បញ្ជីឈ្មោះបោះឆ្នោតជាប្រធានបទក្តៅមុនការបោះឆ្នោត
សមាគមអាដហុក អង្គការនិកហ្វិក អង្គការខុមហ្វ្រែល និងអង្គការលីកាដូ បានចេញសេចក្ដីថ្លែងការណ៍រួមមួយ នៅថ្ងៃទី២ឧសភានេះ អំពាវនាវអោយគណៈកម្មាធិការជាតិរៀបចំការបោះឆ្នោតរៀបចំផ្សព្វផ្សាយបញ្ជីឈ្មោះអ្នកបោះឆ្នោតឡើងវិញ ដើម្បីអោយអ្នកមានសិទ្ធិបោះឆ្នោតអាចពិនិត្យទិន្នន័យអត្តសញ្ញាណរបស់ខ្លួន។ អង្គការសង្កេតការណ៍បោះឆ្នោតកំពុងសម្តែងការព្រួយបារម្ភអំពីបញ្ជីឈ្មោះបោះឆ្នោតនេះ បន្ទាប់ពីពួកគេរកឃើញថា បញ្ជីឈ្មោះនេះបានធ្វើអោយប៉ះពាល់សិទ្ធិអ្នកបោះឆ្នោតជាងមួយលាននាក់។
ចុះផ្សាយនៅថ្ងៃ៖
ស្តាប់ - ០២:០១
បញ្ជីឈ្មោះអ្នកបោះឆ្នោតកំពុងតែក្លាយជារបៀបវារៈក្តៅគគុកនៅមុនការបោះឆ្នោតមកដល់។ អង្គការសង្កេតការណ៍បោះឆ្នោតបានផ្សព្វផ្សាយអំពីការរកឃើញកំហុសជាច្រើននៅក្នុងបញ្ជីឈ្មោះ ដែលធ្វើអោយប៉ះពាល់សិទ្ធិអ្នកបោះឆ្នោតជាងមួយលាននាក់។ គណបក្សប្រឆាំងបានរៀបចំបាតុកម្មទាមទារអោយគណៈកម្មាធិការជាតិរៀបចំការបោះឆ្នោត (គ.ជ.ប.) រៀបចំបញ្ជីឈ្មោះអ្នកបោះឆ្នោតឡើងវិញ។
នៅថ្ងៃទី២ឧសភានេះ អង្គការសង្កេតការបោះឆ្នោត ខុមហ្វ្រែល និកហ្វិក សមាគមអាដហុក និងអង្គការលីកាដូបានធ្វើសេចក្តីថ្លែងការណ៍រួមគ្នាទៀត ទាមទារអោយគ.ជ.ប.បិទបញ្ជីឈ្មោះអ្នកបោះឆ្នោតឡើងវិញ។ អង្គការសង្កេតការណ៍បោះឆ្នោតបានស្នើអោយគ.ជ.ប.បិទបញ្ជីឈ្មោះនេះនៅតាមភូមិតែម្តង ដើម្បីងាយស្រួលដល់អ្នកបោះឆ្នោតក្នុងការត្រួតពិនិត្យអត្តសញ្ញាណរបស់ពួកគេ។ នេះគឺជាការទាមទារមួយក្នុងចំណោម២ចំណុច ដែលអង្គការសង្កេតការណ៍បោះឆ្នោតខាងលើបានលើកឡើងនៅថ្ងៃនេះ។ ចំណុចទី២នោះ អង្គការដដែលបានស្នើធ្វើយ៉ាងណាអោយគណបក្សដែលមានអាសនៈក្នុងរដ្ឋសភា ហើយដែលបានចុះឈ្មោះប្រជែងក្នុងការបោះឆ្នោតដែរនោះ ដាក់បេក្ខភាពទៅក្នុងគណៈកម្មការរៀបចំការបោះឆ្នោតឃុំ សង្កាត់ និងគណៈកម្មការតាមការិយាល័យបោះឆ្នោត និងរាប់សន្លឹកឆ្នោត។
ចំពោះអង្គការទាំងនេះ ប្រសិនបើគ.ជ.ប មិនយកអនុសាសន៍ទាំងពីរខាងលើនេះទៅដោះស្រាយឲ្យបានមុនការបោះឆ្នោតទេនោះ គ.ជ.ប.អាចប្រឈមមុខនឹងការបាត់បង់ជំនឿទៅលើខ្លួន។
លោកគល់ បញ្ញា នាយកប្រតិបត្តិនៃអង្គការខុមហ្វ្រែលបានរម្លឹកឡើងវិញថា ការប៉ះពាល់ដល់សិទ្ធិអ្នកបោះឆ្នោតដែលត្រូវបានរកឃើញថា មានដល់ជាងមួយលាននាក់នោះ គឺជាទំហំធំធេង ហើយថា នេះវាមិនមែនតែជាបញ្ហាត្រឹមបញ្ជីឈ្មោះបោះឆ្នោតទេ ប៉ុន្តែវាជាបញ្ហាសិទ្ធិអ្នកបោះឆ្នោតដែលជាបញ្ហាធំបំផុត។
វិទ្យុបារាំងអន្តរជាតិមិនអាចទាក់ទងតំណាងគ.ជ.ប. ដើម្បីសួរអំពីប្រតិកម្មបានឡើយ ប៉ុន្តែអគ្គលេខាធិការគ.ជ.ប. លោកទេព នីថា ត្រូវបានសារព័ត៌មានក្នុងស្រុកស្រង់សម្តីដែលនិយាយថា គ.ជ.ប.បានផ្សព្វផ្សាយបញ្ជីឈ្មោះអ្នកបោះឆ្នោតច្រើនមកហើយ ហើយថាគ.ជ.ប.ក៏បានបង្កើតប្រព័ន្ធទូរស័ព្ទឥតគិតថ្លៃ ដើម្បីផ្តល់ឱកាសអោយប្រជាពលរដ្ឋសួរព័ត៌មានអំពីអត្តសញ្ញាណរបស់ពួកគេក្នុងបញ្ជីឈ្មោះអ្នកបោះឆ្នោតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ