គុយបាចាប់ដៃវ៉េណេស៊ុយអេឡាប្រឆាំងនឹងវិធានការសហរដ្ឋអាមេរិក
នៅល្ងាចថ្ងៃចន្ទនិងថ្ងៃអង្គារម្សិលមិញ មានប្រតិកម្មខឹងសម្បារយ៉ាងខ្លាំងពីប្រទេសវ៉េណេស៊ុយអេឡា និងប្រទេសគុយបា ចំពោះក្រឹត្យរបស់លោកប្រធានាធិបតីអាមេរិក បារ៉ាក់ អូបាម៉ា ដែលបានចាត់ទុក ប្រទេសវ៉េណេស៊ុយអេឡា ថាជាការគំរាមកំហែងចំពោះសន្តិសុខរបស់សហរដ្ឋអាមេរិក និងដែលបានដាក់ទណ្ឌកម្មចំពោះសមាជិកនៃរដ្ឋាបាលវ៉េណេស៊ុយអេឡាចំនួន៧រូប ដោយក្នុងនោះក៏មានការបង្កកទ្រពសម្បត្តិ ហិរញ្ញវត្ថុរបស់ពួកគេនៅអាមេរិក។
ចុះផ្សាយនៅថ្ងៃ៖
ហេតុផលនៃក្រឹត្យរបស់លោកប្រធានាធិបតីអាមេរិក បារ៉ាក់ អូបាម៉ា ត្រូវបានពន្យល់ដោយ លោក Josh Earnest អ្នកនាំពាក្យសេតវិមាន ដែលបានសរសេរក្នុងសេចក្តីថ្លែងការណ៍ថា «មន្ត្រីថ្នាក់ដឹកនាំ វ៉េណេស៊ុយអេឡាបច្ចុប្បន្ន និងពីអតីត ដែលរំលោភលើសិទ្ធិរបស់ពលរដ្ឋវ៉េណេស៊ុយអេឡា និងដែលបានចូលរួមនៅក្នុងអំពើពុករលួយជាសាធារណៈ មិនត្រូវមានវត្តមាននៅទីនេះទេ ហើយឥឡូវយើងមានមធ្យោបាយដើម្បីបង្ខាំងទុកទ្រព្យសម្បត្តិរបស់ពួកគេដែលឋិតក្នុងប្រព័ន្ធហិរញ្ញវត្ថុអាមេរិកបាន »។
លោកបានបន្ថែមថា៖ «យើងមានការព្រួយបារម្ភយ៉ាងខ្លាំងអំពីការព្យាយាមរបស់រដ្ឋាភិបាល វ៉េណេស៊ុយអេឡា ក្នុងការបំភិតបំភ័យអ្នកប្រឆាំងខាងនយោបាយ កាន់តែខ្លាំងឡើងៗ។ បញ្ហា វ៉េណេស៊ុយអេឡា មិនអាចដោះស្រាយបាន ដោយការដាក់ទោសទណ្ឌលើគណបក្សប្រឆាំងនោះទេ»។
ការណ៍នេះបានបង្កឲ្យមានប្រតិកម្មយ៉ាងខ្លាំងក្លាជាបឋមពីប្រធានធិបតីវ៉េណេស៊ុយអេឡា លោក Nicolas Maduro ដែលបានចាត់ទុកវិធានការរបស់លោកអូបាម៉ាថា ជាទង្វើដ៏កំរោល អយុត្តិធម៌ និងអវិជ្ជមានបំផុត មិនធ្លាប់មានចំពោះប្រទេសវ៉េណេស៊ុយអេឡា។ លោក Maduro បានថ្លែងតាមវិទ្យុ និងទូរទស្សន៍កាលពីល្ងាចថ្ងៃចន្ទ តបទៅប្រធានធិបតីអាមេរិកថា ៖ លោកគ្មានសិទ្ធិឈ្លានពានលើយើងខ្ញុំ និងក៏គ្មានសិទ្ធិប្រកាសថាវ៉េណេស៊ុយអេឡាជាការគំរាមកំហែងមួយដល់ប្រជាជនអាមេរិកនោះដែរ ការគំរាមកំហែងដល់ប្រជាជនអាមេរិកនោះគឺជាលោកទៅវិញទេ។ លោក Maduro បានប្រកាសថា នៅថ្ងៃអង្គារ លោកនឹងស្នើទៅរដ្ឋសភាជាតិដើម្បីផ្តល់ឱ្យគាត់នូវអំណាចពិសេសដើម្បីឆ្លើយតបទៅនឹង "ការរំលោភឈ្លានពានចក្រពត្តិនិយម" នេះ។ ភ្លាមៗនោះដែរ ភារធារីវ៉េណេស៊ុយអេឡាប្រចាំក្រុង វ៉ាស៊ីនតោន ក៏ត្រូវបានហៅឲ្យធ្វើមាតុភូមិនិវត្តន៍ផងដែរ។
ចំណែកប្រទេសគុយបាវិញ ដែលទើបនឹងស្តារទំនាក់ទំនងឡើងវិញជាមួយសហរដ្ឋអាមេរិកកាលពីខែធ្នូឆ្នាំ ២០១៤កន្លងទៅ ក៏បានចេញមុខគាំទ្រ វ៉េណេស៊ុយអេឡាដែលជាប្រទេសសម្ព័ន្ធមិត្ត គាំទ្រនយោបាយ និងសេដ្ឋកិច្ចគុយបាតាំងពីជាង១៥ឆ្នាំ មកហើយនោះ។
តាមរយៈអត្ថបទមានចុះហត្ថលេខាដោយរដ្ឋាភិបាលគុយបា និងផ្សាយក្នុងសារពត៌មាន ក្នុងស្រុក រដ្ឋាភិបាលគុយបាបានចាត់ទុកសេចក្តីសម្រេចរបស់លោកអូបាម៉ា ជាសេចក្តីសម្រេចបំពាននិងគ្មានហេតុផល ដោយលើកឡើងថា ៖ គ្នាននរណាម្នាក់មានសិទ្ធិជ្រៀតជ្រែករឿងផ្ទៃក្នុងរបស់រដ្ឋអធិបតេយ្យមួយ ហើយចាត់ទុករដ្ឋនោះថា ជាការគំរាមកំហែងលើសន្តិសុខជាតិខ្លួនដោយគ្មានមូលដ្ឋានណាមួយនោះទេ។ ប្រទេសគុយបានិងប្រជាជនគុយបា សូមរំលឹកឡើងវិញពីការគាំទ្រដោយឥតលក្ខខណ្ឌ ចំពោះបដិវត្តន៍បូលីវ៉ារី ចំពោះរដ្ឋាភិបាលស្របច្បាប់របស់លោកប្រធានាធិបតី Nicolas Maduro និង ចំពោះប្រជាជនដែលជាបងប្អូនប្រកបដោយវីរភាពរបស់វ៉េណេស៊ុយអេឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ