វាសនាសកម្មជនបក្សប្រឆាំង មិនទាន់ក្លាយជារបៀបវារៈនៃការជជែកគ្នារបស់បក្សទាំងពីរ
គណបក្សជាប់ឆ្នោតទាំងពីរបានបិទបញ្ចប់រួចរាល់ហើយនូវការជជែកគ្នាអំពីការកែទម្រង់ច្បាប់បោះឆ្នោត ។ ប៉ុន្តែការជជែកគ្នាអំពីវាសនារបស់លោកមាជ សុវណ្ណារ៉ា និងសកម្មជនគណបក្សសង្គ្រោះជាតិចំនួន១០នាក់ផ្សេងទៀតវិញនោះ នៅមិនទាន់ត្រូវបានបក្សទាំងពីរកំណត់កាលបរិច្ឆេទច្បាស់លាស់ណាមួយ ដើម្បីជួបគ្នានោះទេមកដល់ពេលនេះ។
ចុះផ្សាយនៅថ្ងៃ៖
ស្តាប់ - ០២:២១
មកដល់ពេលនេះគណបក្សសង្គ្រោះជាតិ មិនទាន់បានលើកសំណើជួបគ្នាជាផ្លូវការណាមួយជាមួយគណបក្សប្រជាជនកម្ពុជានៅឡើយទេ ដើម្បីពិភាក្សាអំពីបញ្ហាដោះលែងសកម្មជនគណបក្សប្រឆាំងទាំង១១នាក់ដែលខ្លះកំពុងជាប់ឃុំនៅក្នុងពន្ធនាគារ និងខ្លះទៀតកំពុងស្ថិតក្រោមការឃ្លាំមើលពីសំណាក់តុលាការ។ តែយ៉ាងណាក៏ដោយ គណបក្សសង្គ្រោះជាតិបានអះអាងថា ខ្លួនមិនបាននៅស្ងៀមទេចំពោះបញ្ហានេះ។
លោកសម រង្ស៊ី ប្រធានគណបក្សសង្គ្រោះជាតិ បានថ្លែងបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា គណបក្សសង្គ្រោះជាតិនឹងរិះរកមធ្យោបាយស្របច្បាប់ដោយសន្តិវិធី ដើម្បីជំរុញឲ្យមានការដោះលែងសកម្មជនទាំងអស់នោះ។ ក៏ប៉ុន្តែប្រធានគណបក្សសង្គ្រោះជាតិ និងជាប្រធានក្រុមតំណាងរាស្ត្រនៅក្នុងរដ្ឋសភារូបនេះ មិនបានកំណត់កាលបរិច្ឆេទច្បាស់លាស់ណាមួយនៅឡើយទេ ដើម្បីលើកយកបញ្ហានេះទៅជជែកជាមួយគណបក្សប្រជាជនកម្ពុជា។
សូមបញ្ជាក់ថា លោកមាជ សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយរបស់គណបក្សសង្គ្រោះជាតិ និងសកម្មជនចំនួន១០នាក់ទៀត ត្រូវបានតុលាការក្រុងភ្នំពេញចោទប្រកាន់ពីបទដឹកនាំកុបកម្ម និងអំពើចូលរួមក្នុងចលនាកុបកម្មដែលបានបណ្តាលឲ្យកើតមានអំពើហិង្សានៅក្បែរទីលានប្រជាធិបតេយ្យកាលថ្ងៃទី១៥ កក្កដាឆ្នាំ២០១៤កន្លងទៅ។ ក្នុងចំណោមនោះលោកមាជ សុវណ្ណារ៉ា និង សកម្មជនបួននាក់ផ្សេងទៀត ត្រូវបានតុលាការចាប់ឃុំខ្លួនបណ្តោះអាសន្ន រីឯ៦នាក់ទៀតអនុញ្ញាតឲ្យនៅក្រៅឃុំ។ លោកមាជ សុណ្ណារ៉ា ត្រូវបានតុលាការសាលាដំបូងរាជធានីភ្នំពេញ និងសាលាឧទ្ធរណ៍ បានបដិសេធសំណើនៅក្រៅឃុំរបស់លោកជាបន្តបន្ទាប់។ កាលពីថ្ងៃពុធ តុលាការកំពូលក៏បានទាត់សំណើសុំនៅក្រៅឃុំរបស់លោកផងដែរ។ គឺនៅតុលាការកំពូលនេះហើយ លោកមាជ សុវណ្ណារ៉ា ត្អូញត្អែរថា លោកគ្មានសង្ឃឹមថា នឹងបាននៅក្រៅឃុំនោះទេ បើសិនជាមេដឹកនាំគណបបក្សទាំងពីរមិនព្រមចរចាគ្នានោះ។
ចំពោះការលើកឡើងនេះ លោកកឹម សុខា អនុប្រធានគណបក្សសង្គ្រោះជាតិក្នុងពេលចុះទៅសួរសុខទុក្ខសកម្មជនរបស់ខ្លួននៅក្នុងពន្ធនាគារព្រៃសកាលពីថ្ងៃព្រហស្បតិ៍ បានថ្លែងប្រាប់អ្នកកាសែតថា គណបក្សប្រឆាំងនឹងលើកយកបញ្ហានេះទៅជជែកគ្នាជាមួយគណបក្សកាន់អំណាច ប៉ុន្តែលោកក៏មិនបានបង្ហាញកាលបរិច្ឆេទច្បាស់លាស់នោះដែរ។ ទាំងលោកសម រង្ស៊ី និងលោកកឹម សុខា សុទ្ធតែសង្ឃឹមថា បញ្ហាសកម្មជនបក្សប្រឆាំងនេះនឹងបញ្ចប់ព្រមគ្នាជាមួយច្បាប់គ.ជ.ប និងច្បាប់បោះឆ្នោតជ្រើសតាំងតំណាងរាស្ត្រថ្មីតែម្តង។
យ៉ាងណាក៏ដោយ អ្នកនាំពាក្យគណបក្សសង្គ្រោះជាតិ លោកយ៉ែម ប៉ុញ្ញរិទ្ធ បានបង្ហើបប្រាប់វិទ្យុបារាំងអន្តរជាតិថា គណបក្សទាំងពីរអាចនឹងជួបជជែកគ្នាពីរឿងសកម្មជនបក្សប្រឆាំងនៅខែក្រោយនេះ បន្ទាប់លោកកឹម សុខា វិលត្រឡប់មកពីសហរដ្ឋអាមេរិកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ