បេក្ខជនប្រធានាធិបតីឥណ្ឌូណេស៊ីប្រកាសពីជ័យជម្នះរៀងៗខ្លួន
នៅល្ងាចថ្ងៃពុធ បេក្ខជនទាំងពីររូប ដែលឈរឈ្មោះក្នុងការបោះឆ្នោតប្រធានាធិបតីឥណ្ឌូណេស៊ី បាននាំគ្នាចេញមុខអះអាងតែរៀងៗខ្លួនថា ខ្លួនគឺជាអ្នកទទួលជោគជ័យក្នុងការបោះឆ្នោតនេះ។ ការប្រកាសជោគជ័យនេះធ្វើឡើង នៅក្នុងពេលដែលគណៈកម្មាធិការរៀបចំការបោះឆ្នោត នៅមិនទាន់បង្ហាញពីលទ្ធផលនៃការរាប់សន្លឹកឆ្នោតនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
កាលពីដំបូង គឺលោក ហ្សូកូ វីដូដូ (Joko Widodo) អភិបាលក្រុងហ្សាការតា ដែលបានចេញមុខប្រកាសមុនគេថា លោកជាអ្នកទទួលជោគជ័យក្នុងការបោះឆ្នោតប្រធានាធិបតី នៅថ្ងៃពុធនេះ។ ការអះអាងពីជោគជ័យនេះត្រូវបានធ្វើឡើង ដោយយោងទៅលើលទ្ធផលក្រៅផ្លូវការ ធ្វើឡើងដោយវិទ្យាស្ថាន ឬស្ថាប័នក្រៅរដ្ឋាភិបាលមួយចំនួន។
ក៏ប៉ុន្តែ ភ្លាមៗក្រោយការប្រកាសជ័យជម្នះរបស់លោកវីដូដូ គូប្រជែងរបស់លោក គឺអតីតឧត្តមសេនីយ៍ ប្រាបូវ៉ូ ស៊ូប៊ីយ៉ានតូ (Prabowo Subianto) ក៏ស្រាប់តែបានចេញមុខប្រកាសជ័យជម្នះរបស់លោកដែរ ដោយសំអាងទៅលើលទ្ធផលក្រៅផ្លូវការ ដែលគណបក្សរបស់លោកទទួលបាន។
ជាការពិត បើយោងតាមទីភ្នាក់ងារព័ត៌មានរ៉យទ័រ គេពិតជាឃើញមានលទ្ធផលក្រៅផ្លូវការខុសៗគ្នាពិតមែន គឺលទ្ធផល ធ្វើឡើងដោយវិទ្យាស្ថាន ចំនួន ៥ បង្ហាញថា លោក វីដូដូ ទទួលបានសំឡេងគាំទ្រច្រើនជាងលោក ស៊ូប៊ីយ៉ានតូ ក្នុងចន្លោះ ពី ៤% ទៅ ៥%។ ក៏ប៉ុន្តែ វិទ្យាស្ថាន ២ផ្សេងទៀត បានគណនាឃើញថា លោកស៊ូប៊ីយ៉ានតូ ទទួលបានសំឡេងច្រើនជាងលោកវីដូដូ ទៅវិញ គឺច្រើនជាង ក្នុងចន្លោះ ពី ១% ទៅ ២%។
គួរបញ្ជាក់ថា នៅឥណ្ឌូណេស៊ី ការគណនាលទ្ធផលបោះឆ្នោតក្រៅផ្លូវការដោយវិទ្យាស្ថានជំនាញធ្លាប់ត្រូវបានគេផ្តល់ទំនុកចិត្តច្រើន ដោយសារតែ កាលពីការបោះឆ្នោតមុនៗ លទ្ធផលក្រៅផ្លូវការនេះតែងតែឆ្លុះបញ្ចាំងពីលទ្ធផលផ្លូវការ។ ក៏ប៉ុន្តែ នៅក្នុងការបោះឆ្នោតប្រធានាធិបតីនៅថ្ងៃពុធនេះ បេក្ខជនទាំងពីររូបមានប្រជាប្រិយភាពប្រកៀកប្រកិតគ្នាខ្លាំង ដែលអាចជាមូលហេតុនាំឲ្យលទ្ធផលក្រៅផ្លូវការត្រូវបានគេគណនាឃើញខុសៗគ្នាបែបនេះ។
ការចេញមុខប្រកាសជោគជ័យរៀងៗខ្លួន រវាងបេក្ខជនប្រធានាធិបតីទាំងពីរ បានបង្កឲ្យមានភាពតានតឹងដ៏គួរឲ្យព្រួយបារម្ភមួយ ដែលជាហេតុធ្វើឲ្យលោកយូដូយ៉ូណូ ប្រធានាធិបតីចប់អាណត្តិចេញមុខភ្លាមៗ អំពាវនាវឲ្យភាគីទាំងពីរមានការអត់ធ្មត់ ហើយរង់ចាំការប្រកាសលទ្ធផលជាផ្លូវការ។ លទ្ធផលបោះឆ្នោតផ្លូវការ ដែលគណៈកម្មាធិការជាតិរៀបចំការបោះឆ្នោតឥណ្ឌូណេស៊ី គ្រោងនឹងប្រកាស នៅថ្ងៃទី២២ ខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ