បារាំងតក់ស្លុតនឹងព្រឹត្តិការណ៍សម្លាប់មនុស្ស បីថ្ងៃជាប់គ្នា
ចុះផ្សាយនៅថ្ងៃ៖
ស្តាប់ - ០៧:២៧
ព្រឹត្តិការណ៍ចាក់សម្លាប់ និងបើកឡានបុកមនុស្ស ដែលកើតឡើង៣ថ្ងៃជាប់គ្នា ក្នុងខេត្ត និងទីក្រុងចំនួន ៣ បានធ្វើឲ្យមនុស្សរបួស ធ្ងន់ និងស្រាល យ៉ាងតិច ២០នាក់។ កាលពីថ្ងៃសៅរ៍ ជនជាតិបារាំង ដើមកំណើតអាហ្រ្វិក ប៊ូរុនឌី ម្នាក់បានចូលចាក់ប៉ូលិសឲ្យរបួសបីនាក់ ក្នុងទីស្នាក់ការប៉ូលិស នៅខេត្តតួរ មុននឹងត្រូវប៉ូលិសបាញ់សម្លាប់។ នៅថ្ងៃអាទិត្យ ទីក្រុងឌីហ្សុង ដែលស្ថិតនៅភាគខាងកើតបារាំង បុរសវ័យ៤០នាក់បានបើកឡានលើចិញ្ចើមថ្នល់ រហូតធ្វើឲ្យអ្នកដំណើររបួស ១៣នាក់ ដែលនៅក្នុងនោះរបួសធ្ងន់ពីរនាក់។ ព្រឹត្តិការណ៍ស្រដៀងគ្នានេះបានកើតឡើងម្តងទៀត កាលពីយប់ថ្ងៃចន្ទទី ២២ ធ្នូ នៅទីក្រុងណង់ ដែលនៅក្នុងនោះបុរសម្នាក់បើកឡានបុកចូលផ្សារណូអែល ធ្វើឲ្យមនុស្សរបួស ៨នាក់។ អាជ្ញាធរបារាំងនៅមិនទាន់សន្និដ្ឋានថា ករណីទាំងបីមានទាក់ទងគ្នា ឬជាសកម្មភាពបង្កអំពើភេរវកម្ម នៅឡើយទេ។ ប្រធានាធិបតីបារាំងលោក ហ្វ្រង់ស័រ ហូឡង់ បានប្រកាសឲ្យមានការកោះប្រជុំគណៈរដ្ឋមន្រ្តី ជាបន្ទាន់ នៅថ្ងៃអង្គារទី ២៣ ធ្នូ។
តាមរយៈការស៊ើបអង្កេត និងការចុះឆែកឆេរ នៅតាមផ្ទះរបស់ជនល្មើស ប៉ូលិសបានរកឃើញភស្តុតាងមួយចំនួន ដែលអាចបញ្ជាក់ថា ការប្រព្រឹត្តិរបស់ជនល្មើស ដើម្បី បង្ករបួសស្នាមដល់អ្នកដទៃមានជាប់ពាក់ព័ន្ធនឹងគំនិតគិតទុករបស់ពួកគេនីមួយៗ។
តាមរដ្ឋអាជ្ញាបារាំង ប្រចាំខេត្តតួរ ជនជាតិបារាំង ដើមកំណើតប៊ូរុនឌី អាហ្វ្រិក ដែលបានចូលចាក់ប៉ូលិសបារាំង ៣នាក់ នៅខេត្តតួរ មាននិន្នាការទៅរកអ៊ីស្លាមជ្រុលនិយម។ គេបានប្តូរពីកាន់សាសនាកាតូលិក ទៅជាអ៊ីស្លាម ក្នុងរយៈពេលប៉ុន្មានឆ្នាំមុននេះ និងធ្លាប់បានបង្ហោះផ្សាយរូបទង់របស់ក្រុមជីហាត នៃអង្គការរដ្ឋអ៊ីស្លាម នៅលើទំព័រ បណ្តាញសង្គមFacebook របស់ខ្លួន។ ជនល្មើស ឈ្មោះ Bertrand ហៅ Bilal តាមពិតធ្លាប់ត្រូវតុលាការបារាំងផ្តន្ទាទោសជាច្រើនដង ពីបទល្មើសមជ្ឈិម ប៉ុន្តែ មិនដែលជាប់ឃុំឃាំង ឬស្ថិតនៅក្នុងបញ្ជីតាមដានរបស់ទីភ្នាក់ងារស៊ើបការណ៍សម្ងាត់របស់បារាំងទេ។ នៅថ្ងៃចន្ទ ប្អូនប្រុសរបស់ជនល្មើសដែលគេជឿថា ជាអ្នកបញ្ចុះបញ្ចូលជនល្មើសឲ្យចូលក្រុមអ៊ីស្លាមជ្រុលនិយម ត្រូវបានអាជ្ញាធរប៊ូរុនឌីចាប់ខ្លួន ទៅតាមការស្នើរបស់ប៉ូលិសបារាំង។
ជនល្មើសទី២ ដែលត្រូវប៉ូលិសចាប់ខ្លួនបានឆ្លើយសារភាពថា បន្ទាប់ពីបានមើលកុនឯកសារនិយាយពីសង្រ្គាមនៅឆេឆេនី គេមានគំនិតចង់សងសឹកនឹងរដ្ឋាភិបាលបារាំង។ ដំបូង គេចង់បុកសម្លាប់ប៉ូលិស ដោយបានបើកឡានកាត់មុខទីស្នាក់ការប៉ូលិសនៅ ឌីហ្សុង ប៉ុន្តែ ដោយសារមិនសូវមានភ្នាក់ងារប៉ូលិសនៅតាមផ្លូវ គេបានសម្រេចបើកបុកអ្នកធ្វើដំណើរតាមចិញ្ចើមថ្នល់វិញ។ សម្រាប់ជនល្មើសទីពីរ គេធ្វើដូច្នេះ ដើម្បីសងសឹកជូនកុមារប៉ាឡេស្ទីនដែលស្លាប់រហូតមក។ ក្នុងករណីជនល្មើសទី៣វិញ ដែលបើកបុកចូលផ្សារណូអែល កាលពីយប់ថ្ងៃចន្ទ គេកំពុងសិក្សាលើសៀវភៅកំណត់ហេតុ ដែលគេរកឃើញ នៅក្បែរខ្លួនជនល្មើស។ ជនល្មើសទី៣កំពុងត្រូវពេទ្យសង្រ្គោះជីវិត ព្រោះគេបានចាក់សម្លាប់ខ្លួន តែមិនស្លាប់ ក្រោយពីបានបើកបុកសម្លាប់មនុស្សភ្លាមៗ។
ជនល្មើសសុទ្ធតែមានបញ្ហាផ្លូវចិត្តមិននឹងន៍
តាមអាជ្ញាធរបារំាង បើទោះបីជាជនល្មើសស្រែកជាភាសាអារ៉ាប់ ដូចគ្នាមែន ពាក្យជាភាសាអារ៉ាប់ថា Allah Akbar ដែលមានន័យថា ព្រះគឺធំអស្ចារ្យ ប៉ុន្តែ ពួកគេមិនដែលមានជាប់ទាក់ទងគ្នាទេ ពីមុនមក។ នៅក្នុងពេលប៉ូលិសកំពុងចាត់ចូលទង្វើរបស់ជនល្មើសទីមួយដែលចាក់សម្លាប់ប៉ូលិស ថា ជាសកម្មភាពធ្វើភេរវកម្ម ប៉ុន្តែ ជនល្មើសទីពីរ ដែលស្រែកជាភាសាអារ៉ាប់ ដែរនោះ និងបានបុកធ្វើឲ្យមនុស្សរបួស ជាច្រើននាក់ មិនត្រូវបានអាជ្ញាធរបារាំងចាត់ទុកជា ភេរវករនោះទេ។
ផ្ទុយទៅវិញ រដ្ឋអាជ្ញាបានចាត់ថ្នាក់ជនល្មើសទីពីរ និងទីបី ដែលបានបើកឡានធ្វើឲ្យមនុស្សរបួស នៅឌីហ្សុង និងនៅទីក្រុងណង់ ថា ពួកគេមានបញ្ហាផ្លូវចិត្ត មិននឹងន៍។
អាជ្ញាធរនៅបានអះអាងថា ករណីទាំងបីខាងលើ ធ្វើឡើង ដោយជនល្មើស ក្នុងមូលហេតុផ្ទាល់ខ្លួន របស់ជនល្មើសនីមួយៗ គឺមិនមែនដើម្បីធ្វើទៅតាមការអំពាវនាវរបស់ក្រុមជីហាតនៃអង្គការរដ្ឋអ៊ីស្លាមនោះដែរ។ និយាយដូច្នេះ ដើម្បីកុំឲ្យសាធារណជនភ័យជ្រួលច្របល់។ ប៉ុន្តែ ការអះអាងយ៉ាងដូច្នេះរបស់អាជ្ញាធរជាន់ខ្ពស់បារាំង ផ្ទុយទៅវិញ បានធ្វើឲ្យប៉ូលិសថ្នាក់មូលដ្ឋាន និងគ្រូពេទ្យផ្លូវចិត្តមានការខកចិត្ត។ ខកចិត្ត ព្រោះថា ជនល្មើសអាចត្រូវសម្រាលទោសកំហុស ដោយសារតែមូលហេតុ បញ្ហាផ្លូវចិត្តមិននឹងន៍។ គេបារម្ភផងដែរថា ក្រុមមនុស្សដែលមានវិបត្តិផ្លូវចិត្ត ឬបញ្ហាផ្លូវចិត្តមិននឹងន៍ កាន់តែច្រើនអាចធ្វើសកម្មភាព ភេរវកម្ម ដើម្បីបុព្វហេតុសាសនា ឬ ដើម្បីក្រុមជីហាត នៃអង្គការរដ្ឋអ៊ីស្លាម។ បន្ទាប់មក ជនល្មើសទាំងនោះ នឹងមិនអាចជាប់ពន្ធនាគារ ប៉ុន្តែ អាចរស់នៅយ៉ាងសុខស្រួលនៅផ្ទះព្យាបាលមនុស្សឆ្កួត និងរួចខ្លួនពីទោសប្រព្រឹត្តភេរវកម្មនានា។
នៅក្រោយព្រឹត្តិការណ៍ដ៏រន្ធត់ បីជាប់គ្នា លោកManuel Valls នាយករដ្ឋមន្រ្តី បារាំង ផ្ទាល់បានប្រកាស កាលពីថ្ងៃចន្ទ ថា បារាំងមិនដែលជួបប្រទះនឹងការគំរាមកំហែងភេរវកម្មខ្លាំងក្លាដូចពេលនេះទេ ពីមុនមក។ ប៉ុន្តែនៅព្រឹកថ្ងៃអង្គារលោកបានបន្ធូរបន្ថយភាពតានតឹងមកវិញ ដោយបានអំពាវនាវឲ្យប្រជាជនបារាំងប្រុងប្រយ័ត្នខ្លួន។ រដ្ឋាភិបាលបារាំងក៏កំពុងសិក្សាពីវិធានការពង្រឹងសន្តិសុខបន្ថែម ជាពិសេស នៅក្នុងអំឡុងបុណ្យណូអែលខាងមុខ។
វិធានការរដ្ឋត្រូវរឹតបន្តឹងដើម្បីជៀសវាងសកម្មភាពចចកទោលដែលអាចកើតឡើងនៅពេលខាងមុខ
បើទោះបីជាអាជ្ញាធរបារាំងបានចាត់ទុកជនល្មើសថា ជាជនមិនគ្រប់ទឹក និងធ្វើសកម្មភាព ដើម្បីមូលហេតុផ្ទាល់ខ្លួន មិនទាក់ទងនឹងក្រុមជីហាត ដែលកំពុងកាន់កាប់ទឹកដីមួយផ្នែករបស់ស៊ីរី និងអ៊ីរ៉ាក់ ប៉ុន្តែ រាល់សកម្មភាពរបស់ជនល្មើស គឺមានលក្ខណៈស្រដៀងគ្នាខ្លាំង ទៅនឹងការអំពាវនាវរបស់ក្រុមជីហាតដែលក្រុមនេះឧស្សាហ៍បង្ហោះនៅតាមអ៊ីនធ័រណេតកន្លងមក។ ក្រុមជីហាតបានស្រែកអំពាវនាវឲ្យអ្នកកាន់សាសនាអ៊ីស្លាមនៅប្រទេសបារាំង ទាំងអស់ ធ្វើគ្រប់សកម្មភាព មធ្យោបាយ ដើម្បី សម្លាប់ប្រជាជននៅបារាំង ដូចជាគេបានប្រើពាក្យថា បើគ្មានកាំភ្លើង គេអាចប្រើកាំបិទ គប់ដុំថ្ម ឬបើកឡានសម្លាប់មនុស្សនៅបារាំង គឺធ្វើយ៉ាងម៉េចដើម្បីកុំឲ្យបារាំងដែលកំពុងចូលរួមក្នុងការវាយប្រហារផ្លូវអាកាសទៅលើជីហាតនៅស៊ីរី និងអ៊ីរ៉ាក់នោះអាចនៅសុខស្រួល។
បើប្រៀបធៀបនឹងប្រទេសអឺរ៉ុបផ្សេងទៀត បារាំងអាចប្រឈមនឹងបញ្ហាភេរវកម្មដែលបង្កដោយក្រុមជីហាតខ្លាំងជាងគេ។ បើទោះបីជាមានច្បាប់រឹតបន្តឹងកុំឲ្យយុវជនបារាំងចេញទៅចូលរួមប្រយុទ្ធកៀកស្មាជាមួយក្រុមជីហាត នៅស៊ីរី ប៉ុន្តែ សព្វថ្ងៃនេះ រដ្ឋាភិបាលបារាំងបានរកឃើញថា មានយុវជនបារាំងជិត ៤០០នាក់កំពុងប្រយុទ្ធក្នុងជួររបស់ក្រុមជីហាត។ ពួកគេមួយចំនួនបានស្លាប់ក្នុងសមរភូមិ និងមួយចំនួនទៀត ត្រូវគេដឹងថា កំពុងធ្វើដំណើរត្រលប់មកទឹកដីបារាំងវិញ។ អាជ្ញាធរបារាំងបារម្ភថា ក្រុមនេះនឹងអាចបង្កអំពើភេរវកម្មក្នុងទឹកដីបារាំងវិញ។ មួយវិញទៀត បើទោះបីជាជនល្មើសខ្លះ មិនបានធ្វើសកម្មភាព ដើម្បីឆ្លើយតបទៅនឹងការអំពាវនាវរបស់ក្រុមជីហាត ប៉ុន្តែ គេនៅតែបារម្ភថា សកម្មភាពដូចជនល្មើសទាំងបី នៅបីថ្ងៃចុងក្រោយនេះ នឹងអាចកើតមាននៅថ្ងៃក្រោយ ព្រោះថា នៅក្នុងសង្គមបារាំង យុវជនកាន់សាសនាអ៊ីស្លាម ជាច្រើន ដែលរស់នៅក្នុងជីវភាពក្រីក្រ គ្មានការងារធ្វើ រស់នៅក្រៅសង្គម កំពុងត្រូវទាក់ទាញដោយចលនាជ្រុលនិយម។ បើទោះបីជាពួកគេមិនធ្វើទៅតាមការអំពាវនាវរបស់ក្រុមជីហាតមែន ប៉ុន្តែ ពួកគេអាចធ្វើសកម្មភាពភេរវកម្មណាមួយទៅតាមជំនឿសាសនាជ្រុលនិយមរបស់គេ ដើម្បី ទាមទារបញ្ជាក់អត្តសញ្ញាណ តួនាទីរបស់គេ ក្នុងសង្គមបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ