តំណាងទូតកម្ពុជាប្រចាំប្រទេសបារាំងបដិសេធថា មិនបានជួយអន្តរាគមន៍ករណីប្រាក់រាប់លានចូលប្រទេសបារាំង
ឯកអគ្គរាជទូតកម្ពុជាប្រចំាប្រទេសបារំាង លោក នុត ណារ៉ាង បានបដិសេធថា ខ្លួនមិនបានជួយធ្វើអន្តរាគមន៍ទៅកាន់អាជ្ញាធរបារំាង ដើម្បីជួយសម្រួលឲ្យលោក ហ៊ុន ម៉ាណែត កូនប្រុសរបស់លោកនាយករដ្ឋមន្រ្តី ហ៊ុន សែន នាំយកប្រាក់រាប់លានដុល្លារចូលទៅក្នុងទឹកដីបារាំង ដើម្បីទិញទឹកចិត្តខ្មែរនៅបរទេសនោះទេ។ តំណាងទូតកម្ពុជាប្រចាំប្រទេសបារាំងបានចាត់ទុកថា ការចោទប្រកាន់ទាំងនោះ គឺជាពាក្យមិនពិត។
ចុះផ្សាយនៅថ្ងៃ៖
ស្តាប់ - ០២:៣១
សេចក្តីបដិសេធរបស់តំណាងទូតកម្ពុជាប្រចាំនៅប្រទេសបារាំង បានធ្លាក់មកកាលពីថ្ងៃទី១៥ធ្នូ ពោលគឺនៅប៉ុន្មានថ្ងៃ បន្ទាប់ពីមានការចោទប្រកាន់ថា តំណាងស្ថានទូតខ្មែរប្រចាំនៅប្រទេសបារាំងបានជួយអន្តរាគមន៍ទៅអាជ្ញាធរបារាំង ដើម្បីសម្រួលឲ្យប្រតិភូគណបក្សប្រជាជនកម្ពុជាដឹកនាំដោយលោក ហ៊ុន ម៉ាណែត នាំយកថវិការាប់លានដុល្លារចូលទៅកាន់ប្រទេសបារាំង។ ក៏ប៉ុន្តែលោក នុត ណារ៉ាង ឯកអគ្គរាជទូតកម្ពុជាប្រចំាប្រទេសបារំាង បានបដិសេធយ៉ាងដាច់អហង្ការថា មិនបានធ្វើអន្តរាគមន៍ណាមួយទៅអាជ្ញាធរបារាំង ដើម្បីសម្រួលឲ្យ (ក្មួយ) ហ៊ុន ម៉ាណែត នាំប្រាក់ចំនួន៣លានដុល្លារ ឬ៦លានដុល្លារសហរដ្ឋអាមេរិកចូលប្រទេសបារំាងដើម្បីទិញទឹកចិត្តខ្មែរនៅទីនោះឡើយ។ នៅក្នុងសេចក្តីបដិសេធនេះ លោក នុត ណារ៉ាង បានចាត់ទុកថា ការលើកឡើងនេះ ជាពាក្យពេចន៍សុទ្ធសឹងជាប្រភពគំនិតចេញមកពីឆន្ទៈបំផ្លិចបំផ្លាញអំពីចិត្តអមនុស្ស និងថា ជាការបំផុសបណ្តុះពាក្យមិនពិត ក្នុងគោលបំណងបំផ្លាញមនុស្សគ្នាឯង។ មនុស្សបែបនេះ ចាត់ទុកជាមនុស្សបំផ្លាញមនុស្សនិងសង្គម ដែលគេពុំអាចឲ្យចូលក្នុងសង្គមបានឡើយ។
គួររំលឹកជូនថា លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្រ្តី ហ៊ុន សែន បានទៅបំពេញទស្សនកិច្ចនៅបារាំង ប៊ែលហ្សិក អាល្លឺម៉ង់ និងប្រទេសស្វីស កាលពីចុងខែវិច្ឆិកា និងដើមខែធ្នូកន្លងទៅនេះ ដើម្បីជួបជុំជាមួយប្រជាពលរដ្ឋខ្មែរនៅទីនោះ និងដើម្បីរៀបចំរចនាសម្ព័ន្ធដឹកនាំគណបក្សប្រជាជនកម្ពុជាប្រចាំនៅតំបន់អឺរ៉ុប។ ប៉ុន្តែមានព័ត៌មានលេចឮថា លោក ហ៊ុន ម៉ាណែត បាននាំយកលុយ៦លានដុល្លារ (ខ្លះថា៣លានដុល្លារ) ទៅជាមួយ ដើម្បីយកទៅទិញទឹកចិត្តប្រជាពលរដ្ឋខ្មែរនៅប្រទេសបារាំង។ ក្នុងនោះក៏មានការលើកឡើងថា ក្រុមការងាររបស់លោក ហ៊ុន ម៉ាណែត បានផ្តល់អាហារដោយឥតគិតថ្លៃ និងផ្តល់ថវិកាចំនួន៣០០អឺរ៉ូ ដល់អ្នកចូលរួមក្នុងពិធីម្នាក់ៗ ហើយថា លុយនោះត្រូវបានគយបារាំងចាប់ ប៉ុន្តែត្រូវប្រគល់មកឲ្យក្រុមការងារវិញ ក្រោយពីមានអន្តរាគមន៍ពីស្ថានទូតខ្មែរប្រចាំនៅប្រទេសបារាំង។ យ៉ាងណាក៏ដោយ លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្រ្តី ហ៊ុន សែន ដែលរងការចោទប្រកាន់នេះ បានចេញមុខមកច្រានចោលព័ត៌មាននេះរួចហើយ កាលពីថ្ងៃទី១៣ ខែធ្នូ ឆ្នាំ២០១៥ តាមរយៈទំព័រហ្វេសបុកផ្លូវការរបស់លោក។
នៅក្នុងសំណេរចុងក្រោយរបស់តំណាងទូតខ្មែរនៅប្រទេសបារាំង បានថ្កោលទោសយ៉ាងពេញទំហឹងចំពោះអ្នកដែលបានបំផុសព័ត៌មាននេះឡើង និងបានអំពាវនាវឲ្យបងប្អូនខ្មែររក្សាឲ្យបាននូវសេចក្តីថ្លៃថ្នូ និងការទទួលខុសត្រូវខ្ពស់ ដើម្បីជាតិខ្មែរគង់វង្ស។ លោកនុត ណារ៉ាង បានលើកឡើងថា សង្គមខ្មែរត្រូវការរួមគ្នា ថែទាំគ្នា ទោះជាមិនមាននិន្នាការនយោបាយស្របគ្នាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ