លោកស្ហ៊ីនហ្សូ អាបេនិងលោកស៊ី ជីនពីងបើកធ្វើជំនួបកំពូលជាលើកទី១
ចុះផ្សាយនៅថ្ងៃ៖
ស្តាប់ - ០៤:៥២
នាយករដ្ឋមន្រ្តីជប៉ុន លោកស្ហ៊ីនហ្សូ អាបេ និងប្រធានាធិបតីចិន លោកស៊ី ជីនពីង បានជួបគ្នានៅថ្ងៃចន្ទនេះ នៅក្រៅជំនួបកំពូល APEC នៅប៉េកាំង។ នេះគឺជាជំនួបកំពូលលើកទី១ ចាប់តាំងពីមេដឹកនាំទាំងពីរបានឡើងកាន់អំណាច និងចាប់តាំងពីទំនាក់ទំនងរវាងប្រទេសទាំងពីរបានធ្លាក់ចុះដុនដាបខ្លាំង កាលពីឆ្នាំ២០១២។
លោកស្ហ៊ីនហ្សូ អាបេ និងលោកស៊ី ជីនពីង បានឡើងកាន់អំណាចនៅក្នុងពេលប្រហាក់ប្រហែលគ្នា។ លោកស្ហ៊ីនហ្សូ អាបេ ជាប់ឆ្នោតជានាយករដ្ឋមន្រ្តីជប៉ុន នៅចុងឆ្នាំ២០១២ ចំណែកលោកស៊ី ជីនពីង បានឡើងកាន់តំណែងជាប្រធានាធិបតីចិន នៅដើមឆ្នាំ២០១៣។ ចាប់តាំងពីពេលឡើងកាន់តំណែងមក ប្រមុខដឹកនាំទាំងពីរមិនដែលបើកធ្វើជំនួបកំពូលជាផ្លូវការនោះទេ ហើយទំនាក់ទំនង រវាងចិន និងជប៉ុន ចេះតែធ្លាក់ចុះដុនដាបពីមួយថ្ងៃទៅមួយថ្ងៃ។
មូលហេតុដែលបង្កឲ្យមានភាពតានតឹង រវាងចិន និងជប៉ុន រួមមាន ការខ្វែងគំនិតគ្នាទាក់ទងនឹងប្រវត្តិសាស្រ្តសម័យសង្រ្គាម និងជម្លោះដណ្តើមប្រជុំកោះ ដែលជប៉ុនហៅថា “សេនកាគូ” ហើយដែលចិនហៅថា “ទៀវយូ”។
ទាក់ទងនឹងប្រវត្តិសាស្រ្ត ចំណុចដែលនាំឲ្យមានបញ្ហាចម្រូងចម្រាសខ្លាំងជាងគេ គឺវិហារយ៉ាស៊ូគូនី។ ចាប់តាំងពីលោកស្ហ៊ីនហ្សូ អាបេ និងគណបក្សអភិរក្សនិយមជាប់ឆ្នោតឡើងកាន់អំណាចមក សមាជិកសភា និងសមាជិករដ្ឋាភិបាលជប៉ុន តែងតែនាំគ្នាធ្វើដំណើរទៅបន់ស្រន់ នៅវិហារយ៉ាស៊ូគូនីជាញឹកញាប់។ សូម្បីតែលោកស្ហ៊ីនហ្សូ អាបេ ខ្លួនឯងផ្ទាល់ ដែលជាប្រមុខរដ្ឋាភិបាល ក៏ធ្លាប់ទៅបន់ស្រន់នៅវិហារយ៉ាស៊ូគូនីនេះដែរ កាលពីខែធ្នូ ឆ្នាំ២០១៣។ សម្រាប់ចិន ការណ៍ដែលមេដឹកនាំជប៉ុនទៅធ្វើការបន់ស្រន់នៅវិហារយ៉ាស៊ូគូនី គឺប្រៀបដូចជាការប្រមាថដល់ប្រជាជនចិន ជាពិសេស ដល់ជនរងគ្រោះ សម័យសង្រ្គាម ពីព្រោះ នៅវិហារយ៉ាស៊ូគូនីនេះមានចារឈ្មោះអតីតមេដឹកនាំជប៉ុនក្នុងសម័យសង្រ្គាមលោកលើកទី២ ហើយដែលជាប់ទោសជាឧក្រិដ្ឋជនសង្រ្គាម។
ទាក់ទងនឹងជម្លោះដណ្តើមប្រជុំកោះវិញ បញ្ហាបានផ្ទុះឡើង កាលពីឆ្នាំ២០១២ ក្រោយពីរដ្ឋាភិបាលជប៉ុនបានប្រមូលទិញដីទាំងអស់នៅលើប្រជុំកោះជាប់ជម្លោះមកដាក់ជាកម្មសិទ្ធិរបស់រដ្ឋ ដែលជាហេតុធ្វើឲ្យរដ្ឋាភិបាល និងប្រជាជនចិនខឹងសម្បារ។ ចាប់ពីពេលនោះមក ចិនតែងតែបញ្ជូននាវាល្បាតចូលទៅក្នុងតំបន់កោះជាប់ជម្លោះជាញឹកញាប់។ លើសពីនេះទៅទៀត ចិនបានប្រកាសបង្កើតតំបន់ការពារដែនអាកាស ដែលគ្រប់ដណ្តប់លើតំបន់សមុទ្រជាប់ជម្លោះជាមួយជប៉ុន ដែលធ្វើឲ្យភាពតានតឹងកាន់តែកើនឡើង រហូតមានអ្នកវិភាគខ្លះបង្ហាញនូវការបារម្ភថា ចិន និងជប៉ុន អាចនឹងប៉ះទង្គិចគ្នាដោយអាវុធ ដោយសារតែជម្លោះដណ្តើមប្រជុំកោះនេះ។
ក្តីបារម្ភនេះហាក់ដូចជាបានធូរស្បើយទៅវិញបន្តិច នៅក្រោយពេលដែលលោកស៊ី ជីនពីង យល់ព្រមបើកធ្វើជំនួបកំពូលជាមួយលោកស្ហ៊ីនហ្សូ អាបេ នៅថ្ងៃចន្ទនេះ។ លោកស្ហ៊ីនហ្សូ អាបេ បានលើកឡើងនៅក្រោយជំនួបជាមួយលោកស៊ី ជីនពីងថា ជំនួបនេះ គឺជាជំហានដំបូង ដែលឈានទៅស្តារទំនាក់ទំនងចិន-ជប៉ុនឡើងវិញ។
បើទោះបីជាមានជំនួបកំពូលនៅថ្ងៃចន្ទនេះក៏ដោយ មេដឹនាំចិន និងជប៉ុន នៅតែបន្តប្រកាន់ជំហរតឹងរ៉ឹងរៀងៗខ្លួន ជាពិសេស ទាក់ទងនឹងជម្លោះដណ្តើមប្រជុំកោះ ក៏ប៉ុន្តែ មេដឹកនាំទាំងពីរបានឯកភាពគ្នាថានឹងធ្វើយ៉ាងណាកុំឲ្យជម្លោះនេះរាលដាលកាន់តែធំជាងនេះទៅទៀត ដែលនាំឲ្យប៉ះពាល់ដល់ទំនាក់ទំនងទ្វេភាគី ក្នុងវិស័យផ្សេងៗទៀត។
គួរបញ្ជាក់ថា ចិន និងជប៉ុន ថ្វីដ្បិតតែមានប្រវត្តិជូរចត់នឹងគ្នាកាលពីអតីតកាល ក៏ប៉ុន្តែ បច្ចុប្បន្ននេះកំពុងតែត្រូវការគ្នាទៅវិញទៅមកខាងផ្នែកសេដ្ឋកិច្ច។ ប្រទេសមហាអំណាចសេដ្ឋកិច្ចទាំងពីរនេះ សុទ្ធតែមានសេដ្ឋកិច្ចពឹងផ្អែកលើការនាំចេញដូចគ្នា ហើយការដោះដូរពាណិជ្ជកម្មទ្វេភាគី រវាងចិន និងជប៉ុន មានទំហំជាទឹកប្រាក់រហូតដល់ទៅ ៣៣៤ពាន់លានដុល្លារ កាលពីឆ្នាំ២០១២។
ក្រោយពីមានជម្លោះ ការដោះដូរពាណិជ្ជកម្ម រវាងប្រទេសទាំងពីរបានធ្លាក់ចុះរហូតដល់ទៅជាង ១០% នៅឆ្នាំ២០១៣។ នៅចិនវិញ វិនិយោគរបស់ជប៉ុនបានធ្លាក់ចុះរហូតដល់ទៅ ២៥% នៅឆ្នាំ២០១៣ ហើយបន្តធ្លាក់ចុះ ៤០% ទៀត នៅដើមឆ្នាំ២០១៤។ ទាំងនេះជាការបង្ហាញឲ្យឃើញថា ភាពតានតឹងចាប់តាំងពីឆ្នាំ២០១២មក បានធ្វើឲ្យចិន និងជប៉ុន ត្រូវខាតបង់ទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ