សហព័ន្ធស្រូវអង្ករកម្ពុជា៖ ការចុះតម្លៃស្រូវមិនអាក្រក់ដូចការផ្សាយតាមបណ្តាញសង្គម
សហព័ន្ធស្រូវអង្ករកម្ពុជា កាលពីថ្ងៃទី៦ ខែធ្នូ កត់សម្គាល់ថា តម្លៃស្រូវធ្លាក់ចុះតែបន្តិចបន្តួច តែមិនអាក្រក់ដូចការផ្សាយតាមប្រព័ន្ធបណ្តាញផ្សព្វផ្សាយសង្គម ហ្វេសប៊ុកនោះទេ។ ជាការលើកឡើងតបទៅនឹងការផ្សព្វផ្សាយតាមបណ្តាញសង្គម ដែលថាតម្លៃស្រូវនៅក្នុងប្រទេសកម្ពុជាបានធ្លាក់ថ្លៃក្នុងរដូវច្រូតកាត់នេះ។
ចុះផ្សាយនៅថ្ងៃ៖
ក្នុងកិច្ចប្រជុំក្រុមប្រឹក្សាភិបាលរបស់ខ្លួនកាលពីថ្ងៃទី៦ ខែធ្នូ សហព័ន្ធស្រូវអង្ករកម្ពុជា ឲ្យដឹងថា តម្លៃស្រូវគុណភាពល្អ ផ្កាម្លិះ ផ្ការំដួល និង សែនក្រអូប មានតម្លៃធ្លាក់ចុះបន្តិចបន្តួចប្រហែល១០០រៀលក្នុងមួយគីឡូក្រាម តែមិនអាក្រក់ដូចការផ្សាយតាមប្រព័ន្ធបណ្តាញផ្សព្វផ្សាយសង្គម ហ្វេសប៊ុកនោះទេ ដែលថាចុះថោករហូតដល់គ្មានទីផ្សារ។ សហព័ន្ធស្រូវអង្ករកម្ពុជា បញ្ជាក់ថារោងម៉ាស៊ីនកិនស្រូវក៏នៅមានតម្រូវការទិញស្រូវគុណភាពល្អច្រើនទៀតដែរ។
តម្លៃស្រូវដែលធ្លាក់ចុះនោះគឺជាស្រូវដែលមានគុណភាពអន់ (បាក់ច្រើន) អង្ករដើមភាគរយតិច ជាក់ស្តែងដូចជា ស្រូវម្លិះ និង សូម៉ាលីកន្លះ ក្នុងតំបន់មួយចំនួននៃខេត្តពោធិ៍សាត់គឺ មិនមានក្លិនក្រអូប អង្កររឹង ដែលអតិថិជនមិនទួលយកបាននៅទីផ្សារ។ គុណភាពស្រូវមកពីតំបន់ខ្លះនៃខេត្តបន្ទាយមានជ័យ និងសៀមរាប មានបញ្ហាផងដែរ ដោយសារគុណភាពបាក់ច្រើន និងជំងឺអុចលើគ្រាប់ស្រូវ។ នេះបើតាមសហព័ន្ធស្រូវអង្ករកម្ពុជា។
ក៏ប៉ុន្តែសហព័ន្ធស្រូវអង្ករ លើកឡើងថា ស្រូវនៅតំបន់មួយចំនួននៃខេត្តកំពង់ស្ពឺ តាកែវ កំពត និងខេត្តកណ្តាល គឺមានគុណភាពខ្ពស់ តម្លៃពេញ ហើយរោងម៉ាស៊ីនកិនស្រូវប្រមូលទិញមិនគ្រប់តម្រូវការនៅឡើយ។ ចំណែកតម្លៃ ស្រូវក្រអូបរបស់កម្ពុជា គឺមានតំលៃ ប្រហាក់ប្រហែលប្រទេសថៃ គឺ៧បាត ឬប្រហែល៩០០រៀល សំរាប់ប្រភេទពូជប្រហាក់ប្រហែលគ្នា។
លោក ភូ ពុយ ប្រធានសមាគមរោងម៉ាស៊ីនកិនស្រូវកម្ពុជាបានអះអាងថាការធ្លាក់ចុះតម្លៃស្រូវគឺមិនមែនដោយសារតែកង្វះថវិកាក្នុងការប្រមូលទិញស្រូវនោះទេ។ ប៉ុន្តែលោកបញ្ជាក់ថាការធ្លាក់ចុះតម្លៃស្រូវ គឺបណ្តាលមកពីគុណភាពស្រូវ និងកត្តារួមផ្សំ គឺតម្លៃស្រូវនៅលើទីផ្សារអន្តរជាតិ។ ចំណែកឯតម្លៃស្រូវ ដែលមានគុណភាពល្អ ឬជាប្រភេទស្រូវគុណភាពលេខ១វិញ គឺមានតម្លៃប្រហាក់ប្រហែលនឹងឆ្នាំមុន ពោលគឺមានតម្លៃ១ ១៥០ ០០០រៀន ក្នុងមួយតោន ប៉ុន្តែឆ្នាំនេះមិនមានប្រភេទស្រូវគុណភាពលេខ១ច្រើនទេ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បានអះអាងថា តម្លៃស្រូវក្រអូបនៅឆ្នាំនេះគឺមានការធ្លាក់ថ្លៃ ដោយលោកបានកត់សម្គាល់ថារឿងនេះ កើតឡើងបន្ទាប់ពីសហភាពអឺរ៉ុបបានយកពន្ធលើអង្កររបស់កម្ពុជា ដែលដាក់លក់នៅទីផ្សារអឺរ៉ុប។ ការធ្លាក់ថ្លៃស្រូវនេះ បានធ្វើឲ្យកសិករបង្ហាញនូវកង្វល់របស់ខ្លួនតាមរយៈបណ្តាញសង្គមនារយៈពេលចុងក្រោយនេះ។ នេះបើតាមលោក ថេង សាវឿន។
សូមជម្រាបជូនថា តម្លៃស្រូវផ្ការំដួលនៅឆ្នាំនេះគឺមានតម្លៃខ្ពស់បំផុតត្រឹមតែ ១ ០៤០រៀលមួយគីឡូក្រាម ធៀបនឹងឆ្នាំមុន ដែលមានតម្លៃប្រមាណពី ១ ២០០រៀល ទៅ១ ៣០០រៀល ក្នុងមួយគីឡូក្រាម។ នេះបើតាមប្រធានសម្ព័ន្ធសហគមន៍កសិករកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ