លោកJohn Kerryទៅវៀតណាម ដើម្បីបញ្ជាក់វត្តមានរបស់អាមេរិកនៅអាស៊ី
កាលពីថ្ងៃសៅរ៍ ទី ១៤ ធ្នូ ប្រមុខការបរទេសអាមេរិក លោកJohn Kerry បានធ្វើដំណើរទៅដល់ប្រទេសវៀតណាម ជាទីដែលលោកធ្លាប់ប្រយុទ្ធច្បាំងកាលអំឡុងសម័យសង្រ្គាម ឆ្នាំ១៩៦០។ នៅទីក្រុងហូជីមិញ រដ្ឋមន្រ្តីការបរទេសអាមេរិកបានអំពាវនាវដល់រដ្ឋាភិបាលកុម្មុយនិស្តវៀតណាមឲ្យគោរពសិទ្ធិមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ពីសត្រូវ មកជាមិត្ត និងជាដៃគូពាណិជ្ជកម្មជាមួយគ្នា។ លោកប្រមុខការបរទេសអាមេរិកបានកោតសរសើរការប្រែមុខមាត់ថ្មីរបស់វៀតណាម និងសន្ទុះសេដ្ឋកិច្ចរបស់ប្រទេសនេះ ដែលមានចាប់តំាងពីវៀតណាម និងអាមេរិកបានចុះសម្រុង និងជានានឹងគ្នាវិញ ក្នុងរយៈពេលពីរទសវត្សរ៍ចុងក្រោយនេះ។
ប៉ុន្តែ នៅចំពោះមុខនិស្សិត និងអ្នកជំនួញអាមេរិក ក្នុងទីក្រុងហូជីមិញ លោកប្រមុខការបរទេសអាមេរិកបានក្រើនរំលឹកដល់ថ្នាក់ដឹកនាំវៀតណាមឲ្យចេះឆក់ឱកាសដ៏ល្អនេះដើម្បីការពារសិទ្ធិមនុស្ស។ សង្គមដែលមានការបើកទូលាយនឹងឈានទៅរកភាពរុងរឿងថ្កុំថ្កើង។ លោករដ្ឋមន្រ្តីការបរទេសអាមេរិកបាននិយាយយ៉ាងដូច្នេះ បន្ទាប់ពីសមាជិកព្រឹទ្ធសភា និងអង្គការការពារសិទ្ធិមនុស្សនៅទីក្រុងញូវយ៉កបានទាមទារឲ្យអាមេរិកដាក់គំនាបទៅលើរដ្ឋាភិបាលវៀតណាមឲ្យគោរពសិទ្ធិមនុស្ស នៅក្នុងប្រទេស។ បញ្ហារំលោភសិទ្ធិមនុស្សត្រូវបានអង្គការHuman Rights Watch ទទូចសុំឲ្យអាមេរិកដាក់បញ្ចូលទៅក្នុងលក្ខខណ្ឌដែលតម្រូវឲ្យវៀតណាមគោរព មុននឹងអាចចូលធ្វើជាដៃគូជាមួយអាមេរិក នៅក្នុងកិច្ចព្រមព្រៀងធ្វើពាណិជ្ជកម្មអន្តរប៉ាស៊ីហ្វិក។
ដោយពិតទៅ បញ្ហាសិទ្ធិមនុស្សនៅវៀតណាមមិនមែនជាគោលដៅចំបងនៃទស្សនកិច្ចរបស់ប្រមុខការបរទេសអាមេរិកនៅវៀតណាមទេ។ យោងតាមសេចក្តីប្រកាសរបស់ក្រសួងការបរទេសអាមេរិក នៅក្នុងបរិបទរក្សាតុល្យភាព នៅអាស៊ីប៉ាស៊ីហ្វិក តំបន់អាស៊ីអាគ្នេយ៍ក្លាយជាចំណុចស៊ីបរបស់អាមេរិក។ ទស្សនកិច្ចរបស់លោកJohn Kerry នៅវៀតណាម សបញ្ជាក់ពីវត្តមាន បោះយុថ្កាដ៏យូរអង្វែងរបស់អាមេរិកនៅ អាស៊ី។ បន្ទាប់ពី វៀតណាម ប្រមុខការបរទេសអាមេរិកនឹងធ្វើដំណើរបន្តទៅហ្វីលីពីន។ ហ្វីលីពីនដែលលោកJohn Kerry បានខកខានមិនទៅ ធ្វើទស្សនកិច្ច កាលពីខែតុលាមុន។
តាមអ្នកជំនាញអាស៊ីនៅសកលវិទ្យាល័យហុងកុង ដំណើរទស្សនកិច្ចរបស់លោកJohn Kerry ធ្វើឡើងដើម្បីប៉ះប៉ូវ ការខូចខាត បន្ទាប់ពីប្រធានាធិបតីអាមេរិកខកខានមិនបានទៅចូលរួមនៅក្នុងជំនួបកំពូលអាស៊ាន កាលពីខែតុលា។ លោកអូបាម៉ាដែលបានបែរយុទ្ធសាស្រ្តយោធាមកអាស៊ីប៉ាស៊ីហ្វិកធ្លាប់បានសន្យាជួយរក្សាសន្តិសុខ នៅក្នុងតំបន់អាស៊ី ដែលបច្ចុប្បន្ននេះកាន់តែរង្គោះរង្គើដោយសារការងើបកម្រើកខ្លួន ការពង្រីកឥទ្ធិពលរបស់មហាអំណាចចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ