សកម្មជនវៀតណាមនាំគ្នារំឭកខួប៣៥ឆ្នាំនៃសង្រ្គាមវៀតណាម-ចិនឆ្នាំ១៩៧៩
ចុះផ្សាយនៅថ្ងៃ៖
ស្តាប់ - ០៥:០៥
នៅថ្ងៃអាទិត្យនេះ សកម្មជនវៀតណាមប្រមាណជា ១០០នាក់ បានប្រមូលផ្តុំគ្នា នៅក្នុងទីក្រុងហាណូយ ដើម្បីរំឭកខួប ៣៥ឆ្នាំ នៃសង្រ្គាម រវាងចិន និងវៀតណាម ដែលបានផ្ទុះឡើង កាលពីឆ្នាំ១៩៧៩ ក្រោយពីវៀតណាមបានបញ្ជូនកងទ័ពចូលទៅវាយបណ្តេញពួកខ្មែរក្រហមចេញពីអំណាច។
ការជួបជុំគ្នារំឭកខួប ៣៥ឆ្នាំ នៃសង្រ្គាមចិន-វៀតណាម នៅថ្ងៃអាទិត្យនេះ បានប្រព្រឹត្តទៅដោយមិនមានការរារាំងពីសំណាក់អាជ្ញាធរវៀតណាមនោះទេ។ ក៏ប៉ុន្តែ សកម្មជនវៀតណាមបានបង្ហាញនូវការមិនសប្បាយចិត្ត ដែលរដ្ឋាភិបាលវៀតណាមមិនបានរៀបចំពិធីផ្លូវការណាមួយ ដើម្បីរំឭកខួបសង្រ្គាមនេះ។
សង្រ្គាមចិន-វៀតណាម នៅឆ្នាំ១៩៧៩ គឺជាសង្រ្គាមទ្រង់ទ្រាយធំមួយ ដែលពេលខ្លះត្រូវបានគេឲ្យឈ្មោះថា “សង្រ្គាមឥណ្ឌូចិនលើកទី៣” (សង្រ្គាមឥណ្ឌូចិនលើកទី១ គឺសង្រ្គាមប្រឆាំងនឹងអាណានិគមបារាំង នៅវៀតណាម ហើយសង្រ្គាមឥណ្ឌូចិនលើកទី២ គឺសង្រ្គាមអាមេរិកនៅវៀតណាម ដែលពេលខ្លះត្រូវបានគេហៅដោយខ្លីថា សង្រ្គាមវៀតណាម)។
ដើមហេតុសំខាន់បំផុត ដែលនាំឲ្យផ្ទុះសង្រ្គាម រវាងចិន និងវៀតណាម នៅឆ្នាំ១៩៧៩ គឺអន្តរាគមន៍យោធារបស់វៀតណាម នៅក្នុងប្រទេសកម្ពុជា ដើម្បីផ្តួលរំលំរបបខ្មែរក្រហម។ នៅពេលនោះ ពិភពលោកកំពុងស្ថិតក្នុងសង្រ្គាមត្រជាក់ ហើយចិន និងសហភាពសូវៀត ក៏ជាគូប្រជែងគ្នាដ៏ធំមួយដែរ។ វៀតណាម គឺជាសម្ព័ន្ធមិត្តរបស់សូវៀត។ ចំណែកខ្មែរក្រហម គឺជាសម្ព័ន្ធមិត្តរបស់ចិន។
នៅពេលដែលវៀតណាមបញ្ជូនកងទ័ពចូលទៅបណ្តេញខ្មែរក្រហមពីអំណាច ហើយកាន់កាប់ក្រុងភ្នំពេញ នៅថ្ងៃទី៧ ខែមករា ឆ្នាំ១៩៧៩ មេដឹកនាំចិននៅពេលនោះ គឺលោកតេង ស៊ាវភីង គិតថា នេះគឺជាយុទ្ធសាស្រ្តរបស់សូវៀត ក្នុងគោលដៅវាតទីពង្រីកឥទ្ធិពល នៅក្នុងតំបន់អាស៊ីអាគ្នេយ៍ ដោយប្រើវៀតណាមជាកូនជឹង ដើម្បីមកទប់ទល់នឹងចិន។
នៅថ្ងៃទី១៧ ខែកុម្ភៈ ឆ្នាំ១៩៧៩ ជាងមួយខែក្រោយពីកងទ័ពវៀតណាមវាយចូលដល់ភ្នំពេញ ហើយផ្តួលរំលំរបបខ្មែរក្រហម ចិនក៏បានបញ្ជូនទ័ពប្រហែលជា ២ម៉ឺននាក់ អមដោយរថក្រោះ ២០០គ្រឿង ព្រមទាំងកងកាំភ្លើងធំផង បើកការវាយប្រហារទៅលើខេត្តប៉ែកខាងជើងប្រទេសវៀតណាម ដើម្បីជាការសងសឹកចំពោះអន្តរាគមន៍យោធាវៀតណាមនៅកម្ពុជា។
ក៏ប៉ុន្តែ ប្រតិបត្តិការយោធាចិន នៅវៀតណាម មិនបានប្រព្រឹត្តទៅដូចដែលចិនរំពឹងទុកនោះទេ ដោយសារតែទាហានវៀតណាមមិនចេញមកប្រយុទ្ធតទល់នឹងទាហានចិន។ ផ្ទុយទៅវិញ វៀតណាមបានប្រើយុទ្ធសាស្រ្តឧទ្ទាមទ័ពព្រៃ ដូចដែលវៀតណាមធ្លាប់ធ្វើជាមួយអាមេរិក ក្នុងសង្រ្គាមវៀតណាម។
នៅថ្ងៃទី៦ មីនា ក្រោយពីការវាយប្រយុទ្ធគ្នាអស់រយៈពេល ១៧ថ្ងៃ ចិនក៏បានចាប់ផ្តើមដកថយបន្តិចម្តងៗ រហូតដកកងទ័ពទាំងអស់ចេញពីវៀតណាម នៅថ្ងៃទី១៦ មីនា។ ការដកថយរបស់ចិនបានធ្វើឲ្យវៀតណាមប្រកាសថា ខ្លួនគឺជាអ្នកឈ្នះសង្រ្គាម ដោយអាចទប់ទល់នឹងការឈ្លានពានរបស់ចិន ដូចជាវៀតណាមធ្លាប់ធ្វើជាមួយអាមេរិក និងបារាំង។
ចិនវិញបានអះអាងថា ចិនដកកងទ័ពចេញពីវៀតណាមវិញ គឺដោយសារតែចិនបានសម្រេចតាមគោលដៅពីដំបូង គឺផ្តល់មេរៀនមួយដល់វៀតណាម ដែលហ៊ានចូលឈ្លានពានលើរបបខ្មែរក្រហម ដែលជាសម្ព័ន្ធមិត្តរបស់ចិន។ ក៏ប៉ុន្តែ អ្នកប្រវត្តិសាស្រ្ត និងអ្នកជំនាញខាងយុទ្ធសាស្រ្តទ័ព គេយល់ឃើញថា មានហេតុផលផ្សេងទៀត ដែលធ្វើឲ្យចិនដកថយចេញពីវៀតណាម គឺ ទីមួយ ចិនក៏មិនមានចង់ឲ្យសង្រ្គាមជាមួយវៀតណាម រាលដាលកាន់តែធំដែរ ដោយសារតែខ្លាចផ្ទុះសង្រ្គាមជាមួយនឹងសហភាពសូវៀត។ ម្យ៉ាងទៀត ទាហានចិនក៏ត្រូវរងការខូចខាតខ្លាំងផងដែរ ដោយសារតែយុទ្ធសាស្រ្តទ័ពព្រៃរបស់វៀតណាម។
ដូច្នេះហើយបានជាគេគិតថា នៅក្នុងសង្រ្គាមជាមួយវៀតណាម នៅឆ្នាំ១៩៧៩នេះ ថ្វីដ្បិតតែគេមិនអាចនិយាយថា ជាបរាជ័យរបស់ចិន ព្រោះចិនមិនមែនត្រូវកងទ័ពវៀតណាមវាយបង្រ្កាបឲ្យដកថយ ក៏ប៉ុន្តែ គេក៏មិនអាចនិយាយពីជ័យជម្នះរបស់ចិនដែរ ពីព្រោះថា ចិនដែលជាប្រទេសមានកម្លាំងទ័ពខ្លាំងជាង ជាអ្នកបើកការវាយប្រហារទៅលើវៀតណាមមុន ក្នុងគោលដៅថាចង់ផ្តល់មេរៀនដល់វៀតណាម ក៏ប៉ុន្តែ នៅទីចុងបំផុតទៅ កងទ័ពចិនខ្លួនឯងក៏ទទួលរងនូវការខូចខាតមិនតិចដែរ។
ទាហានចិន ត្រូវស្លាប់ជាង ៨ ៥០០នាក់ និងរបួស ជាង ២ម៉ឺននាក់។ នេះបើតាមការអះអាងរបស់ចិន។ ខាងវៀតណាមវិញ អះអាងថា ទាហានចិនស្លាប់រហូតដល់ទៅ ៦ម៉ឺន ២ពាន់នាក់ឯណោះ។ ខាងវៀតណាមវិញ រដ្ឋាភិបាលវៀតណាមមិនបានផ្តល់តួលេខអំពីការខូចខាតខាងកងទ័ពទេ ក៏ប៉ុន្តែ ចិនអះអាងថា មានទាហានវៀតណាមស្លាប់ ប្រមាណជា ៤ម៉ឺន ២ពាន់នាក់ ក្នុងសង្រ្គាមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ