អាមេរិកធ្លាប់លួចបង្កើតបណ្តាញសង្គម Twitterឲ្យប្រជាជនគុយបា
ចុះផ្សាយនៅថ្ងៃ៖
ស្តាប់ - ០៤:៣៨
កាលពីឆ្នាំ ២០១០ ទីភ្នាក់ងារដើម្បីអភិវឌ្ឍន៍អន្តរជាតិ អាមេរិកាំង USAIDបានបង្កើត យ៉ាងស្ងាត់ៗ បណ្តាញសង្គម នៅក្នុងប្រទេសគុយបា។ បច្ចុប្បន្ននេះ បណ្តាញសង្គមTwitter នៅគុយបា ដែលលែងមានដំណើរការទៀតហើយ ត្រូវបានលេចបែកខ្ចរខ្ចាយ ដោយសារការចុះផ្សាយអត្ថបទស៊ើបអង្កេតរបស់ទីភ្នាក់ងារព័ត៌មានអាមេរិកាំង AP កាលពីដើមខែមេសានេះ។ តើហេតុអ្វីបានជាអាមេរិកលួចជួយបង្កើតបណ្តាញសង្គមឲ្យប្រជាជនគុយបា?
ប្រសិនបើគ្មានការងារស៊ើបអង្កេតរបស់ទីភ្នាក់ងារព័ត៌មានAP ប្រជាជនគុយបានឹងនៅតែមិនដឹងខ្លួន ថា តើនៅសុខៗ ហេតុអ្វី បានជាខ្លួនអាចចុះឈ្មោះTwitter ដើម្បីផ្ញើសារពីទូរស័ព្ទបានដោយមិនគិតលុយ និងឆាប់រហ័សយ៉ាងដូច្នេះទេ។ នៅ គុយបា ប្រព័ន្ធអ៊ីនធ័រនែតនៅមានលក្ខណៈតូចចង្អៀត។ ចាប់តាំងពីឆ្នាំមុន គុយបាមានកន្លែងចូលមើលអ៊ីនធ័រនែតប្រមាណ ១៣៧ សម្រាប់សាធារណជន នៅទូទាំងកោះគុយបា។ នៅគុយបា មានតែមន្ត្រីក្នុងជួររដ្ឋាភិបាល និងអ្នកមានទើបមានសមត្ថភាពទ្រាំទ្របង់ថ្លៃអ៊ីនធ័រនែត។ ដើម្បីចូលមើលអ៊ីនធ័រនែតមួយម៉ោង គេត្រូវបង់តម្លៃ៤ដុល្លារកន្លះ ដែលស្មើនឹងមួយភាគបួន នៃប្រាក់ខែ របស់បុគ្គលិករដ្ឋការទូទៅ។
មេដឹកនាំប្រទេសកុម្មុយនិស្តមួយនេះតែងតែចាត់ទុកអ៊ីនធ័រនែតដូចជាសត្វព្រៃ ដែលគេត្រូវប្រយ័ត្នប្រយែង និងតាមដានបង្ហាត់គ្រប់ពេលវេលា។ អ្វីៗស្ថិតនៅក្រោមការគ្រប់គ្រង ត្រួតពិនិត្យរបស់រដ្ឋាភិបាល។ នៅឆ្នាំ ២០០៩ អាជ្ញាធរគុយបាបានចាប់ខ្លួនអ្នកជំនួញអាមេរិកាំងម្នាក់ នៅទីក្រុងឡាហាវ៉ាន ដោយបានចោទពីបទផ្តល់សម្ភារៈព័ត៌មានវិទ្យាដល់ក្រុមប្រឆាំងនឹងរបបកាស្ត្រូ។ អ្នកជំនួញអាមេរិកាំងរូបនោះ ត្រូវកាត់ទោសឲ្យជាប់គុក ១៥ឆ្នាំ នៅគុយបា។
គឺនៅក្រោយពេលអ្នកជំនួញអាមេរិកត្រូវគេចាប់ខ្លួននោះហើយ ដែលទីភ្នាក់ងារដើម្បីអភិវឌ្ឍអន្តរជាតិ USAIDចាប់ផ្តើមផ្តល់លុយ ឲ្យគេបង្កើតបណ្តាញសង្គម twitterសម្រាប់យុវជនគុយបា។ តាមអត្ថបទចុះផ្សាយរបស់ទីភ្នាក់ងារព័ត៌មានអាមេរិក AP ក្រុមការងារអាមេរិកាំងបានបង្កប់ខ្សែបណ្តាញអ៊ីនធ័រនែត នៅជាមួយក្រុមហ៊ុនសាំង Shell និងចែកចាយសារ ដោយប្រើទឹកដីបរទេសផ្សេង ក្រៅពីអាមេរិក។ ចាប់តាំងពីត្រូវបានបង្កើតឡើងតាំងពីឆ្នាំ ២០១០ បណ្តាញសង្គមtwitterគុយបា ទាក់ទាញបានសមាជិកគុយបា បួនម៉ឺននាក់។ នៅគុយបា មនុស្សត្រូវការចង់ដឹងអាន ព័ត៌មាន នៅពេលដែលប្រព័ន្ធផ្សព្វផ្សាយទាំងអស់ មិនឯករាជ្យ ស្ថិតនៅក្រោមការកាន់កាប់របស់រដ្ឋអំណាច។ ប៉ុន្តែ គម្រោងនេះបានបញ្ចប់ទៅវិញ នៅឆ្នាំ ២០១២ ដោយសារតែ USAIDអស់ថវិកា។
នៅដើមខែមេសានេះ អ្នកនាំពាក្យរបស់សេតវិមាន Jay Caney បានឆ្លើយ យ៉ាងអល់អែកនឹងសំណួររបស់អ្នកកាសែត ជុំវិញការលួចបង្កើតបណ្តាញសង្គមរបស់អាមេរិក នៅគុយបា។ តាមអ្នកនាំពាក្យរបស់សេតវិមាន កម្មវិធីបង្កើតTwitter នៅគុយបាជាចំណាយរបស់ទីភ្នាក់ងារអភិវឌ្ឍអន្តរជាតិ USAID និងស្ថិតនៅក្រោមការគ្រប់គ្រងរបស់ក្រសួងការបរទេសអាមេរិក។ កម្មវិធីនេះត្រូវបានឆ្លងកាត់ការពិភាក្សា នៅសភា និងបានទទួលការអនុញ្ញាតិរួចហើយ។
សម្រាប់អ្នកនាំពាក្យសេតវិមាន អាមេរិកមិនបានប្រើកម្មវិធីtwitter ដើម្បីធ្វើចារកម្មលើរដ្ឋាភិបាលគុយបាទេ។ រដ្ឋាភិបាលអាមេរិកមិនបានចូលទៅត្រួតពិនិត្យលើខ្លឹមសារ ដែលប្រជាជនគុយបា សរសេរឆ្លើយឆ្លងគ្នា នៅក្នុងបណ្តាញសង្គមtwitter ដែរ។ តាមសេតវិមាន គេមិនបង្ហាញកម្មវិធីtwitter ជាផ្លូវការ ដោយសារតែកម្មវិធីមានជាប់ពាក់ព័ន្ធជាមួយរដ្ឋាភិបាលអាមេរិកាំង ហើយ គ្រោះថ្នាក់នឹងអាចកើតឡើងចំពោះអ្នកប្រើប្រាស់ជាតិគុយបា និងសមាជិករដ្ឋាភិបាលគុយបា ប្រសិនបើកម្មវិធីត្រូវគេបើកទម្លាយ។ រហូតមកដល់ពេលនេះ រដ្ឋាភិបាលគុយបានមិនបានប្រតិកម្មអ្វីទៅនឹងដំណឹងចុះផ្សាយរបស់ទីភ្នាក់ងារព័ត៌មានអាមេរិកាំងនៅឡើយទេ។
លោកJay Caney វិញ ខំប្រឹងពន្យល់ថា ទីភ្នាក់ងារដើម្បីអភិវឌ្ឍ USAIDបង្កើតtwitter នេះឡើង នៅគុយបា នៅក្នុងបំណងអភិវឌ្ឍសេរីភាពទទួលបានព័ត៌មាននៅគុយបា។ អ្នកនាំពាក្យរបស់ទីភ្នាក់ងារ USAIDវិញបាននិយាយប្រាប់ទូរទស្សន៍អង់គ្លេសថា គេមានមោទនភាពដែលបានជួយប្រជាជនគុយបាឲ្យអនុវត្តសិទ្ធិរបស់ខ្លួន និងភ្ជាប់ខ្លួនទៅពិភពលោកខាងក្រៅ។
តាម ទីភ្នាក់ងារAP ដែលបានទទួលឯកសារជាង១ពាន់ទំព័រពីប្រភពអាមេរិកាំង ការអះអាងរបស់សេតវិមាន ខុសស្រឡះ ពីគោលដៅដែល គេបានកំណត់ នៅក្នុងផែនការបង្កើតកម្មវិធីtwitterនៅគុយបា។ តាមឯកសារ អាមេរិកចង់ប្រើកម្មវិធីបណ្តាញសង្គមដើម្បីផ្តួលរំលំអំណាចរបស់គ្រួសារកាស្ត្រូ។ តាមរយៈបណ្តាញសង្គម ការផ្ញើសារ យុវជនគុយបាអាចបើកភ្នែក ឃើញពិភពខាងក្រៅ និងអាចធ្វើបដិវត្តប្រឆាំងនឹងរដ្ឋាភិបាលកុម្មុយនិស្ត ដែលអាមេរិកចង់មិនចូលចិត្ត ឲ្យមាននៅក្នុងប្រទេសជិតខាងខ្លួន។
ក្នុងក្រសែភ្នែកអាមេរិក គុយបានៅតែជាប្រទេសភេរវកម្ម។ ជាង៥០ឆ្នាំមកហើយ ដែលអាមេរិកនៅដាក់ទណ្ឌកម្មទៅលើគុយបា។ អាមេរិកចាប់ខឹងនឹងរបបគ្រប់គ្រងកាស្រ្តូ ដោយសារតែរបបនេ ដែលបានកើតឡើង តាំងពីចូលកាន់តំណែងរបស់លោកហ្វីដែល កាស្រ្តូ កាលទសវត្សរ៍ ឆ្នាំ ១៩៥០ បានធ្វើជាតូបនីយកម្មរាល់ក្រុមហ៊ុនបរទេស និងបិទផ្លូវធ្វើវិនិយោគ ដែលធ្វើឲ្យក្រុមហ៊ុនអាមេរិកាំងខាតបង់យ៉ាងខ្លាំង។ រហូតមក អាមេរិកបានប្រើទីភ្នាក់ងារស៊ើបការណ៍សម្ងាត់ ដើម្បីប៉ុនប៉ងជាច្រើន ជាច្រើនសា ដើម្បីផ្តួលអំណាចរបស់លោកហ្វីដែល កាស្រ្តូ និងដើម្បីប្តូរនយោបាយសេដ្ឋកិច្ចគុយបា ពីកុម្មុយនិស្ត មកមូលធននិយមវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ