តើគុយបានឹងទទួលបានប្រយោជន៍អ្វីខ្លះពីការស្តារទំនាក់ទំនងការទូតជាមួយសហរដ្ឋអាមេរិកឡើងវិញ?
ចុះផ្សាយនៅថ្ងៃ៖
ស្តាប់ - ០៤:២៧
ជំនួបកំពូលអាមេរិកទើបតែបានបិទបញ្ចប់កាលពីចុងសប្តាហ៍នេះ។ ជំនួបផ្លូវការជាប្រវត្តិសាស្រ្តរវាងលោកប្រធានាធិបតីអាមេរិក បារ៉ាក់ អូបាម៉ា និងលោកប្រធានាធិបតីគុយបា រ៉ាអ៊ូល កាស្រ្តូ បានក្លាយជាប្រធានបទសំខាន់ជាងគេបង្អស់។ អតីតសត្រូវក្នុងសម័យសង្គ្រាមត្រជាក់ សហរដ្ឋអាមេរិក និងគុយបាអាចនឹងបើកស្ថានទូតឡើងវិញនាពេលឆាប់ៗ។ បច្ចុប្បន្ននេះ ក្រុមការងារចរចារវាងប្រទេសទាំងពីរកំពុងជជែកពិភាក្សាបន្តដើម្បីបញ្ចប់ចំណុចលំអិតមួយចំនួន។ តើប្រទេសគុយបានឹងទួលបានអត្ថប្រយោជន៍អ្វីខ្លះពីការផ្សារភ្ជាប់ទំនាក់ទំនងជាមួយសហរដ្ឋអាមេរិក?
ជំនួបជាប្រវត្តិសាស្រ្តរវាងប្រមុខដឹកនាំអាមេរិក និងគុយបាក្នុងជំនួបកំពូលអាមេរិកលើកទី ៧ នៅប្រទេសប៉ាណាម៉ា បានបង្ហាញពីក្តីសង្ឃឹមដល់សេដ្ឋកិច្ចរបស់ប្រទេសគុយបា ជាពិសេសជីវភាពរស់នៅរបស់ប្រជាជនគុយបា។ ការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិកប្រឆាំងនឹងកោះកុម្មុយនិស្តមួយនេះ ពិសេសការដាក់អោយប្រទេសនេះស្ថិតក្នុងភាពឯកោត្រូវបានគេមើលឃើញថាគ្មានប្រសិទ្ធិភាពអ្វីបន្តិចសោះ។ សូម្បីតែសហគមន៍អន្តរជាតិទាំងមូលក៏មិនយល់ស្របតាមអាមេរិកដែរ។ មុនកិច្ចប្រជុំកំពូលអាមេរិក បណ្តាប្រទេសនៅទ្វីបអាមេរិកឡាទីនបានគំរាមធ្វើពហិការមិនចូលប្រជុំ ប្រសិនបើមិនមានវត្តមានប្រទេសគុយបា។
កាលពីខែតុលា ឆ្នាំ២០១៤ មានប្រទេសចំនួន ១៨៨ ក្នុងចំណោមប្រទេសសមាជិកទាំងអស់របស់អង្គការសហប្រជាជាតិបានបោះឆ្នោតប្រឆាំងនឹងទណ្ឌកម្មសេដ្ឋកិច្ចរបស់អាមេរិកមកលើប្រទេសគុយបា។ ដូចនេះ សហរដ្ឋអាមេរិករបស់លោក អូបាម៉ាចង់មិនចង់ត្រូវសំរបខ្លួនទៅតាមរបត់ថ្មីរបស់ពិភពលោក។ ខណៈពេលទន្ទឹងរង់ចាំការស្តារទំនាក់ទំនងការទូតរវាងគុយបា និងសហរដ្ឋអាមេរិកឡើងវិញ មជ្ឈដ្ឋានអ្នកជំនួញមកពីវិស័យផេ្សងៗកំពុងសំឡឹងមើលឱកាសថ្មីក្នុងការបោះទុនវិនិយោគ។
វិស័យទេសចរណ៍នឹងរីកលូតលាស់
បណ្តាអ្នករកស៊ីក្នុងវិស័យទេសចរណ៍កំពុងប្រមើលមើលសក្តានុពលធម្មជាតិឆ្នេរសមុទ្ររបស់ប្រទេសគុយបា។ ចាប់តាំងពីការដាក់ទណ្ឌកម្មកាលពីឆ្នាំ ១៩៦២ សហរដ្ឋអាមេរិកបានដាក់បំរាមមិនអោយពលរដ្ឋខ្លួនធ្វើដំណើរជាលក្ខណៈទេសចរឡើយ។ មានតែការធ្វើដំណើរបែបអប់រំ សាសនា កីឡា និងសិល្បៈប៉ុណ្ណោះត្រូវបានអនុញ្ញាត។ នៅសហរដ្ឋអាមេរិក មតិសាធារណជនហាក់ពុំយល់ពីជំហររបស់រដ្ឋាភិបាលខ្លួន។ ផ្ទុយពីប្រទេសគុយបា ពលរដ្ឋអាមេរិកមានសិទ្ធិធ្វើដំណើរកំសាន្តទៅកាន់ប្រទេសកុម្មុយនិស្តផ្សេងទៀត ដូចជា ចិន កូរ៉េខាងជើង និងវៀតណាម ជាដើម។
ជារៀងរាល់ឆ្នាំ មានជនជាតិអាមេរិកចំនួន ១ សែននាក់ធ្វើដំណើរទៅប្រទេសគុយបា។ ទីភ្នាក់ងារទេសចរណ៍ Insight Cuba មានមូលដ្ឋាននៅទីក្រុងញូវយ៉កបានទស្សន៍ទាយថា ចំនួនភ្ញៀវទេសចរអាមេរិកនឹងកើនឡើងខ្ពស់ នារដូវកាលសំបូរភ្ញៀវខាងមុខ ពោលគឺ ចាប់ពីខែឆ្នូដល់ខែឧសភា។ លោក Tom Popper ប្រធានក្រុមហ៊ុននេះសង្ឃឹមថា ការដកទណ្ឌកម្មអាមេរិកនាពេលខាងមុខនឹងបង្កើនចំនួនទេសចរណ៍អាមេរិកទ្វេជាបី ឬបួនដង។ ម៉្យាងទៀត កប៉ាល់ទេសចរណ៍មកពីសហរដ្ឋអាមេរិកក៏នឹងកើនឡើងផងដែរ។ អ្នកស្រី Alina Fernandez ប្រធានទីភ្នាក់ងារទេសចរណ៍ Cuba Travel USA ក៏យល់ស្របដូចគ្នាផងដែរ ប៉ុន្តែ អ្នកស្រីសំដែងក្តីព្រួយបារម្ភជុំវិញការខ្វះបន្ទប់ស្នាក់នៅសំរាប់ភ្ញៀវទេសចរណ៍។ សូមបញ្ជាក់ថា សព្វថ្ងៃនេះ គុយបាទទួលភ្ញៀវទេសចរណ៍មកពីជុំវិញពិភពលោកចំនួន ៣ លាននាក់ក្នុងមួយឆ្នាំ។
វិស័យទូរគមានគមន៍
វិស័យទូរគមនាគមន៍ត្រូវបានគេរំពឹងទុកថានឹងមានសន្ទុះកើនឡើងខ្លាំង។ ចាប់តាំងពីខែមិនាកន្លងទៅនេះ ការភ្ជាប់បណ្តាញទំនាក់ទំនងតាមទូរស័ព្ទឡើងវិញត្រូវបានធ្វើជាមួយសហរដ្ឋអាមេរិក។ ប្រទេសទាំងពីរបានផ្តាច់សេវាកម្មនេះទាំងស្រុងចាប់តាំងពីឆ្នាំ ១៩៩៩ មកម្ល៉េះ។ កិច្ចព្រមព្រៀងទ្វេភាគីមួយត្រូវបានចុះហត្ថលេខារវាងក្រុមហ៊ុនរដ្ឋរបស់គុយបា Etecsa និងក្រុមហ៊ុនឯកជនអាមេរិក IDT Domestic Telecom។ នេះជាកិច្ចព្រមព្រៀងពាណិជ្ជកម្មដំបូងគេបង្អស់រវាងក្រុមហ៊ុនអាមេរិក និងគុយបា ក្រោយពីការប្រកាសការផ្សារភ្ជាប់ទំនាក់ទំនងរវាងប្រទេសទាំងពីរឡើងវិញ ចាប់តាំងពីថ្ងៃទី ១៧ ខែធ្នូ ឆ្នាំ២០១៤។ ប៉ុន្តែ កិច្ចព្រៀមព្រៀងនេះផ្តោតតែលើការហៅទូរស័ព្ទចេញចូលពីចម្ងាយប៉ុណ្ណោះរវាងអាមេរិក និងគុយបា។
មុនការចុះហត្ថលេខាលើកិច្ចព្រមព្រៀងនេះ កាលពីមុន ការហៅទូរស័ព្ទចេញចូលរវាងប្រទេសទាំងពីរត្រូវឆ្លងកាត់តាមប្រទេសផ្សេងទៀត។ ការធ្វើបែបនេះបានធ្វើអោយតម្លៃសេវាកម្មទូរស័ព្ទអាមេរិក-គុយបាឡើងថ្លៃខ្ពស់ពុំសូវមានអ្នកប្រើប្រាស់ទេ។ គេសំឡឹងឃើញថា តំរូវការផែ្នកសេវាកម្មទូរស័ព្ទនេះមានទំហំធំមហិមា ព្រោះមានសហគមន៍ជនជាតិគុយបាចំនួន ២ លាននាក់កំពុងរស់នៅសហរដ្ឋអាមេរិក។ គេរំពឹងទុកថា សេវាកម្មផែ្នកទូរគមនាគមន៍ផ្សេងៗទៀតនឹងលេចចេញរូបរាងជាហូរហែ។ គិតមកដល់ពេលនេះ សេវាកម្មប្រៃសណីយ៍រវាងប្រទេសទាំងពីរពុំទាន់ដំណើរការឡើងវិញទេ។
គេក៏សង្ឃឹមផងដែរការវិនិយោគលើសេវាកម្មអ៊ីនធឺនែតនឹងរីកដុះដាលដូចផ្សិតផងដែរ។ សហរដ្ឋអាមេរិកបានបន្ធូរបន្ថយលក្ខខណ្ឌមួយចំនួន ដោយអនុញ្ញាតអោយនាំចេញឧបករណ៍ និងគ្រឿងបរិក្ខាអ៊ីនធឺនែតទៅកាន់ប្រទេសគុយបា។ ប្រជាជនគុយបានឹងអាចមានសេវាកម្មអ៊ីនធឺនែតប្រើប្រាស់ដូចគេឯង។ សព្វថ្ងៃនេះ មានប្រជាជនគុយបាប្រមាណតែ ៣,៤ % ប៉ុណ្ណោះអាចប្រើប្រាស់អ៊ីនធឺនែតនៅតាមផ្ទះ។
ទាក់ទាញការវិនិយោគបរទេស
នៅសហរដ្ឋអាមេរិក បណ្តាក្រុមអ្នកជំនួញមកពីសភាពាណិជ្ជកម្មអាមេរិក និងសមាគមម្ចាស់រោងចក្រប្រាថ្នាចង់អោយទំនាក់ទំនងរវាងអាមេរិក និងគុយបាមានភាពប្រសើរជាប្រក្រតីឡើងវិញ។ គេយល់ឃើញថា ទណ្ឌកម្មអាមេរិកកាលពី ៥២ ឆ្នាំមុនពុំបានផ្លាស់ប្តូររបបដឹកនាំទីក្រុងឡាហាវ៉ានឡើយ។ ក្រុមហ៊ុនអាមេរិកធំៗបានបាត់បង់ផលប្រយោជន៍ជាច្រើន បណ្តោយអោយក្រុមហ៊ុនបរទេសមកពីអាស៊ី អឺរ៉ុប និងអាមេរិកឡាទីនវាយលុកទីផ្សារគុយបា ដែលមានប្រជាជន ១១ លាននាក់។ ក្រុមហ៊ុនអាមេរិកមានការសោកស្តាយ ព្រោះគុយបាស្ថិតនៅចំងាយប្រមាណតែ ២០០ គីឡូម៉ែត្រប៉ុណ្ណោះពីឆ្នេរសមុទ្ររបស់ខ្លួន។
បើតាមលោក Rodrigo Malmierca រដ្ឋមន្រ្តីក្រសួងពាណិជ្ជកម្មគុយបាបានអោយដឹងថា ប្រទេសរបស់ខ្លួនត្រូវការទុនវិនិយោគពីបរទេសចំនួន ២,៥ ពាន់លានដុល្លារ។ ទុនវិនិយោគនេះអាចជួយបង្កើនកំណើនសេដ្ឋកិច្ចគុយបា ជាពិសេសជួយជ្រោមជ្រែងដល់ការអភិវឌ្ឈន៍ប្រកបដោយនិរន្តរភាព។ បើតាមមន្រ្តីជាន់ខ្ពស់រូបនេះ គុយបាមានគំរោងចំនួន ២៧៤ ក្នុងវិស័យចំនួន ១១ ក្នុងនោះមានដូចជាថាមពលបង្កើតថ្មី កសិចំណីអាហារ សំណង់ រ៉ែ និងទេសចរណ៍។ សព្វថ្ងៃនេះ គុយបាមានទំនាក់ទំនងពាណិជ្ជកម្មជាមួយ ៧៥ ប្រទេស។ រយៈពេល ១០ ឆ្នាំចុងក្រោយនេះ ការដោះដូរពាណិជ្ជកម្មរបស់គុយបាបានកើនឡើងទ្វេជាបីដង។ ហើយ គុយបាមានកំណើនសេដ្ឋកិច្ចប្រចាំឆ្នាំជាមធ្យមចំនួន ៤,៩%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ