លោក អំ សំអាត៖ កម្ពុជាត្រូវប្រឈមមុខនឹងការចោទសួរជាច្រើនចំពោះស្ថានភាពសិទ្ធិមនុស្សបច្ចុប្បន្ន
មន្ត្រីរបស់អង្គការសិទ្ធិមនុស្សក្នុងស្រុក បានលើកឡើងថា កម្ពុជា នឹងប្រឈមមុខខ្លាំងចំពោះការចោទសួរពីតំណាងប្រទេសនានាចំពោះស្ថានភាពសិទ្ធិមនុស្សនៅកម្ពុជាបច្ចុប្បន្ននេះ។ បញ្ហាសិទ្ធិមនុស្សដែលកម្ពុជាកំពុងកើតឡើងគឺ សេរីភាពបញ្ចេញមតិនិងការជួបជុំ សិទ្ធិរបស់អង្គការសង្គមស៊ីវិល និងការឃុំខ្លួន លោក កឹម សុខា ព្រមទាំងស្ថានភាពរបស់សកម្មជននយោបាយជាដើម។ ការលើកឡើងរបស់មន្ដ្រីអង្គការសិទ្ធិមនុស្សក្នុងស្រុកដូច្នេះ ធ្វើឡើងខណៈពេលដែលក្រុមការងារពិនិត្យរបាយការណ៍សកលតាមកាលកំណត់ ឬ (UN-UPR) របស់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ នឹងធ្វើនៅថ្ងៃទី៣០ ខែមករា ខាងមុខនេះ។
ចុះផ្សាយនៅថ្ងៃ៖
លោក អំ សំអាត ប្រធានគ្រប់គ្រងការិយាល័យឃ្លាំមើលសិទ្ធិមនុស្សរបស់អង្គការលីកាដូ បានលើកឡើងថា ក្រុមអង្គការសង្គមស៊ីវិលនៅកម្ពុជាបានដាក់របាយការណ៍ដោយឡែករបស់ពួកគេទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិរួចរាល់អស់ហើយ។ ពោលគឺដំណាលគ្នានឹងរបាយការណ៍របស់រដ្ឋាភិបាលកម្ពុជាដែរ។
បើតាមលោក អំ សំអាត កម្ពុជាប្រឈមមុខនឹងការចោទសួរជាច្រើនចំពោះស្ថានភាពសិទ្ធិមនុស្សបច្ចុប្បន្ន។ បញ្ហាធំៗដែលអង្គការសិទ្ធិមនុស្សបានលើកឡើង គឺ សេរីភាពនៃការបញ្ចេញមតិ ការជួបជុំ សិទ្ធិអង្គការសង្គមស៊ីវិល ការឃុំខ្លួនមេដឹកនាំគណបក្សប្រឆាំងលោក កឹម សុខា និងស្ថានភាពរបស់សកម្មជននយោបាយជាដើម។ បញ្ហាទាំងអស់នេះគឺជាផ្នែកមួយនៃការធ្លាក់ចុះលទ្ធិប្រជាធិបតេយ្យនៅកម្ពុជា ដូចអ្វីដែលសហភាពអឺរ៉ុបបានលើកឡើងផងដែរ។ នេះជាការបន្ថែមរបស់មន្រ្តីសិទ្ធិមនុស្សដដែល។
ដោយឡែក អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្មីត បានកត់សំគាល់នៅក្នុងរបាយការណ៍របស់ខ្លួនទាក់ទងនឹងការបំបិទសិទ្ធិសេរីភាពអ្នកសារព័ត៌មាន អ្នកការពារសិទ្ធិមនុស្ស សកម្មជនដីធ្លី សកម្មជនបរិស្ថាន សង្គមស៊ីវិល និងករណីចាប់ និងឃុំខ្លួនអ្នកនយោបាយ ដូចជាលោកកឹម សុខា ជាដើម។
សូមបញ្ជាក់ថា យន្តការរបស់អង្គការសហប្រជាជាតិ ពិនិត្យរបាយការណ៍សកលតាមកាលកំណត់ ឬ (UN-UPR) គឺធ្វើឡើង រៀងរាល់៥ឆ្នាំម្ដង។
កាលពីសម័យប្រជុំលើកទី ៣១ នៅឆ្នាំ ២០១៤ កម្ពុជា ធ្លាប់បានទទួលអនុសាសន៍ចំនួន ១៦៣ ពីអង្គប្រជុំ ហើយនៅឆ្នាំ ២០១៩នេះ កម្ពុជា នឹងបង្ហាញថាតើមានប៉ុន្មានចំនុចក្នុងអនុសាសន៍ទាំងនោះ ដែលកម្ពុជាបានយកមកអនុវត្ត ឬ មិនបានអនុវត្តដោយសារបញ្ហាប្រឈម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ