លោក កឹម សុខា ប្រាប់សកម្មជនទាំង១១នាក់ថាប្រទេសមហាអំណាចនឹងជួយពួកគេ
ប្រធានស្ដីទីគណបក្សសង្គ្រោះជាតិ លោក កឹម សុខា បានប្រាប់សកម្មជនទាំង១១ថា ពួកគេមិនឯកោទេពោលគឺប្រទេសមហាអំណាចនឹងជួយរកយុត្តិធ៌មជូនពួកគេ។ លោក កឹម សុខា ក៏បានបង្ហើបពីគម្រោងត្រៀមជួបជាមួយលោក ស ខេង ផងដែរ ដើម្បីអន្តរាគមន៍ករណីនេះ។
ចុះផ្សាយនៅថ្ងៃ៖
ស្តាប់ - ០២:០២
ការលូកដៃពីប្រទេសមហាអំណាចក្នុងការជួយរកយុត្តិធម៌ជូនសកម្មជនទាំង១១នាក់ដើម្បីដោះលែងពួកគេឲ្យមានសេរីភាពឡើងវិញ ត្រូវបានលោក កឹម សុខា បញ្ជាក់ទៅកាន់ពួកគេទាំងនោះនៅថ្ងៃចន្ទទី២៧កក្ដដានេះ។
បន្ថែមពីលើកិច្ចអន្តរាគមន៍នេះគណបក្សសង្គ្រោះជាតិបើតាម លោក កឹម សុខា មានយុទ្ធសាស្ត្រចំនួនបី ដើម្បីឲ្យអ្នកទាំង១១នាក់នោះរួចផុតពីការឃុំខ្លួនទី១-ដំណោះស្រាយផ្លូវច្បាប់តាមរយៈការបណ្ដឹងឧទ្ទរណ៍ ទី២- សើរើឡើងវិញការអនុវត្តកិច្ចព្រមព្រៀងបិទបញ្ចប់វិបត្តនយោបាយជាមួយគណបក្សប្រជាជន ទី៣-ជជែកបន្ថែមទៅលើវប្បធម៌សន្ទនា។
ទាក់ទងវប្បធម៌សន្ទនានេះលោក កឹម សុខា ក៏គ្រោងនឹងជួបជាមួយលោក ស ខេង ផងដែរ តែមិនទាន់កំណត់ថ្ងៃ។
ប្រធានស្ដីទីគណបក្សរូបនេះហាក់មានជំនឿខ្លាំងទៅលើវប្បធម៌សន្ទនានិងកិច្ចព្រមព្រៀងបិទបញ្ចប់វិបត្តិនយោបាយជាមួយគណបក្សប្រជាជន។ លោកជឿថា វាអាចនឹងជួយឲ្យពួកគេមានសេរីភាពឡើងវិញ។ បើតាម លោក កឹម សុខា មុនមានកិច្ចព្រមព្រៀង២២កក្ដដា តំណាងរាស្ត្រគណបក្សសង្គ្រោះជាតិចំនួន៧នាក់ត្រូវបានចាប់ខ្លួនបន្ទាប់មកដោះលែងឲ្យមានសេរីភាពឡើងវិញក៏ដោយសារតែស្មារតីនៃកិច្ចព្រមព្រៀងនេះ។
ទាក់ទងនឹងដំណើរទៅក្រៅប្រទេសរបស់លោក សម រង្ស៊ី ចំថ្ងៃឃុំខ្លួនសកម្មជនចំនួន១១នាក់ លោក កឹម សុខា ថា លោក សម រង្ស៊ី មានគម្រោងយូរហើយ មិនមែនជាការគេចវេសនោះទេ។ ចំណែកការរិះគន់គ្នាតាមបណ្ដាញសង្គមហ្វេសប៊ុកពីសំណាក់កូនស្រីលោកទាំងពីរ លោក កឹម សុខា ថា នេះគ្រាន់តែជាព័ត៌មានមិនផ្លូវការនៅក្នុងបណ្ដាញសង្គមតែប៉ុណ្ណោះ។ លោកចាត់ទុកថា ពេលខ្លះហ្វេសប៊ុកមានរឿងពិតនិងមិនពិត។
គួររំលឹកដែរថា សកម្មជន និងសមាជិកគណបក្សសង្គ្រោះជាតិចំនួន១១នាក់ រួមទាំងលោក មាជ សុវណ្ណារ៉ា ផងនោះ ត្រូវបានតុលាការក្រុងភ្នំពេញកាត់ទោស កាលពីថ្ងៃទី២១ ខែកក្កដា ឲ្យជាប់ពន្ធនាគារក្នុងម្នាក់ៗ ពី៧ទៅ២០ឆ្នាំ ពីបទដឹកនាំកុប្បកម្ម បង្កឲ្យមានហិង្សាក្បែរស្ពាននាគ ជិតទីលានប្រជាធិបតេយ្យ កាលពីថ្ងៃទី១៥ កក្កដា ២០១៤ កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ