គុយបាត្រៀមបើកកិច្ចចរចាជាមួយអាមេរិក តែត្រូវមានការគោរពគ្នាទៅវិញ ទៅមក
លោកប្រធានាធិបតីគុយបា រ៉ាអ៊ូល កាស្រ្តូបានប្រកាសឲ្យដឹងថា គុយបាបានត្រៀមខ្លួនរួចជាស្រេចដើម្បីបើកកិច្ចចរចាជាមួយអាមេរិក ប្រសិនណាបើឯករាជ្យភាព និងប្រព័ន្ធនយោបាយរបស់គុយបាត្រូវបានគោរពនោះ។ ផ្ទុយទៅវិញ ប្រទេសគុយបាសុទ្ធចិត្តស៊ូទ្រំាទទួលទ័ណ្ឌកម្មចំនួន ៥៥ឆ្នំាបន្ថែមទៀត។ យ៉ាងណាក៏ដោយ ការចាប់ដៃរវាងលោកប្រធានាធិបតីអាមេរិកអូបាម៉ា និងលោកប្រធានាធិបតីគុយបារ៉ាអ៊ូល កាស្រ្តូត្រូវបានគេចាត់ទុកជាសញ្ញាវិជ្ជមានមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ពិតជារូបភាពមួយដែលមិនអាចកំបំាងភ្នែកសាធារណៈជននៅក្នុងពិភពលោកបានឡើយ នោះគឺការចាប់ដៃរលាក់ដាក់គ្នារវាងលោកប្រធានាធិបតីអាមេរិកអូបាម៉ា និងលោកប្រធានាធិបតីគុយបារ៉ាអ៊ូល កាស្រ្តូនាឱកាសពិធីបុណ្យសពលោកអតីតប្រធានាធិបតីអាហ្រ្វិកខាងត្បូងនែលសុន ម៉ង់ដេឡា។ ការចាប់ដៃមានរយៈពេលតែប៉ុន្មានវិនាទីមែន តែវាគ្រប់គ្រាន់ដើម្បីបញ្ជាក់ពីភាពធូរស្បើយនៅក្នុងទំនាក់ទំនងរវាងទីក្រុងវ៉ាស៊ីនតោន និងទីក្រុងឡាហាវ៉ាន។ គួររម្លឹកជូនថា អាមេរិក និងគុយបាបានផ្តាច់ទំនាក់ទំនងផ្លូវទូតរវាងគ្នាតំាងពីជាងកន្លះសតវត្សមកហើយ។ ទន្ទឹមគ្នានេះ ភាពតានតឹងរវាងប្រទេសជិតខាងទំាងពីរក៏ធ្លាប់មានជារឿយៗដែរ។
តែឥឡូវនេះ និងក្រោយពីបានចាប់ដៃជាមួយលោកអូបាម៉ាមក លោករ៉ាអ៊ូល កាស្រ្តូបានបញ្ជាក់ថា លោកបានត្រៀមខ្លួនរួចជាស្រេចដើម្បីបើកកិច្ចចរចាជាមួយអាមេរិក ប្រសិនណាបើឯករាជ្យភាព និងប្រព័ន្ធនយោបាយរបស់គុយបាត្រូវបានគោរពនោះ។ ផ្ទុយទៅវិញ ប្រទេសគុយបាសុទ្ធចិត្តស៊ូទ្រំាទទួលទ័ណ្ឌកម្មចំនួន ៥៥ឆ្នំាបន្ថែមទៀត។ លោកកាស្រ្តូបានថ្លែងយ៉ាងដូចនេះនៅក្នុងសម័យប្រជុំសភាកាលពីចុងសប្តាហ៍កន្លងទៅ។
« យើងមិនបានសុំអាមេរិកឲ្យអាមេរិកផ្លាស់ប្តូររបបនយោបាយ និងសង្គមរបស់ខ្លួនទេ ហើយយើងក៏មិនអាចទទួលសំណើរបស់អាមេរិកឲ្យគុយបាផ្លាស់ប្តូររបបនយោបាយ និងសង្គមរបស់ខ្លួនដែរ។ ម្នាក់ៗត្រូវតែគោរពនូវភាពខុសគ្នា និងរស់នៅដោយសន្តិភាពជាមួយនឹងភាពខុសគ្នានោះ នេះគឺជាលក្ខខណ្ឌដើម្បីធ្វើឲ្យចម្រើនទៅមុខនៅក្នុងទំនាក់ទំនងរវាងអាមេរិក និងគុយបា » នេះជាការថ្លែងរបស់លោករ៉ាអ៊ូល កាស្រ្តូ។ អ្វីជាការកត់សម្គាល់ បើគ្មានការចាប់ដៃជាមួយលោកអូបាម៉ាទេ ក៏គ្មានសេចក្តីថ្លែងរបស់លោកកាស្រ្តូនៅពេលនេះដែរ នោះបើទោះបីជាកាលពីខែវិច្ឆិកាកន្លងទៅ លោកអូបាម៉ាបានទាមទារឲ្យមានការពិនិត្យមើលឡើងវិញនូវទំនាក់ទំនងជាមួយប្រទេសកុម្មុយនិស្តមួយនេះក៏ដោយក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ