របាយការណ៍៖ស្ប៉តពាណិជ្ជកម្មតាមTV បង្ហាញហិង្សាលើស្ត្រីច្រើនជាងគេ
តាមរបាយការណ៍អំពើហិង្សាលើស្ត្រី នៅលើកញ្ចក់ទូរទស្សន៍កម្ពុជា របស់មូលធិនិអាស៊ី Asian Foundation បានបង្ហាញឲ្យដឹងថា កម្មវិធីដែលលាយអំពើហិង្សាលើស្ត្រីខ្លាំងជាងគេ គឺស្ប៉តពាណិជ្ជកម្ម ជាពិសេសគឺទាក់ទងនឹងគ្រឿងស្រវឹង វីដេអូចម្រៀង និងរឿងភាគដែលនាំមកពីបរទេស។ របាយការណ៍នេះ ត្រូវបានលើកឡើងក្នុងផ្នែកមួយនៃយុទ្ធនាការ ១៦ថ្ងៃ ដើម្បីបញ្ចប់អំពើហិង្សាលើស្ត្រី ដែលបានធ្វើឡើងក្នុងសិក្ខាសាលា នាព្រឹកថ្ងៃទី ៣០វិច្ឆិកានេះ នៅរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៨
ក្រោយពីបានធ្វើការតាមដាន និងស្រាវជ្រាវពិនិត្យទិន្នន័យ ទៅលើទូរទស្សន៍ដែលមានប្រជាប្រិយភាពបំផុតនៅកម្ពុជា ចំនួន ៤ ចាប់ពីខែមិនា ឆ្នាំ ២០១៦ ដល់ ខែកុម្ភៈ ឆ្នាំ ២០១៧ មូលនិធិអាស៊ី ឬ Asian Foundation បានចេញផ្សាយរបាយការណ៍ ដែលបញ្ជាក់ថា ការផ្សព្វផ្សាយស្ប៉តពាណិជ្ជកម្មទាក់ទងនឹងគ្រឿងស្រវឹង មានលាយឡំដោយអំពើហិង្សាលើស្ត្រី ច្រើនជាងកម្មវិធីផ្សេងៗទាំងអស់។ ហិង្សាលើស្ត្រី ដែលអង្គការនេះ កំណត់ថា មាន ៣ គឺហិង្សាផ្លូវកាយ ផ្លូវភេទ និងហិង្សាផ្លូវចិត្ត។ តាមមូលនិធិអាស៊ី ការផ្សាយបែបនេះ គឺប៉ះពាល់ធ្ងន់ធ្ងរដល់កិត្តិយសស្ត្រី ដែលត្រូវបានចាត់ទុកថា វាស្ថិនៅក្នុងអំពើហិង្សាផ្លូវចិត្ត ដោយអចេតនា។
បើនិយាយពីកម្មវិធីព័ត៌មានវិញ Asian Foundation ក៏បានបង្ហាញថា មានប្រព័ន្ធផ្សព្វផ្សាយមួយចំនួន បានផ្តល់ព័ត៌មានពិស្តារពីជនរងគ្រោះ ឬ ជនសង្ស័យដែលអាចធ្វើឲ្យមានការកំណត់អត្តសញ្ញាណបាន រហូត ៨៩ ភាគរយនៃការផ្សាយសរុប។ ការបង្ហាញរូបភាពច្បាស់របស់ជនរងគ្រោះ ឬ ជនសង្ស័យ មានរហូតដល់ ៨៨ភាគរយ។ ការស្តីបន្ទោសដល់ជនរងគ្រោះ តាមរយៈសំណេរ ឬ ការអត្ថាធិប្បាយ មានសរុប ៦.៦ភាគរយ។ ការផ្តល់ព័ត៌មានដោយមានភាពលម្អៀងយេនឌ័រ មាន ១.៣ភាគរយ។ និងការផ្តល់ព័ត៌មានពិស្តារ រហូតហួសហេតុពេក មាន ០.៦ភាគរយ។
ក្រសួងព័ត៌មាន ក្រសួងកិច្ចការនារី និងដៃគូអភិវឌ្ឍ គឺអង្គការ UNDP ដែលបានចូលរួមក្នុងសិក្ខាសាលានោះ ក៏បានលើកឡើងពីភាពអវិជ្ជមានរបស់ប្រព័ន្ធផ្សព្វផ្សាយ ក្នុងការបញ្ចប់អំពើហិង្សាលើស្ត្រី និងកុមារីផងដែរ។ ហើយភាគីទាំងអស់ សំណូមពរឲ្យប្រព័ន្ធផ្សព្វផ្សាយក្នុងប្រទេសកម្ពុជា ត្រូវតែគិតគូឲ្យមែនទែន ពីបញ្ហានេះ មុនពេលដែលក្រសួងពាក់ព័ន្ធ មានចំណាត់ការផ្លូវច្បាប់ ដោយអាចជាការផ្អាក ឬ បិទស្ថាប័នសារព័ត៌មានទាំងនោះ មិនឲ្យដំណើរការតែម្តង ក្នុងហេតុផលនេះ។
សូមបញ្ជាក់ថា សិក្ខាសាលពង្រឹងការរាយការណ៍តាមប្រព័ន្ធផ្សព្វផ្សាយ ស្តីពីអំពើហិង្សាលើស្ត្រី នាពេលនេះ គឺធ្វើឡើង ដើម្បីជាផ្នែកមួយនៃយុទ្ធនាការ ១៦ថ្ងៃ ដើម្បីបញ្ចប់អំពើហិង្សាលើស្ត្រី ឆ្នាំ២០១៧ ដែលជាកម្មវិធីសកល ធ្វើឡើងក្នុងអំឡុងថ្ងៃទី ២៥វិច្ឆិកា ដល់ថ្ងៃទី ១០ខែធ្នូ ជារៀងរាល់ឆ្នាំ។ ជាទូទៅ យុទ្ធនាការនេះ តែងតែបង្កើតការជួបជុំរវាងរាជរដ្ឋាភិបាល អង្គការសង្គមស៊ីវិល សកម្មជន និងអង្គការសហប្រជាជាតិ ដើម្បីអំពាវនាវឲ្យមនុស្សគ្រប់រូប បញ្ឈប់អំពើហិង្សាលើស្ត្រី និងកុមារី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ