លោកម៉ៅ មុនីវណ្ណ នឹងចុះទៅពិនិត្យព្រំដែនរតនគីរី បើទោះជាមានការគំរាមបាញ់សម្លាប់
ក្រុមអ្នកតំណាងរាស្ត្រគណបក្សសង្គ្រោះជាតិប្រមាណជា៦រូប ដឹកនាំដោយលោក ម៉ៅ មុន្នីវណ្ណ កំពុងស្ថិតនៅលើដងផ្លូវឆ្ពោះទៅកាន់ខេត្តរតនគីរី ដើម្បីពិនិត្យមើលស្រះទឹកចំនួន៥ ដែលប្រជាពលរដ្ឋខេត្តរតនគីរីបានអះអាងថា វៀតណាមបានជីកចូលក្នុងទឹកដីកម្ពុជា នៅត្រង់ចំណុចភូមិឡុំ ឃុំប៉ក់ញ៉ៃ ស្រុកអូយ៉ាដាវ ខេត្តរតនគីរី។ ក្រុមអ្នកតំណាងរាស្ត្របានអះអាងថា នឹងមិនបារម្ភពីសុវត្ថិភាពរបស់ខ្លួននោះទេ បើទោះបីជាទាហានវៀតណាមបានព្រមានប្រើកាំភ្លើងបាញ់សម្លាប់ក្តី។
ចុះផ្សាយនៅថ្ងៃ៖
ស្តាប់ - ០២:២៩
បើគ្មានការប្រែប្រួលនោះទេ ក្រុមអ្នកតំណាងរាស្ត្រគណបក្សសង្គ្រោះជាតិដឹកនាំដោយលោក ម៉ៅ មុន្នីវណ្ណ នឹងធ្វើដំណើរទៅដល់ចំណុចព្រំដែនកម្ពុជា-វៀតណាម ត្រង់ចំណុចភូមិឡុំ ឃុំប៉ក់ញ៉ៃ ស្រុកអូយ៉ាដាវខេត្តរតនគីរី នៅព្រឹកថ្ងៃទី៨មិថុនាខាងមុខនេះ ដើម្បីពិនិត្យមើលស្រះទឹកចំនួន៥ ដែលប្រជាពលរដ្ឋនៅខេត្តរតនគីរីបានអះអាងថា វៀតណាមបានជីកចូលក្នុងទឹកដីកម្ពុជា។ មុនមានដំណើរទៅនេះ អាជ្ញាធរវៀតណាមបានព្រមានកាលពីបីថ្ងៃមុនថា នឹងប្រើកាំភ្លើងបាញ់មកលើក្រុមអ្នកតំណាងរាស្ត្រ ប្រសិនបើមានការចុះទៅមែន។ ប៉ុន្តែ លោក ម៉ៅ មុន្នីវណ្ណ បានអះអាងថា លោកមិនបារម្ភពីការព្រមាននេះទេ ព្រោះថា អ្វីដែលលោកនិងក្រុមតំណាងរាស្ត្រគណបក្សសង្គ្រោះជាតិកំពុងតែធ្វើនៅពេលនេះ គឺជាការអនុវត្តទៅតាមតួនាទីរបស់លោកជាអ្នកតំណាងរាស្ត្រ ការពារផលប្រយោជន៍ និងបូរណភាពទឹកដីកម្ពុជា។
លោក ម៉ៅ មុនីវណ្ណ និងតំណាងរាស្ត្រគណបក្សសង្គ្រោះជាតិពីភ្នំពេញចំនួន៧រូប រួមជាមួយនឹងប្រជាពលរដ្ឋនៅក្នុងខេត្តរតនគីរីប្រមាណជា១០០នាក់ នឹងចុះទៅពិនិត្យមើលស្រះទឹកទាំង៥ដែលប្រជាពលរដ្ឋនៅស្រុកអូយ៉ាងដាវខេត្តរតនគីរីបានអះអាងថា អាជ្ញាធរវៀតណាមបានជីកចូលក្នុងតំបន់ហាមឃាត។ ជាតំបន់ហាមឃាត់ ដោយសារតែនៅចំណុចខ្សែបន្ទាត់ព្រំដែនលេខ៦២៣ចន្លោះពីបង្គោលព្រំដែនលេខ៣០-៣១នេះ ភាគីកម្ពុជា-វៀតណាម នៅមិនទាន់បានឯកភាពគ្នាបោះបង្គោលនៅឡើយ ស្រាប់តែអាជ្ញាធរវៀតណាម បានជីកស្រះជាឯកតោភាគីដើម្បីយកទៅស្រោចស្របដំណាំម្រេចនិងកៅស៊ូនៅក្បែនោះទៅវិញ។
បើតាមលោក ឆាយ ធី មន្ត្រីសម្របសម្រួលអង្គការសិទ្ធិមនុស្សអាដហុកប្រចាំនៅខេត្តរតនគីរី បានបញ្ជាក់ថា មានស្រះទឹកដល់ទៅ៧ឯណោះ ដែលវៀតណាមបានជីក នៅតំបន់ហាមឃាត់នេះ ប៉ុន្តែស្រះបីទើបតែជីកកាលពីពេលថ្មីៗនេះ។ មន្ត្រីសិទ្ធិមនុស្សអង្គការអាដហុករូបនេះ បានបញ្ជាក់ថា លោកនឹងតាមដានព្រឹត្តិការណ៍នៅថ្ងៃចន្ទទី៨មិថុនា ព្រោះបារម្ភពីអំពើហិង្សាកើតឡើង។
គួរកត់សំគាល់ថា បញ្ហាព្រំដែនកម្ពុជា-វៀតណាម មិនទាន់ស្ងប់ស្ងាត់នោះទេ បើទោះបីជា រដ្ឋាភិបាលទាំងពីរ បានព្រមព្រៀងគ្នាបោះបង្គោលព្រំដែនតាមកិច្ចព្រមព្រៀងថ្មីៗនេះក្តី។ ចំណុចមួយចំនួនបានចាប់ផ្តើមកំរើកឡើងវិញ ដូចជាករណីនៅភូមិជាំ ស្រុកមេមត់ខេត្តត្មូងឃ្មុំ និងករណីនៅខេត្តតាកែវជាដើម។
បើតាមគម្រោង ក្រុមអ្នកតំណាងរាស្ត្រគណបក្សសង្គ្រោះជាតិនឹងធ្វើដំណើរទៅដល់ខេត្តរតនគីរីនៅយប់នេះសម្រាកមួយយប់ មុនពេលពួកគេធ្វើដំណើរចុះទៅតំបន់ព្រំដែននៅចំណុចភូមិឡុំ ឃុំប៉ក់ញ៉ៃ ស្រុកអូយ៉ាដាវខេត្តរតនគីរី ដែលមានចម្ងាយប្រមាណជា៧០គីឡូម៉ែត្រពីទីរួមខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ