លោកខៀវ សុភ័គ៖ ភាគរយនៃការបិទ CCHR កំពុងកើនឡើងខ្ពស់!
ក្រសួងមហាផ្ទៃ កំពុងពិនិត្យ ស្រាវជ្រាវ និងស៊ើបអង្កេតលើលទ្ធភាព ក្នុងការបិទមជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR។ នេះបើតាមការឲ្យដឹងពីលោក ខៀវ សុភ័គ អ្នកនាំពាក្យក្រសួងមហាផ្ទៃ ដែលបានប្រាប់វិទ្យុបារាំងអន្តរជាតិ នៅព្រឹកថ្ងៃទី ២៩វិច្ឆិកានេះ។ យ៉ាងណាក៏ដោយ ក្រសួង នៅមិនទាន់អាចបញ្ជាក់ពីកាលបរិច្ឆេទនៃការបញ្ចប់ការស៊ើបអង្កេតនេះនៅឡើយទេ ខណៈពេលដែលលោក ខៀវ សុភ័គ បានបង្ហាញពីភ្លើងខៀវនៃភាគរយក្នុងការបិទមជ្ឈមណ្ឌលសិទ្ធិមនុស្សដ៏ធំមួយនេះទៅហើយ។ ចំណែកខាងមជ្ឈមណ្ឌលសិទ្ធិមនុស្សកម្ពុជា នៅតែបង្ហាញពីទំនុកចិត្ត ផ្អែកលើអព្យាក្រឹតភាពរបស់ខ្លួនដដែល។
ចុះផ្សាយនៅថ្ងៃ៖
ស្តាប់ - ០២:៥១
លោក ខៀវ សុភ័គ អ្នកនាំពាក្យក្រសួងមហាផ្ទៃ បានបង្ហាញសុទិដ្ឋិនិយមក្នុងការបិទជាផ្លូវការមជ្ឈមណ្ឌលសិទ្ធិមនុស្សកម្ពុជា CCHR ក្នុងហេតុផលថា មជ្ឈមណ្ឌលនេះ បានប្រតិបត្តិការខុសពីលក្ខខណ្ឌ ក្នុងច្បាប់អង្គការសង្គមស៊ីវិល នៅកម្ពុជា។ យ៉ាងណាក៏ដោយ លោកបានឲ្យដឹងថា លទ្ធផលពិតប្រាកដ នឹងត្រូវបង្ហាញជូនសាធារណជន ក្រោយពេលដែលមន្ត្រីជំនាញ នៃក្រសួងមហាផ្ទៃ បញ្ចប់ការស៊ើបអង្កេត លើមជ្ឈមណ្ឌលនេះ។
តាមលោក ខៀវ សុភ័គ អ្វីដែលអ្នកជំនាញកំពុងបើកការស៊ើបអង្កេត នាពេលនេះ គឺទាក់ទងទៅនឹងសកម្មភាពរបស់ CCHR នាពេលកន្លងមក ថាតើបានជួយកម្ពុជាលើវិស័យអ្វីខ្លះ? ហើយថា តើការជួយទាំងនោះ ដើម្បីប្រយោជន៍អ្វីខ្លះ? និងថាតើ អង្គការក្រៅរដ្ឋាភិបាលមួយនេះ ទទួលជំនួយពីបរទេសដើម្បីបម្រើប្រយោជន៍បក្សនយោបាយយ៉ាងណាខ្លះ? ប៉ុន្តែអ្វីដែលលោកខៀវ សុភ័គ បានមើលឃើញ និងបានប្រាប់វិទ្យុបារាំង គឺមជ្ឈមណ្ឌលសិទ្ធិមនុស្សកម្ពុជា មិនមានអព្យាក្រឹតភាពនោះទេ ហើយកន្លងមកតែងតែនិយាយបំផ្លើស ញុះញង់ បង្កឲ្យមានអសន្តិសុខក្នុងវិស័យនយោបាយកម្ពុជា ព្រោះអង្គការនេះ បម្រើតែផលប្រយោជន៍បរទេស។
យ៉ាងណាមិញ ប្រធានមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានឲ្យដឹងតាមបណ្តាញសង្គមរបស់លោកស្រីថា CCHR នៅតែជឿជាក់លើឯករាជ្យភាព និងអព្យាក្រិតភាពរបស់ខ្លួន ដោយមិនប្រកាន់បក្សនយោបាយណាមួយនោះទេ។ ហើយអង្គការនេះ ក៏មិនដែលមានចេតនាបំផ្លាញរដ្ឋាភិបាលកម្ពុជានោះឡើយ គ្រាន់តែពួកគេ ត្រូវធ្វើការដើម្បីលើកកម្ពស់សិទ្ធិជាមូលដ្ឋាន ដូចជាសិទ្ធិមនុស្ស និងសេរីភាព ក្នុងការបញ្ចេញមតិនៅកម្ពុជាតែប៉ុណ្ណោះ។ តាមលោកស្រី ចក់ សុភាព សង្គមស៊ីវិល គួរតែជាដៃគូសំខាន់ក្នុងការអភិវឌ្ឍប្រទេស ហើយមិនគួរណាត្រូវបានចាត់ទុកថាជាសត្រូវជាមួយអាជ្ញាធរកម្ពុជានោះទេ។
ចំពោះការបញ្ជាឲ្យក្រសួងមហាផ្ទៃ ពិនិត្យមើល ដើម្បីបិទមជ្ឈមណ្ឌលសិទ្ធិមនុស្សកម្ពុជា ពីសំណាក់លោកនាយករដ្ឋមន្ត្រីហ៊ុន សែន កាលពីថ្ងៃអាទិត្យនេះផងដែរ ក៏ត្រូវបានលោក ឆៀរី ម៉ាធូ (Thierry Mathou) ប្រធាននាយកដ្ឋានអាស៊ី និងអូសេអានី នៃក្រសួងអឺរុបនិងការបរទេសបារាំង សង្កត់ធ្ងន់ថា ប្រសិនបើពិតជាបិទមជ្ឈមណ្ឌលនេះមែន នោះកម្ពុជានឹងត្រូវបានចាត់ទុកថា ជាប្រទេសដែលមានការវិវត្តយ៉ាងអវិជ្ជមានមួយ។
នៅថ្ងៃទី ២៨វិច្ឆិកាផងដែរ បណ្ដាញអង្គការសកល ដើម្បីការពារ និងលើកកម្ពស់សេរីភាពបញ្ចេញមតិ ហៅកាត់ថា “IFEX” ដែលមានបណ្តុំអង្គការអន្តរជាតិចំនួន ១១៩ស្ថាប័ន និងមានមូលដ្ឋាននៅទីក្រុងតូរ៉ុនតូ ប្រទេសកាណាដា បានចេញសេចក្តីថ្លែងការណ៍ ថ្កោលទោសយ៉ាងខ្លាំងចំពោះការព្រមានរបស់លោកហ៊ុន សែន ដោយថាទង្វើនេះ ពុំមានមូលដ្ឋានច្បាស់លាស់ និងថាអាចឈានទៅបង្កើតឲ្យមាននូវបរិយាកាសមួយ រឹតត្បិតសេរីភាពសារព័ត៌មាន នៅមុនការបោះឆ្នោតនាពេលខាងមុខ។ សេចក្តីថ្លែងការណ៍របស់ IFEX យល់ថា ចំណាត់ការរបស់រដ្ឋាភិបាល នឹងប្រាប់ទៅពិភពលោកថា កម្ពុជា មិនបានគោពតាមអ្វី ដែលខ្លួនបានសន្យា ដោយធានាឲ្យមានការបញ្ចេញមតិ និងការប្រមូលផ្តុំដោយសេរីនោះទេ ហើយការបញ្ជានេះ នឹងធ្វើឲ្យស្ថានភាពនៅកម្ពុជាកាន់តែយាប់យឺន។
សូមរម្លឹកជូនថា មជ្ឈមណ្ឌលសិទ្ធិមនុស្សកម្ពុជា CCHR ត្រូវបានបង្កើតឡើងដោយអតីតប្រធានគណបក្សប្រឆាំង លោក កឹម សុខា នៅឆ្នាំ២០០២ ហើយក្រោយមកលោកបានលាឈប់ ដើម្បីទៅធ្វើជាអ្នកនយោបាយវិញ។ បន្ទាប់មក មជ្ឈមណ្ឌលនេះ ត្រូវបានដឹកនាំបន្ដដោយលោក អ៊ូ វីរៈ ពីឆ្នាំ២០០៧ ដល់ឆ្នាំ២០១៣ មុនពេលលោកស្រី ចក់ សុភាព ក្លាយជាប្រធានពីឆ្នាំ ២០១៣ រហូត ដល់ពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ