អាមេរិក៖ ក្រុមជំនាន់ក្រោយរបស់អាល់កៃដាមានចរិតកាន់តែហិង្សា
ចុះផ្សាយនៅថ្ងៃ៖
ស្តាប់ - ០៣:៥៨
បណ្តាញក្រុមភេរវជននៅតែជាគ្រោះថ្នាក់សំខាន់ គំរាមកំហែងសន្តិសុខរបស់អាមេរិក និងប្រទេសសម្ព័ន្ធមិត្តរបស់អាមេរិក។ នៅក្នុងរបាយការណ៍ប្រចាំឆ្នាំស្តីពីភេរវកម្មក្នុងពិភពលោក ឆ្នាំ ២០១៣ ចេញផ្សាយ កាលពីថ្ងៃពុធ ទី ៣០ ក្រសួងការបរទេសអាមេរិកបានបង្ហាញថា អំពើហិង្សា បំផ្ទុះគ្រាប់បែក សម្លាប់មនុស្សរបស់ក្រុមភេរវជនបានកើនឡើង ជាង៤០ភាគរយ បើប្រៀបធៀបនឹងឆ្នាំ ២០១២។
អង្គភាពប្រយុទ្ធប្រឆាំងអំពើភេរវកម្មអាមេរិកទំនងអាចធូរទ្រូង បន្ទាប់ពីអូសាម៉ា បិនឡាដិន មេបណ្តាញអាល់កៃដា ក្រុមភេរវកម្ម ត្រូវកងកុម្មង់ដូរអាមេរិកបាញ់សម្លាប់ នៅប៉ាគីស្ថាន កាលពីឆ្នាំ ២០១១។ ប៉ុន្តែ មិនមែនដូច្នោះឯណា។ អាមេរិក មហាអំណាចដឹកនាំប្រឆាំងភេរវកម្ម ក្នុងពិភពលោក មិនអាចសម្រាកស្រួលខ្លួនឡើយ នោះបើទោះបីជាបណ្តាញអាល់កៃដាបាត់បង់មេកើយដ៏ល្បីឈ្មោះ ហើយបណ្តាញនេះចាប់ផ្តើមចុះខ្សោយ នៅក្នុងរយៈពេលប៉ុន្មានឆ្នាំនេះ ក៏ដោយ។
អាល់កៃដាបាត់មេកើយ បណ្តាញភេរវកម្មអាល់កៃដា ចុះខ្សោយ ប៉ុន្តែ ក្នុងពេលជាមួយគ្នានោះ អ្នកជំនាញអាមេរិករកឃើញថា ក្រុមភេរវជនតូចៗក៏បានកើតឡើង រីកដុះដាលដូចផ្សិតដែរ ជាពិសេស នៅតំបន់ដើមបូព៌ា នៅអាហ្រ្វិក និងនៅអាស៊ី។ តាមក្រសួងការបរទេសអាមេរិក សង្រ្គាមស៊ីវិល នៅស៊ីរី រឹតតែផ្តល់អំណោយផល ដល់ការរីកដុះដាលក្រុមភេរវកម្ម។ ក្រុមមនុស្សជ្រុលនិយម ជាច្រើន ជាពិសេសយុវជនអ៊ីស្លាម បានយកគំរូ ដើរតាមមនោគមវិជ្ជារបស់ក្រុមអាល់កៃដា ដោយបានស្មោះស្ម័គ្រចូលទៅប្រយុទ្ធជាមួយក្រុមប្រឆាំងស៊ីរី ដើម្បីប្រយុទ្ធប្រឆាំងនឹងទាហានរដ្ឋាភិបាលស៊ីរី។ ជាមួយគ្នានោះ អភិបាលកិច្ចទន់ខ្សោយរបស់ប្រទេសមួយចំនួន ដូចជាប៉ាគីស្ថាន អាហ្វហ្កានីស្ថាន និងអ៊ីរ៉ាក់ក៏ជួយជំរុញឲ្យក្រុមភេរវជនមានកាន់តែច្រើន និងរីកឥទ្ធិពលកាន់តែខ្លាំងនៅក្នុងតំបន់។ នៅក្នុងរបាយការណ៍របស់ក្រសួងការបរទេសអាមេរិក រដ្ឋាភិបាលមួយចំនួនបានលើកផងដែរពីក្តីព្រួយបារម្ភរបស់គេ ដែលថា ក្រុមយុវជនដែលចូលទៅច្បាំងជាមួយក្រុមជ្រុលនិយម ក្រុមបណ្តាញអាល់កៃដា នៅបរទេស នឹងអាចត្រលប់មកបង្កអំពើហិង្សា ឬភេរវកម្ម នៅក្នុងប្រទេសកំណើតរបស់ខ្លួន វិញ។
ជារួម ដោយយកតាមគំរូរបស់អាល់កៃដា ក្រុមប្រដាប់អាវុធទាំងនោះបានបង្កើតក្រុមមួយ និងមានរចនាសម្ព័ន្ធគ្រប់គ្រង ឯករាជ្យ ពីអាល់កៃដា។ ក្រុមភេរវកម្មថ្មីៗ ជាច្រើន មិនស្ថិតនៅក្រោមការគ្រប់គ្រង របស់មេអាល់កៃដាទេ។ មេអាល់កៃដាថ្មីគ្មានអំណាច ឥទ្ធិពលទៅលើក្រុមទាំងនោះទៀតទេ។
តាមរបាយការណ៍របស់ក្រសួងការបរទេសអាមេរិក ក្រុមទាំងនោះមានដូចជាក្រុមតាលីបង់ប៉ាគីស្ថាន ក្រុមបូកូហារ៉ាម នៅនីហ្សេរីយ៉ា អាល់កៃដា អ៊ីរ៉ាក់ ក្រុមសេបាប់ពីប្រទេសសូម៉ាលី។ បណ្តាញអាល់កៃដាកើតឡើងថ្មីនេះ មិនពឹងផ្អែកទៅលើហិរញ្ញវត្ថុរបស់មេអាល់កៃដាទេ។ ពួកក្រុមនេះបានទទួលថវិកាដោយផ្ទាល់ពីក្រុមអ្នកមានអារ៉ាប៊ី សាអ៊ូឌីត ដែលបានជះលុយ ញុះញង់ឲ្យគេចូលប្រយុទ្ធនៅក្នុងសង្រ្គាមស៊ីវិលស៊ីរី។ មួយវិញទៀត ពួកគេអាចរកថវិកាដោយខ្លួនឯង តាមរយៈ ការចាប់ជំរិត ចាប់ចំណាប់ខ្មាំងជនបរទេស ឬ ក៏ប្រព្រឹត្តឧក្រិដ្ឋកម្ម បន្លំកាតធនាគារ ដើម្បីយកលុយទៅផ្គត់ផ្គង់បេសកកម្មភេរវកម្មរបស់ខ្លួន។
តាមរបាយការណ៍របស់អាមេរិក ក្រុមភេរវជនថ្មីៗ ភាគច្រើន មានចរិតឃោឃៅ ហិង្សា និងឧស្សាហ៍ បង្កភេរវកម្មប្រឆាំង ក្រុមនិកាយសាសនា។ មុខសញ្ញារបស់ក្រុមភេរវជនគឺ ជនស៊ីវិល អ្នកកាន់សាសនាផ្ទុយពីខ្លួន មន្ទីរពេទ្យ ទីតាំងរដ្ឋបាល។ ក្នុងឆ្នាំ ២០១៣ អំពើភេរវកម្មបានកើនឡើង៤៣ភាគរយ នៅក្នុងពិភពលោក។ នៅឆ្នាំ ២០១៣ អំពើភេរវកម្មបានកើតឡើង ដល់ទៅ ៩៧០០លើក ក្នុងពេលដែលភេរវកម្មមានចំនួនតែ ៦៧០០ប៉ុណ្ណោះ នៅឆ្នាំ ២០១២។ ក្នុងចំណោមជនរងគ្រោះ ដែលស្លាប់ នៅក្នុងអំពើភេរវកម្ម ជាង ១ម៉ឺន ៧ពាន់នាក់ មានផងដែរ ជនជាតិអាមេរិកាំង ១៦នាក់។ ក្រៅពីនោះ គឺជាប្រជាជនរបស់ប្រទេសធំៗ ចំនួន១០ដែលអំពើភេរវកម្មច្រើនជាងគេ ដែលមានដូចជា អ៊ីរ៉ាក់ អាហ្វហ្កានីស្ថាន ប៉ាគីស្ថាន នីហ្សេរីយ៉ា ថៃ ហ្វីលីពីន សូម៉ាលី យេម៉ែន ឥណ្ឌា ស៊ីរី។
របាយការណ៍របស់អាមេរិកបានបង្ហាញថា បើមើលទៅគោលដៅដែលរងអំពើភេរវកម្ម កម្រិតគំរាមកំហែងរបស់ក្រុមភេរវជនមាននៅត្រឹមថ្នាក់មូលដ្ឋាន នៅក្នុងតំបន់ ប៉ុន្តែ មិនមានលក្ខណៈជាអន្តរជាតិនោះទេ។ ថ្វីបើយ៉ាងនោះក្តី ក៏អាមេរិកនៅតែបារម្ភ និងចាត់ទុកថា ក្រុមភេរវកម្មនៅតែជាគ្រោះថា្នក់ សម្រាប់សន្តិសុខរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ