាៗទាំងអស់ នៅក្នុងពិភពលោក។ បាកដាឌី ពេលនេះ មាន ទាហានប្រយុទ្ធជាង ១ម៉ឺននាក់ និងមានលុយជាងពីរពាន់លានដុល្លារ ដែលបានមកពីការចាប់ជំរិត ក្រុមមនុស្សមកពីប្រទេសលោកខាងលិច និងបានមកពីការលក់ជួញដូរប្រេងពី តំបន់ដែលខ្លួនវាយកាន់កាប់បាន នៅក្នុងទឹកដីស៊ីរី និងអ៊ីរ៉ាក់។ អាប៊ូ បាក់ អាល់ បាកដាឌី គឺមនុស្សទីពីរ បន្ទាប់ពីមេដឹកនាំអាល់កៃដា អាល់ ហ្សាវ៉ាអ៊ីរី ដែលអាមេរិកកំពុងតាមចាប់ខ្លួន។ អាមេរិកបានប្រកាសផ្តល់ថ្នូរ១០លានដុល្លារ សម្រាប់អ្នកដែលផ្តល់ព័ត៌មាន ឈានទៅដល់ចាប់ខ្លួន អាប៊ូ បាក់ អាល់ បាកដាឌី ដែលអាមេរិកចាត់ទុកជាមេភេរវជនដ៏គ្រោះថ្នាក់មួយសម្រាប់អាមេរិក។
អាប៊ូ បាក់ អាល់ បាកដាឌី ជាអូសាម៉ា បិនឡាដិនសម័យថ្មី
អាប៊ូ បាក់ អាល់ បាកដាឌីត្រូវបានអ្នកវិភាគលោកខាងលិចចាត់ទុកជាមេភេរវជនដែលមានយុទ្ធសាស្រ្ត ខុសប្លែកពីក្រុមអាល់កៃដា។ គេជឿថា អាប៊ូ បាក់ អាល់ បាកដាឌីមិនសូវត្រូវគ្នាជាមួយមេដឹកនាំអាល់កៃដាបច្ចុប្បន្ន ដែលបន្តតំណែងពីអូសាម៉ា បិនឡាដិន ដែលត្រូវអាមេរិក ចាប់ និងបាញ់ាសម្លាប់កាលពីឆ្នាំ ២០១១។
ខុសពីមេដឹកនាំអាល់កៃដា ដែលផ្តល់សារភាគច្រើនអំពាវនាវឲ្យមានការប្រឆាំងតែទៅនឹងអាមេរិក និងបង្រួបបង្រួមក្រុមអ៊ីស្លាម បាកដាឌី មេដឹកនាំជីហាតនៅអ៊ីរ៉ាក់ ផ្តោតសំខាន់ទៅលើការបោសសម្អាតនៅក្នុងចំណោម អ្នកកាន់សាសនាអ៊ីស្លាម ដោយសម្លាប់ក្រុមអ្នកដែលប្រឆាំងនឹងខ្លួន នោះបើទោះបីជាពួកគេមកពីនិកាយស៊ុននីត ឬស្ហីអ៊ីតក្តី។ ក្រុមនេះបានប្រើប្រព័ន្ធផ្សព្វផ្សាយតាមបណ្តាញសង្គម ដើម្បី អូសទាញ ក៏ដូចជាគំរាមកំហែងដល់ក្រុមប្រឆាំងនឹងខ្លួន។ បំណងរបស់ក្រុមជីហាតអ៊ីរ៉ាក់ គឺបង្កើតរដ្ឋអ៊ីស្លាមមួយដែលសុទ្ធ គ្មានអ្នកប្រឆាំង និងគោរពអនុវត្តច្បាប់តឹងរ៉ឹងរបស់ព្រះអាឡា។ រដ្ឋអ៊ីស្លាមនេះទៀតសោត គឺមានតែអ្នកដឹកនាំតែម្នាក់ដែលជាមេសាសនា ឬកាលីហ្វ អ្នកបន្តវេនពីម៉ូហាមេដ។ របៀបគ្រប់គ្រងបែបនេះ ចុងក្រោយមាន នៅក្នុងប្រទេសតួកគីត ដែលត្រូវគេលុបបំបិទចោល នៅឆ្នាំ ១៩៤២ បន្ទាប់ពីការដួលរលំនៃចក្រភពអូតូម៉ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ