ប្រធានាធិបតីយេម៉ែនត្រៀមចុះហត្ថលេខាលើកិច្ចព្រមព្រៀង ដើម្បីបិទបញ្ចប់វិបត្តិ
នៅថ្ងៃសៅរ៍ ទី២១ ឧសភាម្សិលមិញ ក្រុមអ្នកប្រឆំាងនៅក្នុងប្រទេសយេម៉ែនបានចុះហត្ថលេខាលើផែនការសន្តិភាពដែលស្នើឡើងដោយក្រុមប្រទេសនៅតំបន់ឈូងសមុទ្រពែក។ បើយោងតាមគណបក្សកាន់អំណាច លោក អាលី អាប់ដាឡា សាឡេះត្រៀមខ្លួននឹងចុះហត្ថលេខាលើផែនការសន្តិភាពនៅថ្ងៃអាទិត្យនេះ។ ផែនការសន្តិភាពដែលតម្រូវឲ្យលោកអាលី អាប់ដាឡា សាឡេះចុះចេញពីអំណាចក្នុងរយៈពេល ១ខែទៀតខាងមុខ។ យ៉ាងណាក៏ដោយ ទន្ទឹមនឹងការយល់ព្រមទទួលយកផែនការសន្តិភាពនោះ លោកប្រធានាធិបតីដែលបានកាន់អំណាចជាង ៣២ឆ្នំា ក៏បានលើកឡើងពីការរួមគំនិតក្បត់នឹងលោកផងដែរ។ គួរជម្រាបជូនថា ការចុះហត្ថលេខាលើផែនការសន្តិភាពនោះត្រូវបានប្រកាសលើកពេល អស់ជាច្រើនលើក ច្រើនសារមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
គិតមកទល់ថ្ងៃនេះ គឺមានរយៈពេលប្រមាណជា ១ខែ កន្លះមកហើយដែលកិច្ចព្រមព្រៀងដើម្បីបិទបញ្ចប់វិបត្តិនៅមិនទាន់អាចចូលជាធរមានបានទេ ដោយសារតែការចុះហត្ថលេខាលើកិច្ចព្រមព្រៀងនោះត្រូវបានលើកពេលម្តងហើយ ម្តងទៀត។ កិច្ចព្រមព្រៀងដើម្បីបិទបញ្ចប់វិបត្តិនយោបាយនៅក្នុងប្រទេសយេម៉ែន ត្រូវបានស្នើឡើងដោយក្រុមប្រឹក្សាសហប្រតិបត្តិការនៃក្រុមប្រទេសនៅតំបន់ឈូងសមុទ្រពែក។ កិច្ចព្រមព្រៀងដែលចែងថា ទីមួយ៖ រៀបចំឲ្យមានរដ្ឋាភិបាលផ្សះផ្សាមួយ ទីពីរ៖ ១ខែ បន្ទាប់ពីរដ្ឋាភិបាលផ្សះផ្សាបានបង្កើតឡើង លោកប្រធានាធិបតី អាលី អាប់ដាឡា សាឡេះ ត្រូវចុះចេញពីអំណាច និងទីបី៖ រៀបចំការបោះឆ្នោតជ្រើសរើសប្រធានាធិបតីថ្មី នៅ២ខែ ក្រោយពីការចាកចេញរបស់លោកអាលី អាប់ដាឡា សាឡេះ។ សូមរម្លឹកជូនថា ផែនការសន្តិភាពនេះបានកើតមានឡើង ជាថ្នូរនឹងការរក្សាអភ័យឯកសិទ្ធិទំាងស្រុងសម្រាប់លោកប្រធានាធីបតីអាលី អាប់ដាឡា សាឡេះ និងក្រុមជំនិតរបស់លោកទំាងអស់។
កន្លងមក លោកអាលី អាប់ដាឡា សាឡេះតែងតែទុកឲ្យវិបត្តិអូសបន្លាយដោយសង្ឃឹមថា ចលនារបស់ក្រុមអ្នកប្រឆំាងនឹងចុះខ្សោយនៅថ្ងៃណាមួយជាមិនខាន។ ប៉ុន្តែផ្ទុយទៅវិញ ពីមួយថ្ងៃ ទៅមួយថ្ងៃ ចលនាប្រឆំាងកាន់តែមានទំហំធំទៅៗ និងកាន់តែហិង្សាទៀតផង។ ម្យ៉ាងទៀត គណបក្សកាន់អំណាចតែងតែចេញមុខប្រកាសពីការរកឃើញកិច្ចព្រមព្រៀងជាមួយក្រុមអ្នកប្រឆំាង ដោយគេមិនដែលឃើញលោកអាលី អាប់ដាឡា សាឡេះចុះហត្ថលេខាជាផ្លូវការម្តងណាទេ។
ជាលើកទីមួយ នៅថ្ងៃសៅរ៍ ទី២១ ឧសភាម្សិលមិញ រូបលោកអាលី អាប់ដាឡា សាឡេះបានសន្យាថានឹងចុះហត្ថលេខាលើផែនការសន្តិភាពដែលស្នើឡើងដោយក្រុមប្រទេសនៅតំបន់ឈូងសមុទ្រពែក។ ប៉ុន្តែជាមួយគ្នានោះ លោក អាលី អាប់ដាឡា សាឡេះក៏បានឆ្លៀតលើកឡើងពីការរួមគំនិតក្បត់នឹងលោក និងការគំរាមជាថ្មីរបស់អាល់កៃដា ប្រសិនបើលោកចុះចេញពីអំណាច។
អ្វីដែលគេដឹង នៅថ្ងៃអាទិត្យ ទី២២ ឧសភានេះ ប្រជាជនយេម៉ែននំាគ្នាប្រារព្ធខួបលើកទី២១ នៃការបង្រួបបង្រួមប្រទេសយេម៉ែនតែមួយ កាលណោះនៅថ្ងៃទី២២ ឧសភា ឆ្នំា ១៩៩០ រវាងយេម៉ែនខាងជើង និងយេម៉ែនខាងត្បូង។ អ្វីដែលគេនៅមិនទាន់ដឹងនោះ ថាតើនៅថ្ងៃនេះ ប្រជាជនយេម៉ែនអាចនឹងប្រារព្ធការបញ្ចប់នៃរបបដឹកនំាជាង ៣២ឆ្នំារបស់លោក អាលី អាប់ដាឡា សាឡេះ ដែរ ឬយ៉ាងណា ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ