លោកស៊ី ជីនពីងចេញដំណើរទៅបំពេញទស្សនកិច្ចនៅអាមេរិកឡាទីន
លោកស៊ី ជីនពីង ប្រធានាធិបតីចិន បានចេញដំណើរ កាលពីថ្ងៃអាទិត្យម្សិលមិញ ទៅបំពេញទស្សនកិច្ច នៅក្នុងតំបន់អាមេរិកឡាទីន។ ចាប់តាំងពីលោកឡើងកាន់តំណែងមក នេះគឺជាលើកទី២ហើយ ដែលលោកស៊ី ជីនពីង ទៅបំពេញទស្សនកិច្ច នៅអាមេរិកឡាទីន ដែលជាធម្មតា ត្រូវអាមេរិកចាត់ទុកថាជាដែនឥទ្ធិពលរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
នៅអាមេរិកឡាទីន លោកស៊ី ជីនពីង នឹងទៅបំពេញទស្សនកិច្ចនៅក្នុងប្រទេសចំនួន ៤ គឺ គុយបា វ៉េណេស៊ុយអេឡា អាហ្សង់ទីន និងប្រេស៊ីល។ នៅប្រេស៊ីល ក្រៅពីការបំពេញទស្សនកិច្ចផ្លូវរដ្ឋទ្វេភាគី លោកស៊ី ជីនពីង ក៏នឹងត្រូវចូលរួមផងដែរ ក្នុងជំនូបកំពូលរវាងប្រមុខដឹកនាំនៃក្រុមប្រទេសកំពុងមានសេដ្ឋកិច្ចរីកលូតលាស់ខ្លាំង ហៅកាត់ថា BRICS (ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង)។ នៅទីនោះ លោកប្រធានាធិបតីចិននឹងត្រូវជួបដោយផ្ទាល់ជាលើកទី១ ជាមួយលោកណារិនដ្រា ម៉ូឌី នាយករដ្ឋមន្រ្តីដែលទើបនឹងជាប់ឆ្នោតថ្មីរបស់ឥណ្ឌា។
បន្ទាប់មកទៀត លោកស៊ី ជីនពីង នឹងចូលរួមបើកវេទិកាចិន-អាមេរិកឡាទីន ដែលជាការបញ្ជាក់ឲ្យឃើញកាន់តែច្បាស់ អំពីចំណាប់អារម្មណ៍របស់ចិនទៅលើតំបន់ ដែលជាទូទៅ ត្រូវបានសហរដ្ឋអាមេរិកចាត់ទុកជាដែនឥទ្ធិពលផ្តាច់មុខរបស់ខ្លួន។
ការណ៍ដែលចិនខិតខំបង្កើនឥទ្ធិពលនៅក្នុងតំបន់អាមេរិកឡាទីន នៅក្នុងពេលបច្ចុប្បន្ននេះ អាចជាការឆ្លើយតបមួយ ចំពោះអាមេរិកដែលកំពុងតែព្យាយាមបង្កើនឥទ្ធិពលនៅក្នុងតំបន់អាស៊ីយ៉ាងខ្លាំងផងដែរ។
ក្រៅពីបញ្ហាភូមិសាស្រ្តនយោបាយ ចិនក៏សំឡឹងឃើញផងដែរនូវផលប្រយោជន៍ខាងផ្នែកសេដ្ឋកិច្ច ពីព្រោះថា តំបន់អាមេរិកឡាទីន គឺជាទីផ្សារមួយប្រកបដោយសក្តានុពល សម្រាប់វិស័យនាំចេញរបស់ចិន។ យោងតាមទិន្នន័យរបស់រដ្ឋាភិបាលចិន កាលពីឆ្នាំ២០១៣កន្លងទៅនេះ ការដោះដូរពាណិជ្ជកម្ម រវាងចិន និងតំបន់អាមេរិកឡាទីន មានទំហំជាទឹកប្រាក់រហូតដល់ទៅជាង ២៦១ពាន់លានដុល្លារ។
ម្យ៉ាងទៀត តំបន់អាមេរិកឡាទីននេះក៏មានប្រទេសសម្បូរប្រេង ដែលចិនកំពុងតែត្រូវការយ៉ាងខ្លាំងផងដែរ ដើម្បីផ្គត់ផ្គង់ដល់តម្រូវការនៃកំណើនសេដ្ឋកិច្ចរបស់ខ្លួន។ ជាក់ស្តែង ប្រទេសវ៉េណេស៊ុយអេឡា ដែលលោកស៊ី ជីនពីង ទៅបំពេញទស្សនកិច្ច នៅពេលនេះ គឺជាប្រទេសដែលនាំប្រេងចេញច្រើនជាងគេបង្អស់ នៅក្នុងតំបន់អាមេរិកឡាទីន ហើយជាប់ចំណាត់ថ្នាក់លេខ១២ នៅលើពិភពលោក។ កាលពីឆ្នាំ២០១៣កន្លងទៅនេះ ចិនបាននាំប្រេងពីវេណេស៊ុយអេឡាគិតជាមធ្យមប្រមាណជាង ៦២ម៉ឺនធុងក្នុងមួយថ្ងៃៗ ហើយប្រទេសទាំងពីរគ្រោងនឹងបង្កើនចំនួនការនាំចូលប្រេងនេះឲ្យដល់ ១លានធុងក្នុងមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ