ជំនួបកំពូលអាមេរិក ទីណាត់ជួបជាប្រវត្តិសាស្ត្ររវាងសហរដ្ឋអាមេរិកនិងគុយបា
ជំនួបកំពូលអាមេរិក ដែលកំពុងប្រព្រឹត្តទៅនៅ ប្រទេសប៉ាណាម៉ា ចាប់ពីថ្ងៃសុក្រដល់ថ្ងៃសៅរ៍ទី ១០-១១ មេសា អាចចាត់ទុកថាមានលក្ខណៈប្រវត្តិសាស្ត្រមួយស្រាប់ទៅហើយ ព្រោះនេះជាលើកទីមួយដែលគុយបា បានចូលរួមប្រជុំជាមួយគេឯង។ អ្វីជាការកត់សម្គាល់ កាន់តែខ្លាំងបន្ថែមទៀត ក្នុងជំនួបដែលមានប្រមុខរដ្ឋប្រមុខរដ្ឋាភិបាល៣៥ប្រទេសនៃទ្វីបអាមេរិក ណាត់ជួបគ្នា អាចនឹងមានជំនួបរវាងប្រធានាធិបតីអាមេរិក លោក បារ៉ាក់ អូបាម៉ា និងសមភាគីគុយប៉ាទៀត។ ជាជំនួបមួយទល់នឹងមួយ ? ឬជាត្រឹមជាការចាប់ដៃ ? ភាគីទាំងពីរមិនបានបង្ហើបព័ត៌មានអ្វីឱ្យធ្លាយមកក្រៅទេ នៅម៉ោងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៦
ជំនួបកំពូលអាមេរិក ថ្ងៃសុក្រទី១០មេសា នេះ ជាជំនួប លើកទី ៧ ដែលចូលរួមដោយបណ្តាប្រទេសចំនួន៣៥ នៃទ្វីបអាមេរិក និងអាមេរិកឡាទីន។ ជំនួបកំពូលនេះ ដែលជាការជួបប្រជុំផ្លូវការរវាងប្រមុខរដ្ឋប្រមុខរដ្ឋាភិបាល មកពីអាមេរិកខាងជើង អាមេរិកកណ្តាល និងអាមេរិកខាងត្បូង បានប្រព្រឹត្តទៅជាលើកទីមួយ នៅឆ្នាំ ១៩៩៤ នៅសហរដ្ឋអាមេរិក។ ប៉ុន្តែគុយបា មិនត្រូវបានអនុញ្ញាតឱ្យចូលរួមនឹងគេឡើយ។ អង្គការរដ្ឋអាមេរិក ដែលជាផ្លូវការ ជាអ្នកផ្តួចផ្តើមរៀបចំជំនួបកំពូលនេះ បានបណ្តេញគុយបាចេញតាំងពីឆ្នាំ១៩៦២ មកស្របតាមការស្នើសុំរបស់សហរដ្ឋអាមេរិក។ នៅឆ្នាំ២០០៩ អង្គការបានហៅគុយបា ឱ្យចូលក្រុម ប៉ុន្តែក្រុងឡាហាវ៉ាន មិនអើពើ។ ហើយកាលពីជំនួបកំពូលលើកមុន នៅឆ្នាំ២០១២ ក្រុមប្រទេសនៃទ្វីបអាមេរិកឡាទីន ខ្លះបានព្រមានធ្វើពហិការមិនចូលរួមដែរ ប្រសិនបើគុយបា នៅតែបន្តនៅក្រៅសង្វៀន។
ហេតុដូច្នេះហើយបានជាវត្តមានគុយបា នៅក្នុងជំនួបកំពូលឆ្នាំនេះ បានទទួលការចាប់អារម្មណ៍ខ្លាំង និងខ្លះចាត់ទុកព្រឹត្តិការណ៍ប្រវត្តិសាស្ត តែជំនួបប្រព្រឹត្តទៅក្នុងបរិបទមួយដែលកំណើនសេដ្ឋកិច្ចតំបន់ធ្លាក់ចុះ ប្រេស៊ីលដែលជាក្បាលម៉ាស៊ីនដឹកនាំអាមេរិកឡាទីនក៏ចុះខ្សោយ និងប្រលាក់ប្រឡូសដោយទំនាក់ទំនងអាប់អួររវាងសហរដ្ឋអាមេរិក និងវ៉េណេស៊ុយអេឡា។
ប្រមុខការទូតអាមេរិកនិងគុយបា ជួបគ្នាជាលើកដំបូង
ជំនួបកំពូលអាមេរិកលើកនេះ ត្រូវបានសម្គាល់ជាពិសេសដោយវត្តមានគុយបាផង និងពិសេសវត្តមានរួមគ្នា របស់ប្រធានាធិបតីអាមេរិក លោក បារ៉ាក់ អូបាម៉ា ក្បែរប្រធានាធិបតីគុយបា។
ក្នុងពេលរង់ចាំ នៅល្ងាចថ្ងៃព្រហស្បតិ៍ម្សិលមិញ មុនជំនួបកំពូល បើកជាផ្លូវការ លោកប្រមុខការទូតអាមេរិក ចន ឃែរី បានជួបជាមួយសមភាគីគុយបាលោក Bruno Rodriguez ដើម្បីបូកសរុបការងារស្តីពីដំណើរឆ្ពោះទៅរកទំនាក់ទំនងជាធម្មតានឹងគ្នាឡើងវិញ។ នេះក៏ជាលើកទីមួយដែរ ដែលរដ្ឋមន្ត្រីការបរទេសប្រទេសទាំងពីរនិយាយរកគ្នា គិតចាប់តាំងពីជាងកន្លះសតវត្សរ៍មក។ គេនៅចាំបានថាប្រមុខការទូតអាមេរិកនិងគុយបា បានជួបគ្នា ជាចុងក្រោយបំផុតនៅថ្ងៃទី ២២កញ្ញាឆ្នាំ១៩៥៨ បន្ទាប់មកទំនាក់ទំនងក៏ធ្លាកចុះជាលំដាប់រហូតដាច់គ្នាទាំងស្រុងនៅឆ្នាំ១៩៦១។
បើតាមប្រភពរដ្ឋាភិបាលអាមេរិក ជំនួបយប់មិញនេះ ជាជំនួបដែលមានលក្ខណៈស្ថាបនាបំផុត និងមានរយៈពេលដល់ទៅជាងពីរម៉ោង។ អាមេរិកបានបង្ហើបអំពីលទ្ធភាពចង់ដកគុយបា ចេញពីបញ្ជីឈ្មោះប្រទេសគាំទ្រភេរវនិយម។ ប្រមុខការទូតទាំងពីរបានសន្យាបន្តធ្វើការរួមគ្នាដើម្បីដោះស្រាយបញ្ហាជាប់គាំង មួយចំនួនទៀត។
ដំណើរផ្លូវនៅវែងឆ្ងាយ
មរតកនៃសង្គ្រាមត្រជាក់បានបន្សល់ទុកនូវចំណុចខ្វែងគ្នាជាច្រើន ឱ្យអាមេរិកនិងគុយបា សម្រុះសម្រួលគ្នា។ ខាងគុយបា លោក រ៉ាអ៊ូល កាស្ត្រូ បានប្រឹងប្រែងធ្វើកំណែទម្រង់ ដើម្បីបើកចំហសេដ្ឋកិច្ច ដែលត្រួតត្រាដោយរដ្ឋ និងដែលជិតស្ងួតឆ្នាំង។ គុយបាត្រូវការមានប្រាក់មានរូបិយបណ្ណ ត្រូវការខ្សល់ថ្មីសម្រាប់ពលរដ្ឋដកដណ្តើម និងបន្ធូរសម្ពាធដែលឡើងតានតឹងជារៀងរាល់ថ្ងៃ។
ការខិតចូលជិតគ្នាជាលទ្ធផលនៃការចរចាយ៉ាងសម្ងាត់រវាងវ៉ាស៊ីនតោននិងឡាហាវ៉ាន សូម្បីដែលវ៉េណេស៊ុយអេឡា ប្រទេសជាមិត្តជិតស្និទ្ធខ្លាំងបំផុតរបស់គុយបា ក៏មិនត្រូវបានឱ្យដឹងផង។ លោកអូបាម៉ា បានចាប់ដៃលោក កាស្ត្រូ ជាលើកទីមួយ ក្រោមក្រសែភ្នែកភ្ញាក់ផ្អើលរបស់ពិភពលោក នៅពេលទៅគោរពវិញ្ញាណក្ខន្ធលោកនែលស៊ុន មង់ដឺឡា កាលពីឆ្នាំ២០១៣។ មួយឆ្នាំកន្លង នៅថ្ងៃទី ១៧ ធ្នូ ២០១៤ ក្នុងពេលតែមួយ លោកអូបាម៉ា និងកាស្ត្រូ បានប្រកាសភ្ជាប់ទំនាក់ទំនងនឹងគ្នាឡើងវិញបន្ទាប់ពីកាត់ផ្តាច់អស់៥៤ឆ្នាំ។
តាំងពីនោះមក វ៉ាស៊ីនតោន និងឡាហាវ៉ាន បានរៀបចំជំនួបជាផ្លូវការបីលើក។ ទណ្ឌកម្មប្រឆាំងនឹងគុយបាខ្លះត្រូវបានអាមេរិកលើកចេញ។ លោក អូបាម៉ា ដែលចង់បន្សល់ទុកកេរ្ត៍ឈ្មោះនយោបាយក្នុងប្រវត្តិសាស្ត្រមនុស្សជាតិ ចង់ឃើញទង់ជាតិអាមេរិកនិងគុយបា បង្អូតក្នុងស្ថានទូតប្រទេសរៀងខ្លួនៗ ឱ្យបានមុនជំនួបអាមេរិកនេះ ប៉ុន្តែមិនអាចសម្រេចបាន ព្រោះនៅមានឧបសគ្គជាច្រើនរាំងផ្លូវ។ គុយបា បានដាក់លក្ខខណ្ឌ ថាត្រូវដកគុយបាចេញពីបញ្ជីឈ្មោះប្រទេសគាំទ្រភេរវកម្មសិន ទើបព្រមឱ្យមានបើកស្ថានទូត។
គុយបាដែលរាប់អានអ៊ីរ៉ង់ ស៊ីរី ស៊ូដង់ ត្រូវបានបញ្ជូលទៅក្នុងបញ្ជីខ្មៅ នៅឆ្នាំ១៩៨២ ជាប្រទេសគាំទ្រចលនាបដិវត្តកុម្មុយនិស្តនៅអាហ្វ្រិកនិងអាមេរិកឡាទីន។ ក្រសួងការបរទេសអាមេរិក បានបង្ហើបអនុសាសន៍ឱ្យដកគុយបាចេញពីបញ្ជីនេះហើយ ប៉ុន្តែសភាអាមេរិកបើទោះបីជាមិនប្រឆាំង ក៏អនុសាសន៍នោះត្រូវឆ្លងកាត់ការត្រួតពិនិត្យដែលមានរយៈ៤៥ថ្ងៃ មុនអាចមានសុភពភាពបាន។ ឧបសគ្គដ៏ធំមួយទៀត គឺការលើកទណ្ឌកម្មចេញ ពីគុយបាទាំងស្រុង តែនេះជាសមត្ថកិច្ចរបស់សភាអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ