លោកSaleh វិលត្រឡប់មកប្រទេសវិញចំពេលកំពុងមានការប្រយុទ្ធគ្នា
បន្ទាប់ពីអវត្តមាននៅក្នុងប្រទេសជាង៣ខែមក លោក ប្រធានាធិបតីយេម៉ែន Ali Abdallah Salehបានត្រឡប់ចូលមកកាន់រដ្ឋធានី Sanaa វិញនៅថ្ងៃសុក្រ២៣កញ្ញាម្សិលមិញ។ លោក Salehបានអំពាវនាវឲ្យបក្សព័ន្ធគាំទ្រនិងពួកអ្នកប្រឆាំងលោក ផ្អាកឈប់បាញ់គ្នា។ ទោះបីជាមាន ការអំពាវនាវសន្តិភាពរបស់លោក Saleh នៅម្សិលមិញនេះក្តី ក៏នៅតែមានការវាយប្រយុទ្ធគ្នាយ៉ាងហិង្សារវាងកងទ័ពនិងក្រុមអ្នក ប្រឆាំងយេម៉ែន ជាហេតុបណ្តាលឲ្យស្លាប់មនុស្សចំនួន២៥នាក់។ នៅព្រឹកថ្ងៃសៅរ៍២៤កញ្ញានេះទៀត កងទ័ពយេម៉ែន បានចាប់បាញ់រះគ្រាប់ទៅលើទីតាំងរបស់ពួកអ្នកប្រឆាំង នៅតាមបណ្តោយផ្លូវដ៏ ធំ មួយក្នុងរដ្ឋធានី ជាហេតុបណ្តាល ឲ្យបាតុករម្នាក់ស្លាប់ និង ជម្លៀសបាតុករជាច្រើនពាន់នាក់ដែលស្ថិតនៅទីនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោកប្រធានាធិបតី យេម៉ែន Ali Abdallah Saleh ក្រោយពីបានជម្លៀសខ្លួនចេញពីប្រទេសមួយរយៈពេល ដើម្បីទទួលការព្យាបាលមុខរបួសនៅមន្ទីរពេទ្យនៅអារ៉ាប៊ីសាអ៊ូឌីត បន្ទាប់ពីបានរងរបួសនៅក្នុងអំពើភេរវកម្ម ប្រឆាំងវិមានប្រធានាធិបតី កាលពីថ្ងៃទី៣មិថុនាកន្លងផុតទៅ បានវិលចូលមកក្នុងប្រទេសវិញនៅថ្ងៃសុក្រម្សិលមិញ។ ទន្ទឹមនេះ លោក Saleh បានអំពាវនាវដល់គ្រប់គណបក្សនយោបាយនិងយោធា ឲ្យ ផ្អាកឈប់បាញ់គ្នា ដើម្បីអនុញ្ញាតឲ្យមានការរៀបចំ កិច្ចចរចាស្វែងរកសន្តិភាពនៅក្នុងប្រទេស។
តែការអំពាវនាវនេះ ជាការឥតប្រយោជន៍ ពីព្រោះកងទ័ពជើងឆើតរបស់ប្រទេសយេម៉ែន នៅព្រឹកថ្ងៃសៅរ៍២៤កញ្ញានេះ បានបាញ់ផ្លោងគ្រាប់បែកត្បាល់ និងពួនស្ទាក់បាញ់កាំភ្លើង ដើម្បីវាយ បំបែកខ្ចាត់ខ្ចាយ ពួកបាតុករ ជាច្រើនពាន់នាក់ ឲ្យរត់ផាសក្រញាំ ពី « ទីលានផ្លាស់ប្តូរ »។ទីលានផ្លាស់ប្តូរ ដែលពួកបាតុករប្រឆាំងនឹងរបបលោក សាឡេះ បានបោះទីតាំង ជាច្រើនខែមកហើយ នៅតាមបណ្តោយផ្លូវដ៏ធំមួយប្រវែង ៤គម ក្នុងរដ្ឋធានី Sanaa ។
ប្រតិបត្តិការវាយលុកនាថ្ងៃសៅរ៍នេះ បានបណ្តាលឲ្យស្លាប់មនុស្សចំនួន ១១ នាក់ និងរបួសជនចំនួន ១១២ នាក់ ដែលស្ថិតនៅក្នុងចំណោមពួកទាហានផ្តាច់ខ្លួន ។នេះបើយោងតាមអ្នកនាំពាក្យ របស់ពួកទាហានផ្តាច់ខ្លួនយេមែនដែល បញ្ជាក់ទៀតថា គ្រាប់ផ្លោងចំនួន ៦០ គ្រាប់ បានធ្លាក់ទៅលើ ទីលានផ្លាស់ប្តូរ ។
យ៉ាងណាមិញការវាយប្រយុទ្ធគ្នានៅក្នុងរដ្ឋធានី Sanaa បានបណ្តាលឲ្យមនុស្សស្លាប់អស់ជាង១០០នាក់ហើយចាប់តាំងពីដើមសប្តាហ៍មក។ ហើយចាប់តាំងពីការងើបបះបោររបស់ប្រជាជនយេម៉ែននៅខែមករាមក អំពើហិង្សានយោបាយនៅក្នុងប្រទេសនេះ បានបណ្តាលឲ្យមនុស្សស្លាប់ប្រមាណជា ៤៥០នាក់។
ម្យ៉ាងទៀត សំរាប់ អ្នកឯកទេសខាងផ្នែកជីវិតនយោបាយយេម៉ែន “ការវិលត្រឡប់របស់លោក Saleh មកក្នុងប្រទេសវិញ បន្ទាប់ពីបានកាន់កាប់អំណាច ៣៣ឆ្នាំ មក បើសិនជាគាត់នៅតែចង់បន្តការក្តោបក្តាប់អំណាចទៀត-នោះសង្គ្រាមបះបោ របស់ប្រជាជននឹងផ្ទុះឡើងវិញជាមិនខាន។
ចំណែក សហរដ្ឋអាមេរិកវិញ នៅថ្ងៃសុក្រម្សិលមិញនេះ បានអំពាវនាវឲ្យលោកប្រធានាធិបតីយេម៉ែនចុះហត្ថលេខាលើកិច្ចព្រមព្រៀងដែលតាក់តែងឡើងដោយក្រុមប្រឹក្សាសហប្រតិបត្តិការតំបន់ឈូងសមុទ្រពែ រ្ស(CCG) និងឲ្យបោះបង់ចោលអំណាចទៅ ដោយសុំឲ្យលោក Saleh រៀបចំបោះឆ្នោតប្រធានាធិបតីមួយ នៅមុនដំណាច់ឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ