អាមេរិក៖វ៉ាស៊ីនតោនសារភាពឲ្យលុយ ៤០០លានដុល្លារទៅអ៊ីរ៉ង់ជាថ្នូរនឹងការដោះលែងចំណាប់ខ្មាំងអាមេរិក
នៅសហរដ្ឋអាមេរិក លុយសុទ្ធចំនួន ៤០០លានដុល្លារដែលអាមេរិកបានប្រគល់ទៅឲ្យអ៊ីរ៉ង់កាលពីខែមករាកន្លងទៅត្រូវបានគេលើកយកមកនិយាយជាថ្មី។ តែនៅលើកនេះ និងជាលើកទី១ រដ្ឋបាលអាមេរិកាំងតាមរយៈអ្នកនាំពាក្យការទូតលោកចន គៀប៊ីបានថ្លែងទទួលស្គាល់នាថ្ងៃព្រហស្បតិ៍ ទី១៨ សីហាថា រឿងលុយ ៤០០លានដុល្លារ និងការដោះលែងចំណាប់ខ្មាំងអាមេរិកចំនួន ៥នាក់ពីអ៊ីរ៉ង់ពិតជាមានជាប់ទាក់ទងគ្នាមែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
អ្វីៗហាក់ដូចជាលែងស្រពិចស្រពិលទៀតឡើយទាក់ទងនឹងលុយសុទ្ធចំនួន ៤០០លានដុល្លារដែលអាមេរិកបានប្រគល់ទៅប្រទេសអ៊ីរ៉ង់ក្នុងខែមករាកន្លងទៅ។ រដ្ឋបាលអាមេរិកាំងមិនបានប្រើពាក្យចំៗថា ជាលុយថ្នូរនឹងការដោះលែងចំណាប់ខ្មាំងអាមេរិកាំងទាំង ៥នាក់ពីរដ្ឋអំណាចអ៊ីរ៉ង់ទេ តែបានប្រើពាក្យថា មានចំណងទាក់ទងគ្នា។ សូមជម្រាបជូនថានៅថ្ងៃទី១៦ មករាកន្លងទៅក្នុងទីក្រុងវីយ៉ែន ប្រទេសអូទ្រីស្ត អ៊ីរ៉ង់ និងមហាអំណាចទាំង ៦ប្រទេស មានអាមេរិក រុស្ស៊ី ចិន បារាំង អង់គ្លេស និងអាល្លឺម៉ង់បានដាក់ឲ្យដំណើរការជាធរមាននូវកិច្ចព្រមព្រៀងនុយក្លេអ៊ែរអ៊ីរ៉ង់ដែលចុះហត្ថលេខាក្នុងថ្ងៃទី១៤ កក្កដា ឆ្នាំ ២០១៥។
តែនៅក្នុងថ្ងៃទី១៦ មករាដដែលនោះ អាមេរិក និងអ៊ីរ៉ង់ក៏បានប្រកាសគួរឲ្យភ្ញាក់ផ្អើលពីព្រមព្រៀងដោះដូរអ្នកទោសរវាងគ្នា គឺអ្នកទោសអាមរិក ៥នាក់នៅអ៊ីរ៉ង់ទល់នឹងអ្នកទោសអ៊ីរ៉ង់ ៧នាក់នៅអាមេរិក។ ស្រាប់តែនៅមួយថ្ងៃក្រោយមក ពោលថ្ងៃទី១៧ មករា លោកប្រធានាធិបតីអាមេរិកអូបាម៉ាបានប្រកាសជាសាធារណៈពីការសងលុយចំនួន ១ ៧០០លានដុល្លារទៅឲ្យអ៊ីរ៉ង់។ គឺជាលុយដែលអ៊ីរ៉ង់កម្ម៉ង់ទិញអាវុធពីអាមេរិកតាំងពីមុនថ្ងៃផ្ទុះបដិវត្តន៍អ៊ីស្លាមនៅអ៊ីរ៉ង់ក្នុងឆ្នាំ ១៩៧៩ និងមុនការផ្តាច់ទំនាក់ទំនងផ្លូវទូតរវាងអាមេរិក និងអ៊ីរ៉ង់ក្នុងឆ្នាំ ១៩៨០ តែអ៊ីរ៉ង់មិនដែលបានទទួលអាវុធទាំងនោះទេ។
ការដែលអាមេរិកយល់ព្រមសងលុយឲ្យអ៊ីរ៉ង់វិញ ក៏ដោយសារតែមានសេចក្តីសម្រេចពីតុលាការអាជ្ញាកណ្តាលអន្តរជាតិនៅក្រុងឡាអេដែលកំណត់ថា ក្នុងចំនួនទឹកលុយ ១ ៧០០លានដុល្លារ មាន ៤០០លានដុល្លារជាប្រាក់បំណុល និង ១ ៣០០លានដុល្លារជាការប្រាក់។ តែនៅថ្ងៃទី៣ សីហាកន្លងទៅថ្មីៗនេះ កាសែតអាមេរិកឈ្មោះ Wall Street Journal បានទម្លាយព័ត៌មានមួយដែលថា អាមេរិកបានបញ្ជូនលុយសុទ្ធជាលុយអឺរ៉ូ និងលុយស្វីសសរុប ៤០០លានដុល្លារទៅឲ្យអ៊ីរ៉ង់តាមយន្តហោះ។
មួយថ្ងៃបន្ទាប់មក ពោលថ្ងៃទី៤ សីហា លោកប្រធានាធិបតីអាមេរិកអូបាម៉ាបានបញ្ចេញប្រតិកម្មតបនឹងព័ត៌មានទម្លាយដោយកាសែត Wall Street Journal ថា ពិតជាមានដឹកលុយសុទ្ធសរុប ៤០០លានដុល្លារទៅឲ្យអ៊ីរ៉ង់មែន តែជាលុយបំណុលដែលអាមេរិកជំពាក់អ៊ីរ៉ង់ និងថា ការសងជាលុយសុទ្ធមកពីអ៊ីរ៉ង់ជាប់ទ័ណ្ឌកម្មដែលអាមេរិកគ្មានទំនាក់ទំនងធនាគារជាមួយអ៊ីរ៉ង់ទេ។ ទីបំផុតពេលនេះ ការពិតបានចេញពីរដ្ឋបាលលោកអូបាម៉ាដែលថា រឿងលុយ ៤០០លានដុល្លារ និងការដោះលែងចំណាប់ខ្មាំងអាមេរិកចំនួន ៥នាក់ពីអ៊ីរ៉ង់ពិតជាមានជាប់ទាក់ទងគ្នាមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ