សហរដ្ឋអាមេរិកនិងប្រទេសអឺរ៉ុបមួយចំនួនបិទស្ថានទូតជាបណ្តោះអាសន្ននៅយេមែន
សហរដ្ឋអាមេរិកនិងបណ្តាប្រទេសអឺរ៉ុបមួយចំនួនបានបិទស្ថានទូតខ្លួននៅក្រុងសាណាអាប្រទេសយេម៉ែន ជាបណ្តោះអាសន្ននិងចាប់ផ្តើម ដឹកជញ្ជូនបុគ្គលិកកាទូតរបស់ខ្លួនក៏ព្រមទាំងក្រុមគ្រួសារជម្លៀសចេញពីយេមែន។ ការបិទស្ថានទូតលោកខាងលិចនេះគឺដោយ សារតែ បញ្ហាអសន្តិសុខ បានកើនឡើងកម្រិតខ្ពស់។
ចុះផ្សាយនៅថ្ងៃ៖
ស្តាប់ - ០២:៥០
ដោយសារបញ្ហាអសន្តិសុខកាន់តែកើនកម្រិតខ្លាំងនៅទីក្រុងសាណាអា(Sanaa) ប្រទេសយេមែននារយៈពេលចុងក្រោយនេះ ក្រសួងការបរទេសអាមេរិក បានជូនដំណឹងនៅថ្ងៃអង្គារម្សិលមិញថា “សហរដ្ឋអាមេរិក បិទស្ថានទូតខ្លួនជាបណ្តោះអាសន្នចាប់ពីថ្ងៃពុធទី១១កុម្ភៈនេះ។
បុគ្គលិកស្ថានទូតនិងក្រុមគ្រួសារ ត្រូវដឹកជញ្ជូនជម្លៀសចេញក្រៅប្រទេស។ រីឯសកម្មភាពនានាដែលមានជាប្រចាំថ្ងៃនៅស្ថានទូត ដូច “សេវាស្ថានកុងស៊ុល ត្រូវលើកផ្អាកមួយរយៈពេលសិន រហូតដល់មានបទបញ្ជាថ្មី-នេះជាការបញ្ជាក់របស់ក្រសួងការបរទេសសហរដ្ឋអាមេរិក។ ក្រសួងការបរទេសអាមេរិកថែមទាំងបានព្រមានរំលឹកដល់ពលរដ្ឋខ្លួនដែលមានគំរោងធ្វើដំណើរទៅកាន់យេមែនឲ្យពួកគេលើកផ្អាកការធ្វើដំណើរទៅពេលក្រោយ និងបានអំពាវនាវដល់អាណិជនជាតិអាមេរិកដែលកំពុងស្ថិតនៅប្រទេសយេមែនឲ្យប្រញាប់ប្រញាល់ចាកចេញពីប្រទេសនេះ ដោយយោងទៅលើសកម្មភាពភេរវនិយមកាន់តែកើនកម្រិតឡើងខ្ពស់។
ក៏ដូចសហរដ្ឋអាមេរិកដែរ ប្រទេសអង់គ្លេស តាមរយៈរដ្ឋមន្ត្រីទទួលបន្ទុកខាងកិច្ចការមជ្ឈិមបូព៌ាលោក Tobias Ellwood បានថ្លែងបញ្ជាក់នៅក្នុងសេចក្តីជូនដំណឹងមួយថា”ប្រទេសអង់គ្លេស បិទស្ថានទូតនិងដឹកជម្លៀសឯកអគ្គរាជទូតក៏ព្រមទាំងសមាជិកទូតទាំងអស់របស់អង់គ្លេសចេញពីទីក្រុងសាណាអានៅព្រឹកមិញ។ លោក Tobias Ellwood ថែមទាំងបានអំពាវនាវឲ្យអាណិកជនជាតិអង់គ្លេស ចាកចេញពីយេមែនជាបន្ទាន់ភ្លាមដែរ។
ចំណែកប្រទេសបារាំងវិញដែលមានអាណិកជនជាតិខ្លួនប្រមាណជា១០០នាក់នៅលើទឹកដីយេមែន ក៏ប្រកាសសុំឲ្យពលរដ្ឋបារាំង ប្រញាប់ចាកចេញពីយេមែនឲ្យបានយ៉ាងឆាប់រហ័សដែរ ដោយបានជូនដំណឹងផងដែរ ថា “ស្ថានទូតបារាំងនឹងបិទទា្វរជាបណ្តោះអាសន្នចាប់់ពីថ្ងៃសុក្រខាងមុខនេះទៅរហូតដល់មានបទបញ្ជាថ្មី។
នៅក្រុងប៊ែរ ឡាំង អ្នកនាំពាក្យម្នាក់នៃក្រសួងការបរទេសអាល្លឺម៉ង់ បានថ្លែងបញ្ជាក់ប្រាប់ដល់ទីភ្នាក់ងារព័ត៌មានបារាំង AFP ថា ប្រទេសអាល្លឺម៉ង់ មិនបិទទ្វារស្ថានទូតទេដោយអាល្លឺម៉ង់មានវិធានការសន្តិសុខគ្រប់គ្រាន់និងមានកម្រិតខ្ពស់រួចទៅហើយសំរាប់ការពារនៅជុំវិញសា្ថនទូតអាល្លឺម៉ង់នៅសាណាអា។ អាល្លឺម៉ង់គ្រាន់តែ ណែនាំយ៉ាងម៉ឺងម៉ាត់ដើម្បីកុំឲ្យពលរដ្ឋអាល្លឺម៉ង់ធ្វើដំណើរទៅកាន់យេមែន។
ប្រទេសយេមែនដែលកំពុងតែជួបភាពវឹកវរ ដោយសារតែសកម្មភាពអុកឡុកពីសំណាក់ពួកប្រដាប់អាវុធស៊ីអ៊ីតដ៏ខ្លាំងមួយដែលបានត្រួតត្រាជាអាទិ៍នៅក្រុងសាណាអានិងនៅតាមខេត្តនានាភាគខាងជើងប្រទេស។ ពួកនេះ បានបន្តការវាយប្រយុទ្ធតាំងពីថ្ងៃអង្គារម្សិលមិញនៅភាគកណ្តាលប្រទេសយេមែន ដោយវាយដណ្តើមកាន់កាប់បានក្រុងបៃដា ។ ពួកប្រដាប់អាវុធស៊ីអីតនេះដែលបានចូលទៅដល់ក្រុងសាណាអាតាំងពីខែកញ្ញាមុន បានប្រកាសនៅថ្ងៃសុក្រមុនថា « ពួកគេនឹងធ្វើការរំលាយសភាយេមែនចោលដោយ ដាក់តាំងនូវស្ថាប័នថ្នាក់ដឹកនាំថ្មីៗជាជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ