បើកិច្ចព្រមព្រៀងនុយក្លេអ៊ែរអ៊ីរ៉ង់ត្រូវរលាយទៅវិញ តើជាកំហុសរបស់អ្នកណា?
ចុះផ្សាយនៅថ្ងៃ៖
ស្តាប់ - ០៦:២៣
នៅថ្ងៃអង្គារ ទី១៥ សីហា លោកប្រធានាធិបតីអ៊ីរ៉ង់ហាសាន រ៉ូហានីបានចេញមុខព្រមានអាមេរិកត្រង់ៗថា បើរដ្ឋបាលរបស់លោកដូណាល់ ត្រាំនៅបន្តប្រើនយោបាយដាក់ទ័ណ្ឌកម្មលើអ៊ីរ៉ង់ទៀត នោះអ៊ីរ៉ង់នឹងដកខ្លួនចេញពីកិច្ចព្រមព្រៀងនុយក្លេអ៊ែរដែលបានចុះហត្ថលេខាជាមួយសហគមន៍អន្តរជាតិកាលពីពាក់កណ្តាលខែកក្កដា ឆ្នាំ ២០១៥។ ការព្រមានរបស់លោករ៉ូហានីពេលនេះបានធ្វើឡើង បន្ទាប់ពីសភាអ៊ីរ៉ង់បានបោះឆ្នោតអនុម័តលើច្បាប់បន្ថែមថវិកាចំនួន ៥២០លានដុល្លារដើម្បីឲ្យរដ្ឋាភិបាលធ្វើការអភិវឌ្ឍន៍កម្មវិធីមីស៊ីល បាលីស្ទីក និងពង្រឹងសកម្មភាពរបស់កងឆ្មាំបដិវត្តអ៊ីរ៉ង់នៅក្នុងតំបន់។
កន្លងមក គេធ្លាប់ឮអាមេរិករបស់លោកត្រាំចេញមុខរិះគន់ និងព្រមានឈប់ទទួលស្គាល់កិច្ចព្រមព្រៀងនុយក្លេអ៊ែរ តែឥឡូវ ដល់វេនអ៊ីរ៉ង់ម្តងដែលព្រមានដកខ្លួនចេញពីកិច្ចព្រមព្រៀងនោះ។ តាមពិតទៅ ដើមចមនៃសង្រ្គាមពាក្យសម្តីរវាងអាមេរិក និងអ៊ីរ៉ង់មិនមែនជារឿងថ្មីដែលទើបកើតមានថ្ងៃនេះ ឬថ្ងៃម្សិលមិញទេ តែជារឿងអតីតកាលដែលបាន និងកំពុងបន្តចិញ្ចឹមភាពតានតឹងរវាងគ្នាមកទល់សព្វថ្ងៃ។ ក្រៅពីសំណុំរឿងនុយក្លេអ៊ែរអ៊ីរ៉ង់ដ៏ចម្រូងចម្រាស និងស្មុគស្មាញ ក៏នៅមានរឿងរ៉ាវជាច្រើនទៀតដែរ រួមមាន ការបន្តអភិវឌ្ឍន៍កម្មវិធីគ្រាប់មីស៊ីលបាលីស្ទិករបស់អ៊ីរ៉ង់ ការរំលោភសិទ្ធិមនុស្សនៅអ៊ីរ៉ង់ និងជំហររបស់អ៊ីរ៉ង់នៅក្នុងវិបត្តិមួយចំនួននៅក្នុងតំបន់។
ពិតណាស់ថា សំណុំរឿងនុយក្លេអ៊ែរអ៊ីរ៉ង់ត្រូវបានដោះស្រាយចប់សព្វគ្រប់តាមរយៈកិច្ចព្រមព្រៀងអន្តរជាតិមួយចុះហត្ថលេខាកាលពីថ្ងៃទី១៤ កក្កដា ឆ្នាំ ២០១៥ដោយអ៊ីរ៉ង់ និង៥ប្រទេសបូក១ គឺអាមេរិកក្នុងជំនាន់ប្រធានាធិបតីអូបាម៉ា រុស្ស៊ី ចិន បារាំង អង់គ្លេស និងអាល្លឺម៉ង់។ តែគេមិនត្រូវភ្លេចនិយាយទេថា តាំងពីក្នុងសម័យឃោសនាបោះឆ្នោតរហូតដល់ជាប់ឆ្នោតជាប្រធានាធិបតីអាមេរិក លោកដូណាល់ ត្រាំតែងគំរាមដុតចោល និងដកអាមេរិកចេញពីកិច្ចព្រមព្រៀងនោះ។
មកទល់ពេលនេះ លោកត្រាំមិនបានធ្វើដូចដែលលោកបាននិយាយទេ តែរដ្ឋបាលរបស់លោកត្រាំបែរជាបានបន្តដាក់ទ័ណ្ឌកម្មអ៊ីរ៉ង់ក្នុងរឿងដែលអ៊ីរ៉ង់បានបន្តអភិវឌ្ឍន៍ និងបាញ់សាកល្បងគ្រាប់មីស៊ីលបាលីស្ទិក។ ទន្ទឹមគ្នានេះ រដ្ឋបាលអាមេរិកក៏បានចោទអ៊ីរ៉ង់ពីបទរំលោភសិទ្ធិមនុស្ស និងគាំទ្រចលនាភេរវនិយម ដូចយ៉ាងក្រុមហេស្បូឡាលីបង់។ សម្រាប់លោកត្រាំ ការដែលអ៊ីរ៉ង់បន្តសាកល្បងគ្រាប់មីស៊ីលបាលីស្ទិកជាទង្វើរំលោភលើកិច្ចព្រមព្រៀង តែអ៊ីរ៉ង់ឆ្លើយបដិសេធ និងថា ទង្វើរបស់ខ្លួនមិនមែនជាការបង្កសង្រ្គាមទេ ពោលគឺដើម្បីពង្រឹងកម្លាំងការពារខ្លួន។
អ៊ីរ៉ង់មិនអាចបន្តទ្រាំទ្រនឹងនយោបាយប្រើទ័ណ្ឌកម្មរបស់អាមេរិក
នៅពេលនេះ អ៊ីរ៉ង់ហាក់ទ្រាំលែងបាន និងបានចាត់វិធានការជាក់ស្តែង និងដំឡើងសម្លេងកាន់តែខ្លាំងដាក់អាមេរិក។ សូមជម្រាបជូនថា ក្នុងរយៈពេលប៉ុន្មានខែចុងក្រោយនេះ ពោលតាំងពីលោកត្រាំបានឡើងកាន់អំណាចមក រដ្ឋបាលអាមេរិកបានដាក់ទ័ណ្ឌកម្មលើអ៊ីរ៉ង់ជាហូរហែដោយចោទអ៊ីរ៉ង់ពីបទបានបាញ់សាកល្បងគ្រាប់មីស៊ីលបាលីស្ទិកដែលអាមេរិកយល់ថា ជាទង្វើហាមឃាត់ដោយសេចក្តីសម្រេចចិត្តរបស់អង្គការសហប្រជាជាតិ។
នៅខាងអ៊ីរ៉ង់ បន្ទាប់ពីបានបរិហារម្តងជាពីរដងលើការបន្តប្រើនយោបាយដាក់ទ័ណ្ឌកម្មរបស់អាមេរិក អ៊ីរ៉ង់បានចេញវិធានការជាក់ស្តែងតបវិញដោយសភាបានអនុម័តនាថ្ងៃអាទិត្យ ទី១៣ សីហាលើច្បាប់បន្ថែមថវិកាចំនួន ៥២០លានដុល្លារដើម្បីឲ្យរដ្ឋាភិបាលយកទៅធ្វើការអភិវឌ្ឍន៍កម្មវិធីមីស៊ីល បាលីស្ទីក និងពង្រឹងសកម្មភាពរបស់កងឆ្មាំបដិវត្តអ៊ីរ៉ង់នៅក្នុងតំបន់។ បន្ទាប់មកក្នុងថ្ងៃអង្គារ ទី១៥ សីហា រូបលោកប្រធានាធិបតីហាសាន រ៉ូហានីបានចេញមុខព្រមានដកខ្លួនចេញពីកិច្ចព្រមព្រៀងនុយក្លេអ៊ែរ។ លោករ៉ូហានីបានចាត់ទុកនយោបាយរបស់លោកត្រាំថា ជានយោបាយនៃការវិលរកទ្រលំចាស់ ពោលទ្រលំមុនមានកិច្ចព្រមព្រៀងនុយក្លេអ៊ែរ។
ទន្ទឹមគ្នានេះ លោករ៉ូហានីដែលទើបជាប់ឆ្នោតប្រធានាធិបតីអ៊ីរ៉ង់អាណត្តិទី២ បានវ៉ៃប្រហារលោកត្រាំចំៗថា លោកត្រាំកំពុងបន្តបញ្ចេញកាយវិការប្រាប់ពិភពលោកថា ខ្លួនមិនមែនជាដៃគូល្អឡើយ។ គ្រប់គ្នាកំពុងចង់ដឹងថា តើការដែលលោករ៉ូហានីចង់ដកអ៊ីរ៉ង់ចេញពីកិច្ចព្រមព្រៀងនុយក្លេអ៊ែរ គ្រាន់ជាការគំរាម ឬថា លោកអាចនឹងធ្វើមែន?។ តាមពិតទៅ ទាំងលោករ៉ូហានី និងលោកត្រាំ ពិតជាមិនចង់ឃើញកិច្ចព្រមព្រៀងមួយនេះរលាយដោយងាយៗឡើយ។ អ៊ីរ៉ង់ អាមេរិក រួមទាំងប្រទេសហត្ថលេខីផ្សេងទៀតបានដឹងច្បាស់ពីសារៈសំខាន់ និងផលប្រយោជន៍របស់កិច្ចព្រមព្រៀង ពិសេសគឺភាគីអ៊ីរ៉ង់ដែលទទួលបានដង្ហើមសេដ្ឋកិច្ចថ្មី បន្ទាប់ពីរងទ័ណ្ឌកម្មអន្តរជាតិអស់ជាច្រើនឆ្នាំ។
កំហុសរវាងអាមេរិក និងអ៊ីរ៉ង់ គឺការមិនទុកចិត្តគ្នា
បើកិច្ចព្រមព្រៀងនុយក្លេអ៊ែរអ៊ីរ៉ង់ត្រូវរលាយទៅវិញនៅថ្ងៃណាមួយ វាកំហុសរបស់អាមេរិក ឬអ៊ីរ៉ង់ រួមទាំងប្រទេសហត្ថលេខីផ្សេងទៀត។ ចូរកុំភ្លេចថា ទំរាំតែទទួលបានកិច្ចព្រមព្រៀងមួយនេះ អ៊ីរ៉ង់ និងអាមេរិក រួមទាំងប្រទេសពាក់ព័ន្ធផ្សេងទៀតបានចំណាយពេលចរចាអស់ជាច្រើនឆ្នាំ និងបានធ្វើសម្បទានឲ្យគ្នាទៅវិញ ទៅមកច្រើនណាស់។ សំណួរដែលគ្រប់គ្នាកំពុងចោទសួរពេលនេះគឺថា បើអ៊ីរ៉ង់ពិតជាបានរំលោភលើកិច្ចព្រមព្រៀងនុយក្លេអ៊ែរមែននោះ ចុះហេតុអ្វីបានជាប្រទេសផ្សេងមិនសូវប្រតិកម្ម បែរជាមានតែអាមេរិកចេញមុខឈឺឆ្អាល និងថែមទាំងចាត់វិធានការដាក់ទ័ណ្ឌកម្មលើអ៊ីរ៉ង់ជាលក្ខណៈអត្តនោម័តិទៀត?។
បើគេពិនិត្យឲ្យបានស៊ីជ្រៅបន្តិចទៅឃើញថា រវាងអាមេរិក និងអ៊ីរ៉ង់ជារឿងសល់ពីអតីតកាល ពោលមិនមែនដោយសារតែបញ្ហានុយក្លេអ៊ែរ ឬគ្រាប់មីស៊ីលប៉ុណ្ណោះទេ។ គឺឥទ្ធិពលរបស់អ៊ីរ៉ង់នៅក្នុងតំបន់ និងទំនាក់ទំនងរបស់អាមេរិកជាមួយប្រទេសគូប្រជែងទល់នឹងអ៊ីរ៉ង់នៅក្នុងតំបន់បានធ្វើឲ្យទីក្រុងវ៉ាស៊ីតោន និងទីក្រុងតេហេរ៉ង់បន្តមិនទុកចិត្តគ្នា និងបន្តមើលមុខគ្នាមិនចំមកដល់សព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ