តើនឹងមានអ្វីប្តូរផ្លាស់ បន្ទាប់ពីអាមេរិកនិងគុយបាភ្ជាប់ទំនាក់ទំនងជាធម្មតានឹងគ្នាឡើងវិញ ?
ចុះផ្សាយនៅថ្ងៃ៖
ស្តាប់ - ០៦:៥៧
ជាប្រវត្តិសាស្ត្រ ! នេះជាពាក្យដែលស្ទើរគ្រប់សារព័ត៌មានលើលោកបានប្រើ សម្រាប់វាយតម្លៃការភ្ជាប់ទំនាក់ទំនងជាធម្មតានឹងគ្នាឡើងវិញ រវាងសហរដ្ឋអាមេរិក និងគុយបា។ ដោយឥទ្ធិពលនៃសង្គ្រាមត្រជាក់ អាមេរិកនិងគុយបាបានផ្តាច់ចំណងការទូត តាំងពីឆ្នាំ ១៩៦១មក។ នៅ រសៀលថ្ងៃពុធទី ១៧ ធ្នូម្សិលមិញ លោកប្រធានាធិបតីអាមេរិកអូបាម៉ា បានប្រកាសបើកទំព័រថ្មីជាមួយគុយបា។ ហើយក្នុងពេលទន្ទឹមគ្នាតែម្តង នៅទីក្រុងឡាហាវ៉ាន លោកប្រធានាធិបតី រ៉ាអ៊ូល កាស្ត្រូ បានថ្លែងសរសើរការផ្សារភ្ជាប់ទំនាក់ទំនងជាប្រវត្តិសាស្ត្រឡើងវិញជាមួយអាមេរិក តែក៏បានគូសបញ្ជាក់ថាបញ្ហាទណ្ឌកម្មដែលអាមេរិកដាក់ប្រឆាំងនឹងគុយបា តាំងពីឆ្នាំ១៩៦២មក មិនទាន់ដោះស្រាយចេញទេ។
“Todos Somos Americanos » យើងសុទ្ធតែជាអាមេរិកកាំងដូចគ្នា ! នេះជាការប្រកាសរបស់លោកប្រធានាធិបតីអាមេរិក បារ៉ាក់អូបាម៉ា ជាភាសាអេស្ប៉ាញ មុននឹងបន្ថែមទៀតថា ដល់វេលាដែលត្រូវបើកទំព័រថ្មី។
គឺការផ្តោះប្តូរអ្នកទោស ដែលជាបុព្វហេតុនាំឱ្យអតីតគូសត្រូវអាមេរិកគុយបា ខិតចូលជិតគ្នាវិញ ៖ គុយបាបានដោះលែងអ្នកទោសអាមេរិកម្នាក់ ហើយអាមេរិកបានដោះលែងអ្នកទោសគុយបាបីនាក់វិញ ជាថ្នូរ។ អ្នកទោសឈ្លបការណ៍ ជាឧបសគ្គចុងក្រោយនៃការចាប់ផ្តើមចរចាលើកទណ្ឌកម្មអាមេរិកចេញពីគុយបា។
តួនាទីគន្លឹះរបស់សម្តេចប៉ាប
តាំងពីឆ្នាំ២០០៩មក គេឃើញសហរដ្ឋអាមេរិករបស់លោកអូបាម៉ា បានបង្ហាញកាយវិការជាច្រើន ក្នុងចេតនា ផ្សះផ្សាទំនាក់ទំនងជាមួយនឹងគុយបាឡើងវិញ។ ការចរចាជាសម្ងាត់បានប្រព្រឹត្តទៅតាំងពីដើមឆ្នាំ២០១៤នេះមក ហើយសម្តេចប៉ាប ហ្វ្រង់ស័រ បានដើរតួនាទីយ៉ាងសំខាន់ ក្នុងការរុញច្រានភាគីទាំងពីរ អាមេរិកនិងគុយបា ឱ្យសម្រេចភ្ជាប់ទំនាក់ទំនងគ្នាឡើងវិញនៅពេលនេះ។
សូមបញ្ជាក់ថាអាមេរិកនិងគុយបា បានកាត់ផ្តាច់ទំនាក់ទំនងការទូតទាំងស្រុង នៅឆ្នាំ ១៩៦១ នៅពេលដែលគុយបា បានជ្រើសរើសអោបសហភាពសូវៀត ដើម្បីប្រឆាំងនឹងលុកលុយរបស់អាមេរិក។ ការទូតត្រូវផ្តាច់ ទំនាក់ទំនងរវាងប្រទេសទាំងពីរក៏កាន់តែតានតឹងជាលំដាប់ មួយឆ្នាំក្រោយមកសភាអាមេរិកបានសម្រេចដាក់ទណ្ឌកម្មប្រឆាំងនឹងគុយបារហូតមកទល់នឹងពេលបច្ចុប្បន្ននេះ។
នៅរាល់ពេលដែលសហរដ្ឋអាមេរិក មានប្រធានាធិបតី ជាអ្នកប្រជាធិបតេយ្យ គុយបាតែងសម្លឹងឃើញឱកាសថាអាចនឹងចរចាបន្ធូរបន្ថយសម្ពាធនឹងគ្នាបាន។ ម្យ៉ាងទៀត បរិបទអន្តរជាតិក៏បានប្តូរផ្លាស់ ព្រោះបើតាមលោកអូបាម៉ា អាមេរិកអាចភ្ជាប់ទំនាក់ទំនងជាមួយចិនប្រទេសកុម្មុយនិស្តដ៏ធំបំផុតនៅលើលោកបាន តាំងពីជិត៣០ឆ្នាំ និងជាមួយវៀតណាមដែលធ្លាប់ធ្វើសង្គ្រាមគ្នា តាំងពីជាច្រើនឆ្នាំមកហើយ ហេតុអ្វីមិនកើតជាមួយគុយបា ?! គុយបា ដែលមានទីតាំងនៅជិតបង្កើយនឹងអាមេរិក និងមានទីតាំងជាយុទ្ធសាស្ត្រ មិនគួរអាមេរិកទុកបណ្តោយយូរ អោយប្រេស៊ីលប្រទេសកំពុងអភិវឌ្ឍន៍ខ្លាំងទាញយកចំណេញពីគុយបាបានឡើយ។
ការប្តូរផ្លាស់
ក្នុងសភាពជាក់ស្តែង សហរដ្ឋអាមេរិកនឹងបើកស្ថានទូតរបស់ខ្លួនឡើងនៅក្រុងឡាហាវ៉ាន ក្នុងពេលដ៏ឆាប់ៗខាងមុខ តាមដែលអាចធ្វើទៅបាន។ ហើយគុយបានឹងបើកទូតរបស់ខ្លួនវិញនៅវ៉ាស៊ីនតោន។ អ្នកទទួលខុសត្រូវជាន់ខ្ពស់ប្រទេសទាំងពីរ នឹងផ្តើមទាក់ទងធ្វើការរួមគ្នាលើសំណុំរឿងសំខាន់ៗដូចជាអន្តោប្រវេសន៍ ការប្រយុទ្ធប្រឆាំងនឹងជួញដូរគ្រឿងញៀន មនុស្ស។ លោក អូបាម៉ាអាចនឹងអញ្ជើញទៅបំពេញទស្សនកិច្ចនៅក្រុងឡាហាវ៉ានក៏ថាបាន។
រដ្ឋាភិបាលអាមេរិកនឹងបន្ធូរបន្ថយលក្ខខណ្ឌធ្វើដំណើរខ្លះ។ ដំណើរទេសចរណ៍ទៅកាន់កោះគុយបា នៅតែហាមឃាត់ដដែលសម្រាប់ពេលនេះ។ ប៉ុន្តែ ការទៅសួរសុខទុក្ខ អ្នកកាសែត អ្នកវិទ្យាសាស្ត្រ ទស្សនកិច្ចផ្លូវការ ផ្នែកសង្គម ការងារ សាសនា កីឡាឬមនុស្សធម៌ អាចនឹងត្រូវសម្រួល ឬត្រូវអនុញ្ញាត។
ពាណិជ្ជកម្ម សំណង់ ឧស្សាហកម្ម កសិកម្ម ទូរគមនាគមន៍ ហិរញ្ញវត្ថុ នឹងបើកទូលាយ ព្រោះគុយបា កំពុងស្រេកឃ្លានខ្លាំងណាស់ក្នុងវិស័យទាំងអស់នេះ។ ធនាគារអាមេរិកអាចធ្វើការជាមួយគណនីនៅគុយបា និងពិសេសពលរដ្ឋអាមេរិកអាចផ្ទេរប្រាក់ទៅគុយបា បានដល់២០០០ដុល្លារ ក្នុងត្រីមាស (ទល់នឹង៥០០ដុល្លារ កាលពីពេលមុន) និងដោយមិនបាច់សុំការអនុញ្ញាតជាមុនទេ។ សូមបញ្ជាក់ថាការផ្ទេរលុយពី អាមេរិកពីសំណាក់ជនជាតិគុយបានិរទេសខ្លួននៅ អាមេរិកជាចំណែកដ៏សំខាន់មួយសម្រាប់គុយបាត្រដររស់។
លើកទណ្ឌកម្មនៅមុខឆ្នាំ២០១៧ ?
ប៉ុន្តែការលើកទណ្ឌកម្មសេដ្ឋកិច្ច ទាំងស្រុងពីគុយបា មិនទាន់អាចធ្វើទៅកើតទេ ព្រោះនេះជាសិទ្ធិសម្រេចរបស់សភាអាមេរិក។ សភាអាមេរិកបានបោះឆ្នោតអនុម័តទណ្ឌកម្មប្រឆាំងគុយបានៅឆ្នាំ១៩៦២ ក្នុងបំណងគាបកទម្លាក់របបកុម្មុនិស្តគុយបាក្រោយបដិវត្ត ឆ្នាំ១៩៥៩។ ឥលូវក៏ត្រូវសភាអនុម័តអនុម័តលើកទណ្ឌកម្មទើបបាន។ ការធ្វើដំណើរទេសចរណ៍ទៅកាន់គុយបាត្រូវរង់ចាំសេចក្តីសម្រេចពីសភាដែរ។ លោកអូបាម៉ា ចង់ឃើញអាមេរិក ដកទណ្ឌកម្មចេញពីគុយបា មុនលោកបញ្ចប់អាណត្តិនៅឆ្នាំ២០១៧ តែដូចជាពិបាកបន្តិចហើយ ព្រោះសភានិងព្រឹទ្ធសភាអាមេរិក ស្ថិតក្នុងកណ្តាប់ដៃអ្នកសាធារណរដ្ឋទាំងអស់ សមាជិកសភានិងព្រឹទ្ធសភាដែលមាននិន្នាការដាក់គុយបាឱ្យឯកានយោបាយនិងសេដ្ឋកិច្ច សន្យាធ្វើគ្រប់យ៉ាងរារាំងសភាមិនឱ្យលើកទណ្ឌកម្មចេញពីគុយបាទេ។
ទស្សនៈរបស់អ្នកនយោបាយ ?
បើនិយាយពីថ្នាក់ជាតិ ជាង៥០%នៃពលរដ្ឋអាមេរិក គាំទ្រឱ្យមានទំនាក់ទំនងអាមេរិកគុយបាជាធម្មតាឡើងវិញ។ ប៉ុន្តែមានអ្នកបន្តប្រឆាំង ខ្លាំង គឺបណ្តាជនដើមកំណើតគុយបារត់និរទេសចេញពីប្រទេសក្រោយពីលោកហ្វីដែលកាស្ត្រូឡើងកាន់អំណាចភ្លាម នៅឆ្នាំ១៩៥៩។ មានតែក្មេងជំនាន់ក្រោយទេគាំទ្រលោកអូបាម៉ា។
ចំពោះអ្នកនយោបាយវិញ បើនិយាយតាមបែបសាមញ្ញ អ្នកប្រជាធិបតេយ្យចង់ឃើញអាមេរិកនិងគុយបារាប់រងគ្នាជាធម្មតា ឯខាងអ្នកសាធារណរដ្ឋប្រឆាំង។ តែក្នុងសំណុំរឿងនេះ មានអ្នកប្រឆាំងទាំងសងខាង។ តំណាងព្រឹទ្ធសភាអាមេរិកម្នាក់នៃបក្សសាធារណរដ្ឋ បានរិះគន់ថាដើម្បីអាចភ្ជាប់ទំនាក់ទំនងជាមួយគុយបាជាធម្មតាឡើងវិញនេះ សេតវិមាន លះបង់ច្រើន ជាងប្រមូលប្រយោជន៍ចូលអាមេរិក។ ខ្លះទៀតយល់ថា លោកអូបាម៉ា ការពារជនផ្តាច់ការ។ គេពុំឃើញមានវិវឌ្ឍន៍ជាវិជ្ជមានតាមផ្លូវប្រជាធិបតេយ្យសោះនៅគុយបា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ