លោក សម រង្ស៊ី ស្វែងរកកិច្ចការពារសន្តិសុខពីសហរដ្ឋអាមេរិក នៅពេលក្រុមរបស់លោកមកដល់កម្ពុជា
លោក សម រង្ស៊ី និងក្រុមមន្រ្តីស្និទរបស់លោកមួយក្រុមកំពុងតែមានវត្តមាននៅសហរដ្ឋអាមេរិកតាំងពីថ្ងៃទី១៦កញ្ញាកន្លងមកនេះ ដែលត្រូវបានគេអះអាងថា ដើម្បីស្វែងរកការអន្តរាគមន៍ពីសហរដ្ឋអាមេរិកឲ្យជួយការពារសន្តិសុខដល់ក្រុមមន្រ្តីបក្សប្រឆាំងនៅពេលពួកគេ មកដល់កម្ពុជានៅថ្ងៃទី៩វិច្ឆិកាខាងមុខ។ ក៏ប៉ុន្តែសម្រាប់មន្រ្តីរដ្ឋាភិបាលកម្ពុជាបានចាត់ទុកការផ្តល់ទីតាំងឲ្យក្រុមបក្សប្រឆាំងធ្វើសកម្មភាពនៅសហរដ្ឋអាមេរិកបែបនេះថា អាមេរិកកំពុងគាំទ្រចលនា«ភេរវកម្ម»។
ចុះផ្សាយនៅថ្ងៃ៖
ស្តាប់ - ០១:៤៨
លោក សម រង្ស៊ី និងលោកស្រី ជូឡុង ស៊ូម៉ារ៉ា ព្រមទាំងសហការីមួយចំនួនទៀត បានជួបតំណាងរាស្ត្រអាមេរិកាំង លោក Ted Yoho នៅរដ្ឋធានី វ៉ាស៊ីនតោន នៅថ្ងៃទី១៩កញ្ញា បន្ទាប់ពីក្រុមលោកបានជួបមន្ត្រីជាន់ខ្ពស់ក្រសួងការបរទេសសហរដ្ឋអាមេរិក កាលពីរសៀលថ្ងៃទី១៨កញ្ញា។
ជំនួបរវាងប្រធានស្តីទីបក្សប្រឆាំងជាមួយនឹងមន្រ្តីជាន់ខ្ពស់សហរដ្ឋអាមេរិកនៅពេលនេះ ត្រូវបានគេអះអាងថាដើម្បីស្វែងរកការអន្តរាគមន៍ពីសហរដ្ឋអាមេរិកឲ្យជួយការពារសន្តិសុខដល់ក្រុមមន្រ្តីបក្សប្រឆាំងនៅពេលពួកគេមកដល់កម្ពុជានៅថ្ងៃទី៩វិច្ឆិកាខាងមុខ។
មន្ត្រីជាន់ខ្ពស់ម្នាក់របស់គណបក្សប្រឆាំងនៅសហរដ្ឋអាមេរិកគឺ លោក ប៉ុន សៅរី ត្រូវបានដកស្រង់សំដីមកថា ក្រៅពីស្នើឲ្យអាមេរិកជួយការពារសន្តិសុខដល់ក្រុមមន្រ្តីបក្សប្រឆាំងទាំងនោះ គណបក្សនេះក៏បានស្នើឱ្យសមាជិកសភា និងព្រឹទ្ធិសភាសហរដ្ឋអាមេរិកឱ្យបង្កើតគណៈកម្មការត្រួតពិនិត្យ និងជួយតាមដានលើដំណើរមាតុភូមិនិវត្តន៍របស់លោក សម រង្ស៊ី ផងដែរ។
ក៏ប៉ុន្តែក្នុងសន្និសិទសារព័ត៌មាន កាលពីថ្ងៃព្រហស្បតិ៍ អ្នកនាំពាក្យរដ្ឋាភិបាល លោក ផៃ ស៊ីផាន បានថ្លែងថា អាមេរិកកំពុងគាំទ្រដល់ចលនាភេរវកម្ម ប្រឆាំងរដ្ឋមួយ តាមរយៈការអនុញ្ញាតឱ្យគណបក្សសង្គ្រោះជាតិមានទីតាំងក្នុងប្រទេសខ្លួន ហើយអនុញ្ញាតឱ្យក្រុមនេះ ប្រមូលលុយ ដើម្បីគាំទ្រឱ្យមានការបះបោរប្រឆាំងរដ្ឋាភិបាលកម្ពុជា។
បើតាមលោក ផៃ ស៊ីផាន កម្ពុជាមានសិទ្ធិក្នុងការប្ដឹងអាមេរិក ចំពោះការគាំទ្រចលនានេះ តែដោយសារកម្ពុជានៅតែចាត់ទុកអាមេរិកជាដៃគូសហការល្អ ទើបរក្សាសិទ្ធិមិនប្ដឹងប្រទេសមហាអំណាចមួយនេះទេ។
តែសម្រាប់ លោកស្រី មូរ សុខហួរ គណបក្សសង្រ្គោះជាតិ មិនមានគោលបំណងណាមួយក្នុងការតស៊ូប្រដាប់អាវុធប្រឆាំងជាមួយរដ្ឋាភិបាលកម្ពុជានោះទេ ខណៈលោកស្រីបញ្ជាក់ថា ថវិកាដែលប្រមូលបានក៏មិនមែនជាថវិការបស់រដ្ឋាភិបាលអាមេរិកដែរ ពោលគឺជាថវិការបស់ពលរដ្ឋខ្មែរមួយចំនួនដែលរស់នៅក្រៅប្រទេសតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ